ពោធិ៍សាត់៖ ឃុំអូរសោម ស្ថិតក្នុងស្រុកវាលវែង ខេត្តពោធិ៍សាត់ បាននឹងកំពុងទទួលការអភិវឌ្ឍទាំងផ្នែកពុទ្ធចក្រ និងអាណាចក្រ ពីសំណាក់រាជរដ្ឋាភិបាល និងដៃគូអភិវឌ្ឍននានា ខណៈនៅតំបន់នោះ កំពុងមានកំណើនប្រជាពលរដ្ឋទៅរស់នៅ រួមទាំងសក្ដានុពលខ្លាំង លើវិស័យកសិកម្ម និងទេសចរណ៍ជាដើម ។

ក្នុងឱកាសអញ្ជើញបញ្ចុះបឋមសិលាសាងសង់ព្រះវិហារ នៅវត្តលុម្ពិនី ហៅវត្តអូរសោម ស្ថិតក្នុងឃុំអូរសោម ឯកឧត្តមកិត្តិសង្គហបណ្ឌិត ទេព ងន អនុប្រធានទី២ ព្រឹទ្ធសភាជាតិ បានមានប្រសាសន៍ថា កម្ពុជាមានសុខសន្តិភាព ស្ថិរភាពនយោបាយល្អ ហើយរាជរដ្ឋាភិបាល បាននិងកំពុងខិតខំអភិវឌ្ឍនូវហេដ្ឋារចនាសម្ព័ន្ធនានា នៅទូទាំងប្រទេស ដើម្បីបម្រើផលប្រយោជន៍របស់ប្រជាពលរដ្ឋ ។

ឯកឧត្តម បានបន្តថា ជាក់ស្ដែងនៅក្នុងឃុំអូរសោម ស្រុកវាលវែងនេះ កំពុងសាងសង់នូវផ្លូវជាតិលេខ១០ តភ្ជាប់មកពីខេត្តបាត់ដំបង ឆ្ពោះទៅខេត្តកោះកុង ដែលផ្លូវនេះ នឹងក្លាយជាសរសៃឈាមសេដ្ឋកិច្ច លើកកម្ពស់ជីវភាពរស់នៅរបស់ប្រជាពលរដ្ឋ នៅក្នុងឃុំទាំងមូល ងាយស្រួលក្នុងការធ្វើដំណើរ និងនាំយកដំណាំកសិផលរបស់ខ្លួនទៅលក់នៅទីផ្សារ ដើម្បីឱ្យមានជីវភាពរស់នៅកាន់តែប្រសើរឡើងថែមទៀត ខណៈហេដ្ឋារចនាសម្ព័ន្ធជាច្រើនទៀត កំពុងត្រូវបានអភិវឌ្ឍជាហូរហែរ ។ 

ឯកឧត្តមកិត្តិសង្គហបណ្ឌិត បន្ថែមថា ទន្ទឹមនឹងការរីកចម្រើនផ្នែកអាណាចក្រនេះ ឃុំអូរសោម សមិទ្ធផលក្នុងវត្តអារាម ក៏បានផុសឡើងជាបន្តបន្ទាប់ ដែលមានទាំងកុដិ សាលា និងចាប់ផ្ដើមកសាងនូវព្រះវិហារ នៅក្នុងវត្តអូរសោម ដើម្បីបម្រើក្នុងវិស័យពុទ្ធសាសនា ដែលព្រះវិហារនេះ បានចូលរួមកសាងដោយពុទ្ធបរិស័ទជិតឆ្ងាយ ។

ជាមួយគ្នានេះ ឯកឧត្តមអនុប្រធានទី២ ព្រឹទ្ធិសភា បានអំពាវនាវពលរដ្ឋក្នុងឃុំអូរសោម ថែរក្សាសុខភាពផ្ទាល់ខ្លួន និងក្រុមគ្រួសារឱ្យបានល្អ ហើយបានលើកទឹកចិត្តពលរដ្ឋអញ្ជើញទៅបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់ នាថ្ងៃទី៥ ខែមិថុនា ឆ្នាំ២០២២ ដើម្បីជ្រើសរើសនូវថ្នាក់ដឹកនាំដ៏ល្អ សម្រាប់អភិវឌ្ឍនៅមូលដ្ឋានរបស់ខ្លួន ក៏ដូចជាប្រទេសជាតិឱ្យមានការរីកចម្រើនខ្លាំងលើគ្រប់វិស័យបន្ថែមទៀត ៕ អត្ថបទ ៖ សុខរិទ្ធ