​អ៊ុយ​ក្រែ​ន​៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​និយាយ​កាលពី​ថ្ងៃអាទិត្យ​ថា យោធា​របស់​ប្រទេស​លោក​កំពុង​ប្រយុទ្ធ​ទប់ទល់​ការបាញ់​កាំភ្លើង​ធំ​រុស្ស៊ី​ដែល​មិន​ឈប់ឈរ ដើម្បី​ដណ្តើម​យក​ក្រុង Sievierodonetsk ជាទី​ក្រុង​សំខាន់​មួយ​នៅ​ភាគ​ខាងកើត​។

​

​នៅ​ក្នុង​សុន្ទរកថា​វីដេអូ​លោក Zelenskyy និយាយ​ថា​ សត្រូវ​បាន​បំផ្លាញ​ហេដ្ឋារចនាសម្ព័ន្ធ​សំខាន់ៗ​របស់​ទីក្រុង និង​ធ្វើ​ឱ្យ​ខូចខាត​អគារ ​90% ហើយ​យើង​កំពុង​ធ្វើ​គ្រប់យ៉ាង​ដែល​យើង​អាច​ធ្វើ​បាន ​ដើម្បី​ទប់ទល់​ការ​វាយ​លុក​នេះ​។ ​លោក Zelenskyy និយាយ​ថា គ្មាន​ថ្ងៃ​ណា​ដែល​យើង​មិន​ព្យាយាម​រក​អាវុធ​បន្ថែម ឬ​អាវុធ​ទំនើប​ៗ​ដើម្បី​ការពារ​ទឹកដី និង​ប្រជាជន​យើង​នោះ​ទេ​។ ខ្ញុំ​អរគុណ​អ្នក​គ្រប់គ្នា​ដែល​ការពារ​ទីក្រុង Sievierodonetsk និង​បង្ហាញ​ដល់​អ្នក​ចូល​ឈ្លាន​ពាន​ថា ​សន្តិភាព​នឹង​នៅតែ​ជា​របស់​យើង​។​ លោក Zelenskyy បាន​ទៅ​ពិនិត្យមើល​ទីក្រុង Kharkiv ជាទី​ក្រុង​ធំ​ទី​ពីរ​របស់​ប្រទេសកាលពី​ថ្ងៃអាទិត្យ​ ជាការ​ធ្វើដំណើរ​លើកដំបូង​របស់លោក​នៅក្រៅ​ទីក្រុង Kyiv ចាប់តាំងពី​ការ​ចាប់ផ្តើម​វាយ​លុក​របស់​រុស្ស៊ី​ ដែល​ត្រូវបាន​ថ្កោលទោស​ចំពោះ​ការធ្វើ​ឲ្យ​ខូចខាត​ច្រើន​ដល់ទី​ក្រុង​នេះ ដោយ​ការបាញ់​ផ្លោង​របស់​រុស្ស៊ី​ដោយ​ឥតឈប់ឈរ​។

​លោក​ប្រធានាធិបតី Zelenskyy ក៏បាន​ជួប​ជាមួយ​មន្ត្រី​ក្នុង​តំបន់​មកពី​ទីក្រុង Kharkiv ភាគ​ឦសាន ដើម្បី​ពិភាក្សា​អំពី​លទ្ធភាព​នៃ​ការសាងសង់​លំនៅឋាន​ឡើងវិញ​ បន្ទាប់ពី​ការបំផ្លាញ​នៅក្នុង​តំបន់​។ យោងតាម​សេចក្តីថ្លែងការណ៍​របស់​ការិយាល័យ​ព័ត៌មាន​របស់លោក Zelenskyy បាន​ឲ្យ​ដឹងថា អភិបាលក្រុង​លោក Oleh Synyehubov បាន​ប្រា​ប់លោក​ប្រធានាធិបតី​ថា កងកម្លាំង​រុស្ស៊ីបានបំផ្លាញ​អគារ​លំនៅឋាន​ជាង 2,100​កន្លែងដោយ​ផ្នែក​ភាគ​ខាងជើង ​និង​ភាគ​ខាងកើត​រដ្ឋធានី Kharkiv រង​ផលប៉ះពាល់​ខ្លាំង​។​ លោក Synyehubov និយាយថា រុស្ស៊ី​នៅតែ​គ្រប់គ្រង​ប្រមាណ 30% នៃ​ទីក្រុង Kharkiv ខណៈ​កងទ័ព​របស់​ទីក្រុង Kyiv បាន​ដណ្តើមយក​មកវិញ 5% បន្ថែមទៀត៕

អត្ថបទ៖ ប៊ុនថន