ស្វាយរៀង៖ ផ្លូវអ៊ុតបេទីម ១ខ្សែប្រវែងជាង៣ពាន់ ៩០០ម៉ែត្រ ស្ថិតនៅក្រុងស្វាយរៀង ខេត្តស្វាយរៀង តភ្ជាប់ពីផ្លូវជាតិលេខ១ ម្តុំរូបគោ២ សង្កាត់សង្ឃ័ ឆ្លងកាត់សង្កាត់ពោធិ៍តាហោ ឆ្ពោះទៅច្រាំងទន្លេវៃគោ ខាងលិចស្ពានពោធិហោ បច្ចុប្បន្នសម្រេចបានប្រមាណ ៨៥% និងឈានទៅបញ្ចប់នៅប៉ុន្មានថ្ងៃខាងមុខ ។

លោក វង់ វ៉ាន់ដា អ្នកគ្រប់គ្រងស្ថាបនាផ្លូវបានបញ្ជាក់ប្រាប់BTVឱ្យដឹងថា ផ្លូវដែល​ក្រុមការងារ​ធ្វើនេះ ​គឺចាប់ផ្ដើមពីខែមករា ​ឆ្នាំ២០២២ ​ហើយមកដល់បច្ចុប្បន្នសម្រេចស្ថាបនា​បាន៨៥% និង ឈាន​ទៅបញ្ចប់នៅសប្តាហ៍ក្រោយ ​ក្នុងនោះក្រុមការងារស្ថាបនាផ្លូវជា ៣ដំណាក់កាល គឺ​ដំណាក់​កាលទី ១ ក្រុមការងារធ្វើការក្រាលកៅស៊ូ ​មានកំរាស់៥ ហ៊ុន មាន​ប្រវែងទទឹងផ្លូវ ​ចំនួន១២ម៉ែត្រ ស្ថាបនា​ដំណាក់កាលទី ​២ក្រាលកៅស៊ូកំរាស់៥ហ៊ុនដែរ ​មានប្រវែងទទឹងផ្លូវ ១៣ម៉ែត្រ និង​ស្ថាបនាដំណាក់កាលទី៣ ​ចាប់ពីចំណុច PK 2+900 ដល់ 3+600 មានប្រវែង៧០០ម៉ែត្រ ទទឹងផ្លូវ១១ ម៉ែត្រ ។

លោក ណុប ចំរើន អភិបាលក្រុង បានប្រាប់ឱ្យដឹងថា ក្រុងស្វាយរៀង ​ក្រៅពីរដ្ឋបាលខេត្ត បាន​ធ្វើការ​អ៊ុតផ្លូវបេទីម១ខ្សែ ​នៅក្នុងសង្កាត់ទាំង២ខាងលើ ក្រុងនូវ​បាន​ទទួលគម្រោង​ស្ថាបនា​ផ្លូវចាក់បេតុង នៅក្នុងសង្កាត់ស្វាយរៀង និងសង្កាត់ចេក​ ចំនួន៥ខ្សែបន្ថែមទៀត ដើម្បី​សម្រួល​ដល់​ការធ្វើដំណើររបស់ពលរដ្ឋនៅក្នុងក្រុងទាំងមូលជំនួសផ្លូវក្រាលថ្មបំបែក និងផ្លូវក្រាលខ្សាច់ភ្នំ៕

អត្ថបទ៖ ភា សារិទ្ធ

​