ភ្នំពេញ៖ ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ នាព្រឹកថ្ងៃទី៣១ ខែឧសភា ឆ្នាំ២០២២នេះ បានអំពាវនាវដល់បងប្អូនប្រជាពលរដ្ឋ ដែលបានចាក់វ៉ាក់សាំងបង្ការ​ជំងឺកូវីដ១៩ ​ដូសទី៣រួច ​សូមរួសរាន់មចាក់វ៉ាក់សាំងដូសទី៤ ​ដែលគិតមកដល់ព្រឹកនេះ មាន​ពលរដ្ឋដែលបានទទួលវ៉ាក់សាំងដូសទី៤រួច​ បានចំនួនតែ៧៥ភាគរយ។

ឯកឧត្តម វេជ្ជបណ្ឌិត ងី មានហេង បានបន្តទៀតថា សព្វថ្ងៃប្រជាពលរដ្ឋរស់នៅក្នុងរាជធានីភ្នំពេញ អាយុចាប់ពី១៨ឆ្នាំឡើង ​បានចាក់វ៉ាក់សាំងបង្ការជំងឺកូវីដ-១៩ ​ដូសជំរុញទី៣ ​បានចំនួន១២១% និងដូសជំរុញទី៤ ​បានចំនួន៧៥%​ ដូចនេះសូមអំពាវនាវដល់ប្រជាពលរដ្ឋ មកចាក់វ៉ាក់សាំង​បង្ការ​ជំងឺកូវីដ១៩ បន្ថែមនូវដូសជំរុញទី៤ ឲ្យបានគ្រប់ចំនួនតាមកាលកំណត់របស់ក្រសួងសុខាភិបាល។

ឯកឧត្តម ប្រធានមនី្ទរសុខាភិបាលរាជធានីភ្នំពេញ បានបញ្ជាក់ទៀតថា ​កុមារអាយុ៦ឆ្នាំ រហូត​ដល់ក្រោម១២ឆ្នាំ បានមកទទួលចាក់វ៉ាក់សាំងបង្ការជំងឺកូវីដ-១៩​ ដូសទី២ ​បានចំនួន១១១% រីឯដូសទី៣ ​ទើបតែបានចំនួន៦៣%។

សូមឲ្យសិស្សានុសិស្សអាយុ៦ឆ្នាំ រហូតដល់ក្រោម១២ឆ្នាំទាំងអស់ ដែលមិនទាន់បានចាក់​វ៉ាក់សាំង​បង្ការជំងឺកូវីដ-១៩ ដូសទី៣ ​សូមរួសរាន់មកចាក់វ៉ាក់សាំងដូសទី៣ ​ឲ្យបានគ្រប់ៗគ្នា ដើម្បី​បង្កើន​ភាពស៊ាំក្នុងសហគមន៍ ​ទប់ទល់នឹងមេរោគកូវីដ-១៩​ ដែលនៅជិតផ្ទះបងប្អូនប្រជាពលរដ្ឋរស់នៅ និងមនី្ទរពេទ្យបង្អែក និងមណ្ឌលសុខភាព ជាង៤០ទីតាំង៕

អត្ថបទ៖រដ្ឋា