កណ្ដាល៖ ពលរដ្ឋបន្តនាំគ្នាទៅចាក់វ៉ាក់សាំងការពារកូវីដ១៩ ដូសជម្រុញជាហូរហែរៀងរាល់ថ្ងៃ ទោះបីពុំមានករណីឆ្លងរាតត្បាតថ្មីនៃមេរោគកូវីដ១៩យ៉ាងណាក៏ដោយ។

ប្រជាពលរដ្ឋមួយចំនួន ក្រុងតាខ្មៅ ជាប់ជាយរាជធានីភ្នំពេញ ថ្លែងនៅថ្ងៃទី៣១ ខែឧសភានេះថា ដោយសារការគិតគូរដ៏ត្រឹមត្រូវរបស់ប្រមុខថ្នាក់ដឹកនាំរាជរដ្ឋាភិបាល ក្នុងការរូតរះ​ស្វែងរកវ៉ាក់សាំង​កូវីដ១៩ មកចាក់ស្រោចជូនប្រជាពលរដ្ឋនៅទូទាំងប្រទេស ទើបធ្វើអោយ​ស្ថានការណ៍ការ​រាតត្បាត​មេរោគកូវីដ១៩ ការស្លាប់និងការឆ្លងថ្មីធ្លាក់ដល់ចំណុចសូន្យ និងបានអនុញាត​អោយ​ប្រជាពលរដ្ឋ​ចេញ​ប្រកបរបរអាជីវកម្ម ​ធ្វើការជួបជុំដោយសេរី​ និងអាចចូលរួមយុទ្ធនាការឃោសនាបោះឆ្នោត ប្រកបដោយ​សុវត្ថិភាព និងមានភាពសប្បាយរីករាយ។

បើតាមវេជ្ជបណ្ឌិត លី មករា ប្រធានមន្ទីរពេទ្យជ័យជំនះ បានថ្លែងថា ទោះយ៉ាងណាក៏ដោយ សម្រាប់​បណ្តាពលរដ្ឋដែលបានចាក់វ៉ាក់សាំងកូវីដ១៩ ​បានចំនួន២ដូសរួចហើយ​ ក្នុងរយៈពេល៤ខែ ទៅ៦ខែបន្ទាប់​ វ៉ាក់សាំងកូវីដ១៩ដែលបានចាក់នៅក្នុងខ្លួនយើង ​គឺវា​នឹង​ធ្វើការ​ថមថយ​ប្រសិទ្ធភាព​ប្រព័ន្ធភាពស៊ាំ​នៅ​ក្នុង​យើងខ្លួន ​ដែល​បញ្ហានេះ​ គឺ​ទាមទារ​ឱ្យ​បណ្តាពលរដ្ឋដែលបាន​ចាក់វ៉ាក់សាំង​បានចំនួន២ដូស ឬ៣ដូស ឬ៤ដូសរួចហើយ​ ត្រូវនាំគ្នាទៅចាក់វ៉ាក់សាំង​ដូសជម្រុញ​ម្តងទៀត​នៅខែទី៤ ក្រោយការចាក់។

សូមបញ្ជាក់ថា គ្រប់បណ្តាមន្ទីរពេទ្យ​ និងគោលដៅចាក់វ៉ាក់សាំង​ការពារកូវីដ១៩ទាំង​អស់​នៅទូទាំង​ខេត្តកណ្តាល នឹង ផ្អាក​ការចាក់វ៉ាក់សាំងកូវីដ ១៩ រយៈពេល ៣ ថ្ងៃ ចាប់ពីថ្ងៃទី៤ ​ដល់ថ្ងៃទី៦ ខែ​មិថុនានេះ ​ដើម្បីសម្រួល​ដល់ប្រជាពលរដ្ឋ ​និងក្រុមការងារចាក់វ៉ាក់សាំង​ទាំង​អស់ឱ្យទៅ​ចូលរួម​បោះឆ្នោតជ្រើសរើសក្រុមប្រឹក្សាឃុំសង្កាត់ដែលត្រូវប្រព្រឹត្តទៅនៅថ្ងៃទី ៥ ​ខែមិថុនា ​ខាងមុខនេះ តាមការសេចក្តីជូនដំណឹងរបស់គណៈកម្មការចំពោះកិច្ចចាក់វ៉ាក់សាំងកូវីដ ១៩ នៃ​ក្រសួង​សុខាភិបាល៕អត្ថបទ៖ ស៊ុម សុខជា