ភ្នំពេញ ៖ ក្នុងខែឧសភា ឆ្នាំ២០២២នេះ មានកុមារឈឺចំនួន៥២០៤៥នាក់ ត្រូវបានមកទទួលការពិនិត្យ ព្យាបាលនៅផ្នែកពិគ្រោះជំងឺក្រៅក្នុងមនី្ទរពេទ្យគន្ធបុប្ជា, នេះបើយោងតាមសេចកី្តប្រកាសព័ត៌មាន ដែលBTV ព័ត៌មាន ទទួលបាននាថ្ងៃទី៣១ ខែឧសភា ឆ្នាំ២០២២។

ក្នុងនោះកុមារមានជំងឺធ្ងន់ៗ ចំនួន៩៩០៦នាក់ ដាក់ឲ្យសម្រាកព្យាបាលនៅក្នុងមនី្ទរពេទ្យ, កុមារមានជំងឺគ្រុនឈាម ចំនួន១៦៥នាក់ បានព្យាបាលនៅក្នុងមនី្ទរពេទ្យ, កុមារចំនួន១៨៨៦នាក់ ត្រូវបានទទួលការវះកាត់ និងវះកាត់បេះដូង និងភ្ជិតប្រយោងបេះដូងតាមសរសៃឈាម នៅមនី្ទរពេទ្យគន្ធបុប្ជាភ្នំពេញ និងសៀមរាប មានចំនួន១០១នាក់។ នៅផ្នែកសម្ភព នៃមនី្ទរពេទ្យជ័យវរ្ម័នទី៧ (គន្ធបុប្ជាទី៣) ស្រី្តមានផ្ទៃពោះចំនួន៧០៣៨នាក់ បានមកពិនិត្យតាមដានផ្ទៃពោះ និងព្យាបាល នៅក្នុងផ្នែកពិគ្រោះជំងឺក្រៅនៃមនី្ទរសម្ភព និងសម្រាលកូនបានចំនួន១៥១៦នាក់។ រាល់ការព្យាបាលទាំងអស់ គឺឥតគិតថ្លៃ សម្រាប់គ្រប់ៗគ្នា ដោយពុំមានការរើសអើង។

សូមបញ្ជាក់ផងដែរថា មន្ទីរពេទ្យគន្ធបុប្ផាកម្ពុជា បានបង្កើតឡើងវិញនៅឆ្នាំ១៩៩២ និងបច្ចុប្បន្នមាន វេជ្ជបណ្ឌិត គិលានុបដ្ឋាកគិលានុបដ្ឋាយិកា និងបុគ្គលិកជាជនជាតិខ្មែរ ប្រកបដោយវិជ្ជាជីវៈជាង ២៥០០នាក់។ ជាមធ្យមប្រើប្រាស់ថវិកាប្រមាណ ៤០លានដុល្លារអាមេរិកក្នុង១ឆ្នាំៗ។ មួយថ្ងៃៗមន្ទីរពេទ្យគន្ធបុប្ផាទាំង៥ទីតាំង នៅព្រះរាជាណាចក្រកម្ពុជា បានជួយកុមារជាង២ពាន់នាក់ និងតាំងពីបង្កើតឡើងវិញមកដល់បច្ចុប្បន្ន, មន្ទីរពេទ្យគន្ធបុប្ផាបានជួយសង្រ្គោះអាយុជីវិតកុមារសរុបជាង១៧លានករណីហើយ។ មនី្ទរពេទ្យគន្ធបុប្ជា ចូលរួមយ៉ាងសកម្មក្នុងការផ្តល់សេវាសុខាភិបាល ដល់កុមារ និងស្រី្តមានផ្ទៃពោះមកពីគ្រប់មជ្ឈដ្ឋានដោយឥតគិតថ្លៃ។ និរន្តរភាព នៃកិច្ចដំណើរការរបស់មនី្ទរពេទ្យកុមារគន្ធបុប្ជានេះ ដើរតួនាទីយ៉ាងសំខាន់ក្នុងការបម្រើដល់គោលនយោបាយលើកកម្ពស់សុខុមាលភាពសង្គម និងរួមចំណែកកាត់បន្ថយអត្រាមរណភាព មាតា និងទារក ដោយពង្រឹង និងពង្រីកប្រសិទ្ធភាព និងស័កិ្តសិទិ្ធភាពសេវាសុខាភិបាល។ រាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់ និងការចង្អុលបង្ហាញជាប្រចាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា បានប្តេជ្ញាធានានិរន្តរភាពរបស់មនី្ទរពេទ្យគន្ធបុប្ជា ដែលនេះសបញ្ជាក់ឲ្យឃើញពីការយកចិត្តទុកដាក់ខ្ពស់ក្នុងការលើកស្ទួយសុខុមាលភាព និងសមធម៌សង្គម ដូចមានចង្អុលបង្ហាញក្នុង ក្របខណ្ឌគោលនយោបាយជាតិគាំពារសង្គម ឆ្នាំ២០១៦-២០២៥៕​ អត្ថបទ ៖ រដ្ឋា