កំពង់ស្ពឺ ៖ ឯកឧត្តម ហ៊ុន ម៉ានី អនុប្រធានទី១ ក្រុមការងារចុះជួយខេត្តកំពង់ស្ពឺ បានបញ្ជាក់ថា ឯកសារដែលត្រូវកាន់យកទៅបោះឆ្នោត មានតែពីរគត់ គឺអត្តសញ្ញាណប័ណ្ណសញ្ញាតិខ្មែរ (អ.ខ) ឬឯកសារបញ្ជាក់អត្តសញ្ញាណបម្រើឲ្យការបោះឆ្នោត (ឯ. អ)។

​ការថ្លែងរបស់ឯកឧត្តម ហ៊ុន ម៉ានី អនុប្រធានទី១ ក្រុមការងារចុះជួយខេត្តកំពង់ស្ពឺ យ៉ាងដូច្នេះ នាឱកាសបន្តជួបជាមួយក្រុមគ្រួសារគណបក្សប្រជាជនកម្ពុជា ក្នុងពេលយុទ្ធនាការឃោសនាបោះឆ្នោតជ្រើសតាំងក្រុមប្រឹក្សាឃុំ-សង្កាត់ អាណតិ្តទី៥ ឆ្នាំ២០២២ នៅក្នុងឃុំធម្មតាអរ ស្រុកសំរោងទង ខេត្តកំពង់ស្ពឺ នាថ្ងៃទី៣០ ខែឧសភា ឆ្នាំ២០២២នេះ ដើម្បីកំណត់ភាពឈ្នះបន្ថែមទៀត ហើយធ្វើយ៉ាងណាចូលរួមបោះឆ្នោតស្របតាមគោលការណែនាំរបស់គ.ជ.ប។ 

ឯកឧត្តម ហ៊ុន ម៉ានី បានរំឮកពីឯកសារដែលបងប្អូន ប្រជាពលរដ្ឋ ត្រូវភ្ជាប់ទៅបោះឆ្នោតថា ឯកសារដែលត្រូវកាន់យកទៅបោះឆ្នោត មានតែពីរគត់ គឺអត្តសញ្ញាណប័ណ្ណសញ្ញាតិខ្មែរ (អ.ខ) ឬឯកសារបញ្ជាក់អត្តសញ្ញាណបម្រើឲ្យការបោះឆ្នោត (ឯ. អ)។ ឯកសារ ឬប័ណ្ណព័ត៌មានផ្សេងៗទៀតមិនអាចប្រើប្រាស់ដើម្បីបោះឆ្នោតបានឡើយ។

ក្នុងជំនួបនាពេលព្រឹកនេះ ឯកឧត្តម ហ៊ុន ម៉ានី ក៏បានបញ្ជាក់ផងដែរថា សន្លឹកឆ្នោតមួយសន្លឹករបស់លោកយាយ លោកតា ពុក ម៉ែ មា មីង បងប្អូន ជូនគណបក្សប្រជាជនកម្ពុជា គឺជាការផ្តល់ឱកាសជូនដល់ខ្លួនឯង ក្នុងការចូលរួមក្នុងបេសកកម្ម អភិវឌ្ឍប្រទេសជាតិ ដែលកំពុងធ្វើដំណើរយ៉ាងស្ទុះស្ទារ ក្រោមម្លប់ដ៏ត្រជាក់ត្រជុំ នៃសុខសន្តិភាព។ សន្លឹកឆ្នោតមួយសន្លឹកនោះ ក៏នឹងអាចធានាបាននូវអនាគតដ៏ស្រស់បំព្រងរបស់កូនចៅជំនាន់ក្រោយៗរបស់យើងជាបន្តទៀត។ នៅមិនប៉ុន្មានថ្ងៃទៀតនោះទេ ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ឆ្នាំ២០២២ នឹងមកដល់ គឺនៅថ្ងៃទី៥ ខែមិថុនា ឆ្នាំ២០២២។ ការបោះឆ្នោតនឹងត្រូវបានប្រព្រឹត្តទៅចាប់ពីម៉ោង៧ព្រឹក រហូតដល់ម៉ោង៣រសៀល។ 

ឆ្លៀតក្នុងឱកាសនៃជំនួបនាព្រឹកនេះ ឯកឧត្តម បានអញ្ជើញលោកយាយ លោកតា ពុក ម៉ែ មា មីង បងប្អូនទៅបោះឆ្នោត ឲ្យបានគ្រប់ៗគ្នាជូនគណបក្សប្រជាជនកម្ពុជា ដើម្បីចូលរួមអភិវឌ្ឍប្រទេសជាតិឆ្ពោះទៅមុខកាន់តែរីកចម្រើន ក៏ដូចជាធានាបាននូវអនាគតដែលកាន់តែល្អប្រសើរដល់កូនចៅជំនាន់ក្រោយៗ៕​ អត្ថបទ ៖ រដ្ឋា