វាយកូនបាល់៖ ការប្រកួតកីឡាវាយកូនបាល់ដណ្ដើមពានរង្វាន់ ទេព ឃុនណា លើកទី២៧ ឆ្នាំ២០២២ ដែលរៀបចំដោយសហព័ន្ធកីឡាវាយកូនបាល់កម្ពុជាបានបញ្ចប់ដោយជោគជ័យ ក្រោយដំណើរការប្រកួតអស់រយៈពេល ៥ថ្ងៃកាលពីសប្ដាហ៍កន្លងទៅនៅពហុកីឡដ្ឋានជាតិ (ស្ដាតអូឡាំពិក)។
លោក ទេព រិទ្ធីវិទ្ធ អគ្គលេខាធិការសហព័ន្ធកីឡាវាយកូនបាល់កម្ពុជាបានគូសបញ្ជាក់ថា ការរៀបចំព្រឹត្តិការណ៍ប្រចាំឆ្នាំនេះគឺដើម្បីរំលឹកដល់ឪពុកបង្កើតរបស់ខ្លួនគឺលោក ទេព ឃុនណា អតីតកីឡាករវាយកូនបាល់កម្ពុជាមួយរូបក្នុងអំឡុងឆ្នាំ១៩៦០ ពោលគឺដើម្បីបំពេញបំណងចុងក្រោយដែលលោកជាបុគ្គលមួយរូបចូលចិត្ត និងស្រលាញ់កីឡាវាយកូនបាល់បំផុត ជាក់ស្ដែងទោះបីលោកបានចែកឋានទៅហើយ ក៏លោកបានផ្ដាំផ្ញើរឲ្យកូនប្រុសបន្តនៅឆន្ទៈរួមចំណែកក្នុងការអភិវឌ្ឍវិស័យកីឡាវាយកូនបាល់ដែរ។
អគ្គលេខាធិការសហព័ន្ធដដែលបន្ដថា ការប្រកួតប្រចាំឆ្នាំនេះ ក្រៅពីឧទ្ទិសជូនវិញ្ញាណក្ខន្ធឪពុករបស់ខ្លួន លោកថា ការប្រកួតនេះក៏ជាការផ្តល់ឱកាសឲ្យកីឡាករ-កីឡាការិនីទទួលបានការប្រកួតប្រជែងបន្ថែមដើម្បីពង្រឹងបទពិសោធន៍ បច្ចេកទេស និងបំផុសវិស័យកីឡាវាយកូនបាល់ឲ្យកាន់តែផុសផុលនៅកម្ពុជា។ សម្រាប់ការប្រកួតកីឡាវាយកូនបាល់ពានរង្វាន់ ទេព ឃុនណា លើកទី២៧ ឆ្នាំ២០២២ នេះបានរៀបចំការប្រកួតលើ ២វិញ្ញាសាគឺការប្រកួតឯកក្តជន និងវាយគូរ ខណៈជាលទ្ធផលចំណាត់ថ្នាក់លេខ១ វិញ្ញាសាឯកត្តជនបានទៅលើកីឡាករ ឡុង សំនៀង និងវិញ្ញាសាវាយគូរចំណាត់ថ្នាក់លេខ១ បានទៅកីឡាករ ឪ សារិទ្ធ និងកីឡាករ យឿន សុធឿន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
