ត្បូងឃ្មុំ៖ គិតត្រឹម​ល្ងាចថ្ងៃទី​២៤ ខែមីនានេះ អ្នកប៉ះពាល់ដោយផ្ទាល់ និងប្រយោលសរុបជាង ១០០នាក់ ក្នុងខេត្តឃ្មុំត្បូងឃ្មុំ ដែលជាប់ពាក់ព័ន្ធជាមួយអ្នកវិជ្ជមានកូវីដ នៅក្នុងស្រុកមេមត់ ខេត្តត្បូងឃ្មុំ​។

លោកវិជ្ជបណ្ឌិត កែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំ បានឲ្យដឹងថា បន្ទាប់ពីមានមន្ត្រីនគរបាលម្នាក់ មានវិជ្ជមានកូវីដ១៩ រដ្ឋបាលខេត្តត្បូងឃ្មុំ ចេញសេចក្ដីប្រកាសព័ត៌មានផ្អាកជាបណ្ដោះអាសន្ន នូវការចរាចរណ៍ចេញ-ចូល ចំពោះប្រជាពលរដ្ឋរស់នៅក្នុងបណ្ដាទីតាំងមួយចំនួន ស្ថិតនៅសង្កាត់សួង ក្រុងសួង និងឃុំដារ ឃុំមេមត់ ស្រុកមេមត់ ខេត្តត្បូងឃ្មុំ។

ដោយឡែកសម្រាប់ផ្សារសួង ផ្សារមេមត់ ពុំមានការបិទឬផ្អាកអាជីវកម្ម របស់ពលរដ្ឋឡើយ ពោល គឺអាជ្ញាធរ​ចុះសួនាំព័ត៌មានពលរដ្ឋដែលសង្ស័យជាប់ពាក់ព័ន្ធជាមួយអ្នកកូវីដ១៩ ដើម្បីរឹតបន្តឹងសុខសុវត្ថិភាព និងតាមដានលើបញ្ហាសុខុមាលភាព អ្នកដែលជាប់ពាក់ព័ន្ធមន្ត្រីនគរបាលម្នាក់នោះ។ ដោយគិតត្រឹម​ល្ងាចថ្ងៃទី២៤ ខែមីនានេះ អ្នកដែលប៉ះពាល់ដោយផ្ទាល់ និងប្រយោលជាមួយមន្ត្រីនរគបាលឋានៈនាយរងការិយាល័យសេដ្ឋកិច្ច នៃស្នងការខេត្តខេត្តត្បូងឃ្មុំ សរុបប្រមាណ ១៣០នាក់។

លោកវិជ្ជបណ្ឌិត កែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំ បានអំពាវនាវ​ដល់បងប្អូនប្រជាពលរដ្ឋដែលជាប់ពាក់ព័ន្ធ និងធ្លាប់ប្រាស្រ័យទាក់ទងជាមួយ​មន្ត្រីនគរបាល មានផ្ទុកកូវីដ១៩ ត្រូវសហការជាមួយ​ក្រុមការងារគ្រូពេទ្យ ក្នុងទប់ស្កាត់ការឆ្លងរីករាលដាលជំងឺ​មួយនេះ និងត្រូវចូលរួម​មកធ្វើចត្តាឡីស័ក តាមដានសុខភាពជាប្រចាំ និងត្រូវរាយការណ៍មកសមត្ថកិច្ច និងក្រុមគ្រូពេទ្យដែលប្រចាំការនៅទីនោះ។

លោកវិជ្ជបណ្ឌិត កែវ វណ្ណៈ បានបន្ថែមទៀតថា សូមស្នើសុំដល់បងប្អូនប្រជាពលរដ្ឋ ត្រូវអនុវត្តន៍តាមសេចក្តីណែនាំរបស់ក្រសួងសុខាភិបាល​បានចាំបាច់ត្រូវរក្សាសុខភាពរបស់ខ្លួន និងចូលរួមអនុវត្តន៍រស់នៅតាមគន្លងថ្មី ​ដោយអនាម័យទៅតាមក្រសួងសុខាភិបាល គឺចាំបាច់បំផុតត្រូវតែបន្តអនុវត្តជាប្រចាំ ជាពិសេសអនុវត្តតាម​វិធាន ៣កុំ និង៣ការពារ របស់រាជរដ្ឋាភិបាល៕ អត្ថបទ៖ ថុង សីហា