​អ៊ុយ​ក្រែ​ន៖ អ៊ុយ​ក្រែ​ន​បាន​និយាយ​កាលពី​ថ្ងៃ​អង្គា​រថា ប្រទេស​រុស្ស៊ី​បាន​ដណ្ដើម​គ្រប់គ្រង​ភាគច្រើន​នៃ​ទីក្រុង​ឧស្សាហកម្ម Sievierodonetsk ភាគ​ខាងកើត បង្ក​ការ​បំផ្លិចបំផ្លាញ​ធ្ងន់ធ្ងរ​ដល់​ដែនដី​ដែល​ខ្លួន​ដណ្ដើម​បាន​ ដែល​ក្រុង Moscow បាន​បង្កើត​ជា​គោលបំណង​ដ៏​សំខាន់​នៃ​ការ​លុកលុយ​របស់​ខ្លួន​។​

​ការវាយប្រហារ​គ្រប់​ច្រក​របស់​រុស្ស៊ី​លើ​ទីក្រុង​ក្នុង​ខេត្ត Luhansk របស់​អ៊ុយ​ក្រែ​ន​ត្រូវ​បាន​ឆ្លើយតប​ដ៏​ខ្លាំងក្លា​ពី​ក្រុម​អ្នកតស៊ូ​អ៊ុយ​ក្រែ​ន​។ ក្រុម​បំបែក​ខ្លួន​ដែល​គាំទ្រ​ដោយ​រុស្ស៊ី​នៅ​ទីក្រុង Luhansk បាន​ទទួល​ស្គាល់​ថា ​ការ​ដណ្តើម​យក​ទីក្រុង​នេះ​ចំណាយ​ពេល​យូរ​ជាង​ការ​រំពឹង​ទុក ទោះបីជា​មានការ​វាយ​ប្រហា​រ​ថ្មើរជើង​យ៉ាង​សន្ធាប់​បំផុត​ ក្នុងចំណោម​ការ​វាយ​ប្រហា​រ​ដ៏​ខ្លាំងក្លា​នានា​នៃ​សង្គ្រាម​រយៈ​ពេល​បី​ខែ​ក៏ដោយ​។​ ​បន្ទាប់ពី​បរាជ័យ​ក្នុង​ការ​ដណ្តើម​យក​រដ្ឋ​ធានី Kyiv របស់​អ៊ុយ​ក្រែ​ន និង​ត្រូវ​បាន​វាយ​រុញ​ចេញពី​ភាគ​ខាងជើង​អ៊ុយ​ក្រែ​ន ជ័យជំនះ​របស់​រុស្ស៊ី​នៅ​ទីក្រុង Sievierodonetsk និង​ឆ្លងកាត់​ទន្លេ Siverskyi Donets ក្នុង​ទីក្រុង Lysychansk នឹង​នាំមក​នូវ​ការគ្រប់គ្រង​ពេញលេញ​នៃ​តំបន់ Luhansk ជា​ខេត្ត​មួយ​ក្នុងចំណោម​ខេត្ត ២​នៅ​ភាគ​ខាងកើត ដែល​ទីក្រុង Moscow បាន​អះអាង​ជំនួស​ក្រុម​ផ្តាច់​ខ្លួន​។​

​ក្រុម​អ្នក​វិភាគ​យោធា​លោក​ខាង​លិច​បាន​និយាយ​ថា ​ទីក្រុង ​Moscow​ បាន​ដក​កម្លាំង​ទ័ព ​និង​យុទ្ធោបករណ៍​ចេញពី​ផ្នែក​ផ្សេងទៀត​នៃ​សមរភូមិ​ជួរមុខ​ភាគ​ខាងកើត​ ដើម្បី​ផ្តោត​ទៅ​លើ​ទីក្រុង Sievierodonetsk ដោយ​សង្ឃឹមថា ​ការ​វាយ​លុក​ដ៏​ធំ​នឹង​ដណ្ដើម​បាន​តំបន់​ជុំវិញ​ខេត្ត Luhansk សម្រាប់​សង្គ្រាម​តំណាង​របស់​ក្រុម​ផ្ដាច់ខ្លួន​គាំទ្រ​ដោយ​រុស្ស៊ី។ អភិបាល​តំបន់ Luhansk លោក Serhiy Gaidai បាន​និយាយ​ថា ហេដ្ឋារចនាសម្ព័ន្ធ​សំខាន់ៗ​ស្ទើរតែ​ទាំងអស់​នៅ​ក្នុង​ទីក្រុង Sievierodonetsk ត្រូវ​បាន​បំផ្លាញ ហើយ ៦០%​ នៃ​អគារ​លំនៅឋាន​បាន​រង​ការខូចខាត​ដែល​មិន​អាច​ជួសជុល​បាន៕

អត្ថបទ៖ សុខមាន