អ៊ីស្រាអែល៖ លោកនាយករដ្ឋមន្ត្រី បេនចាមីន ណេតាន់យ៉ាហ៊ូ បានប្រកាសជ័យជំនះដ៏ធំធេង សម្រាប់គណបក្សស្ដាំនិយម នៅការបោះឆ្នោតអ៊ីស្រាអែលជាលើកទី៤ ក្នុងរយៈពេល ២ឆ្នាំកន្លងមកនេះ ថ្វីត្បិតតែការស្ទង់មតិក្រោយការបោះឆ្នោតភ្លាមៗលើកឡើងថា លោកមិនអាចដណ្ដើមបានសំឡេងភាគច្រើនក្នុងសភាក៏ដោយ។
គណបក្ស Likud របស់លោក ណេតាន់ យ៉ាហ៊ូ និងក្រុមសម្ព័ន្ធមិត្តត្រូវបានព្យាករណ៍ថា នឹងទទួលបានសំឡេងឆ្នោត ៥៣ ឬ ៥៤អាសនៈនៅក្នុងសភាដែលមាន ១២០អាសនៈ។ ទោះបីជាយ៉ាងណាក៏ដោយ គណបក្សជាច្រើនដែលជំទាស់មិនឲ្យលោក ណេតាន់ យ៉ាហ៊ូ បន្តកាន់តំណែងជានាយករដ្ឋមន្ត្រីអ៊ីស្រាអែលនោះ ទំនងជាអាចឈ្នះ ៥៩អាសនៈ ដែលនេះមានន័យថា គណបក្សជាតិនិយម Yamina ដឹកនាំដោយអតីតអ្នកស្មោះស្ម័គ្រនឹងលោក ណេតាន់ យ៉ាហ៊ូ គឺលោក ណាហ្វតាលី បេណេត អាចនឹងក្លាយជាគណបក្សដ៏មានឥទ្ធិពលមួយ នៅក្នុងរបត់នយោបាយអ៊ីស្រាអែល។ លោក បេណេត បាននិយាយក្នុងសេចក្តីថ្លែងការណ៍ ក្រោយគេចុះផ្សាយលទ្ធផលការស្ទង់មតិក្រោយការបោះឆ្នោតថា លោកនឹងធ្វើក្នុងបុព្វហេតុល្អសម្រាប់រដ្ឋអ៊ីស្រាអែល។ លោកបន្តថា លោកនិយាយប្រាប់លោក ណេតាន់ យ៉ាហ៊ូ ថា គណបក្ស Yamina នឹងរង់ចាំលទ្ធផលផ្ដាច់ព្រ័ត្រ មុនពេលសម្រេចចិត្តលើជំហានបន្ទាប់របស់ខ្លួន។
គណៈកម្មាធិការកណ្ដាលរៀបចំការបោះឆ្នោតអ៊ីស្រាអែល មិនរំពឹងថានឹងអាចរាប់សន្លឹកអស់នៅមុនរសៀលថ្ងៃពុធនោះទេ ដោយសារតែវិធានការរឹតត្បឹតជំងឺ COVID-19។ ដោយឡែក លោក ណេតាន់ យ៉ាហ៊ូ បានសរសេរតាម Twitter កាលពីល្ងាចថ្ងៃអង្គារថា អរគុណពលរដ្ឋអ៊ីស្រាអែល។ អ្នករាល់គ្នាបានផ្តល់ជ័យជំនះដ៏ធំធេងដល់ក្រុមស្តាំនិយម និងគណបក្ស Likud ក្រោមការដឹកនាំរបស់លោក ។ Likud គឺជាគណបក្សធំបំផុតមកទល់នឹងពេលនេះ។ លោកបន្តថា ច្បាស់ណាស់ថា ពលរដ្ឋអ៊ីស្រាអែលគឺជាក្រុមស្ដាំនិយម និងចង់បានរដ្ឋាភិបាលស្ដាំនិយម ដែលខ្លាំងក្លា និងមានស្ថិរភាព៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
