ភ្នំពេញ៖ នៅរសៀលថ្ងៃទី៣១ ខែឧសភានេះ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានក្រុមការងារ “អភិវឌ្ឍន៍ និងគ្រប់គ្រងក្របខ័ណ្ឌអនុវត្តការជំរុញបង្កើនការងារថែទាំសុខភាពបឋម” ហៅកាត់ថា (ក.ជ.ថ.ស.ប) បានពិភាក្សាការងារជាមួយលោកស្រី លី អាយលែន តំណាងអង្គការសុខភាពពិភពលោក (WHO) ប្រចាំកម្ពុជា ព្រមទាំងសហការី និងលោកស្រីវេជ្ជបណ្ឌិត ហ្វារូហ្វ ហ្វូយូហ្សាត តំណាងអង្គការយូនីសែហ្វ (UNICEF) ប្រចាំកម្ពុជា ព្រមទាំងសហការី ។

ជំនួបកិច្ចពិភាក្សានេះ ធ្វើឡើងនៅទីស្តីការក្រសួងសុខាភិបាល ក្នុងគោលបំណង​បង្ហាញ​អំពី​គំនិតផ្តួចផ្តើម ​និងដំណើរការអភិវឌ្ឍ​ក្របខ័ណ្ឌអនុវត្តការជំរុញបង្កើនការថែទាំសុខភាពបឋម ព្រមទាំង​ស្វែងរកនូវចំណុចរួមគ្នាសម្រាប់ធ្វើកិច្ចសហប្រតិបត្តិការជាមួយក្រុមការងារ ក.ជ.ថ.ស.ប របស់ក្រសួងសុខាភិបាល អង្គការសុខភាពពិភពលោក​ និងអង្គការយូនីសែហ្វ ក្នុងការអនុវត្តន៍​ក្របខ័ណ្ឌ​ជំរុញការថែទាំសុខភាពបឋមនៅកម្ពុជា ​ដោយផ្អែកលើលទ្ធផល​បានមកពីការអភិវឌ្ឍ​ក្របខ័ណ្ឌអនុវត្តសម្រាប់ជំរុញបង្កើនការងារថែទាំ​សុខភាពបឋម ដែលនឹង​ត្រូវធ្វើឡើង​ដោយ​ក្រុមការងារខាងលើនេះ ​ដោយមានការជួយគាំទ្រផ្នែកបច្ចេកទេស និងថវិកា​មួយចំនួនពីអង្គការសុខភាពពិភពលោក៕