ភ្នំពេញ៖ ឯកឧត្តម ហ៊ុន ម៉ានី តំណាងរាស្រ្តខេត្តកំពង់ស្ពឺ ជាមួយនឹងការផ្ញើសារដល់កុមារ ដែលឯកឧត្តមហៅថាកូនៗ ក្នុងឱកាសទិវាកុមារអន្តរជាតិ បានភ្ជាប់នូវខ្លឹមសារផ្សេងៗ បង្ហាញពីមេរៀន នៃការឆ្លងកាត់នូវវិបត្តិកូវីដ-១៩ លើទំព័រហ្វេសប៊ុកផ្លូវការ នាព្រឹកថ្ងៃទី០១ ខែមិថុនា ឆ្នាំ២០២២នេះ។

ក្នុងចំណោមខ្លឹមសារដ៏វែងនោះ ឯកឧត្តម ហ៊ុន ម៉ានី បានបញ្ជាក់ថា ក្នុងដំណាក់កាល ០២ឆ្នាំ នៃការវាយប្រហារមេរោគកូវីដ-១៩ គឺជាអ្វី ដែលមិនអាចបំភ្លេចបាន។

ទោះយ៉ាងណាក្ដី យើងមិន​អាច​បំភ្លេចបាននូវអ្វីដែលបានកើតឡើងក្នុងដំណាក់កាល ០២ឆ្នាំ នៃ​ការវាយ​ប្រហារ​របស់​ជំងឺកូវីដ-១៩ ដ៏ធ្ងន់ធ្ងរ ​ក្នុងនោះ មុនវ៉ាក់សាំងបង្ការជំងឺកូវីដ-១៩ និងមុនមានភាពស៊ាំសហគមន៍​យើងគ្រប់ៗគ្នា ក្រុមគ្រួសារនីមួយៗ តែងតែគិតគូរបារម្ភថា តើជំងឺកូវីដ-១៩ នឹងអាចឆ្លងក្រុមគ្រួសាររបស់យើងទេ? ក្នុងនោះតើធ្វើយ៉ាងណាចំពោះគ្រួសារខ្លះដែលមានសមាជិកឆ្លង ​ហើយគ្រួសារខ្លះទៀត ក៏បាន​បាត់បង់​សមាជិកជាទីស្រឡាញ់របស់ខ្លួនដោយជំងឺដ៏កាចសាហាវនេះ។

ទន្ទឹមនឹងការបង្ហាញពីសោកនាដកម្ម និង​វិបត្តិដែល​ឆ្លុះបញ្ចាំង​ពី​ការលំបាករួម​ដែលសង្គម​បាន​ឆ្លងកាត់ ឯកឧត្តម ហ៊ុន ម៉ានី ក៏បានរំលឹកពីភាពជោគជ័យខ្ពស់ របស់រាជរដ្ឋាភិបាលក្នុងការការពារ​អាយុជីវិត ប្រជាពលរដ្ឋកម្ពុជា ដោយទប់ស្កាត់បានការស្លាប់ពីជំងឺកូវីដ-១៩​ ជាអតិបរមា។ ចំពោះកម្ពុជា សមត្ថភាព និងការគ្រប់គ្រងជំងឺកូវីដ-១៩ ​អាចចែកចេញជា ២ ​ដំណាក់កាល៖ ១.) ទប់ស្កាត់​ការរីករាលដាល ការពារអាយុជីវិតរបស់ប្រជាជនក្នុងអំឡុងពេល​ដែលរាជរដ្ឋាភិបាល មិនមាន​វ៉ាក់សាំង និង ២.) ក្នុងពេលមានវ៉ាក់សាំង ​រាជរដ្ឋាភិបាលអនុវត្តយុទ្ធសាស្រ្ត ផ្ការីក ចាក់ជូន​ប្រជាពលរដ្ឋ ​ដោយឥតគិតថ្លៃ ​រហូតបង្កើតបានភាពស៊ាំ​ក្នុងសហគមន៍ ​និងបើកសង្គម-សេដ្ឋកិច្ច ពេញលេញ​ឡើងវិញ​ ដោយឈានជាបន្តបន្ទាប់មករកប្រក្រតីភាពនៃជីវភាពប្រចាំថ្ងៃ។

ឯកឧត្តម ហ៊ុន ម៉ានី​ ក៏មិនភ្លេចក្នុងការបង្ហាញពីការគាំទ្រ ​នូវប្រសាសន៍​ដ៏ខ្ពង់ខ្ពស់​ជាទី​បំផុត​របស់​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ​ក្នុងការថ្លែង​អំណរគុណ​ប្រជាពលរដ្ឋ មន្រ្តីរាជការ ​កងកម្លាំងប្រដាប់អាវុធគ្រប់ប្រភេទ ​អាជ្ញាធរដែនដីគ្រប់ជាន់ថ្នាក់ ​វិស័យឯកជន ជា​ពិសេសលោកគ្រូ អ្នកគ្រូ ​លោកគ្រូពេទ្យ អ្នកគ្រូពេទ្យគ្រប់ៗរូប​ ក្នុងការ​សហការ ​ជឿជាក់ និង​ចូលរួម​ជាមួយរាជរដ្ឋាភិបាលក្នុងដំណាក់កាលលំបាកនេះ៕ អត្ថបទ៖ រដ្ឋា