​បាល់ទាត់៖ ​ក្រុមបាល់ទាត់​ជំរើសជាតិ​អង់គ្លេស​ នឹង​ជួប​ជាមួយ​ក្រុម​ម្ចាស់ផ្ទះ​ហុង​គ្រី​នៅ​ទីក្រុង Budapest ថ្ងៃ​សៅរ៍​នេះ​ ដែល​នឹង​មាន​អ្នកគាំទ្រ​ចូល​ទស្សនា​យ៉ាងហោចណាស់ ៣ម៉ឺន​នាក់ ទោះបី​ហុង​គ្រី​ជាប់​បម្រាម​ប្រកួត​បិទទ្វារ​ក៏ដោយ​។

​​ហុង​គ្រី​ត្រូវ​បាន​ដាក់ពិន័យ​ឱ្យ​ប្រកួត​ដោយ​គ្មាន​អ្នកគាំទ្រ​ទស្សនា បន្ទាប់ពី​ទង្វើ​រើសអើង​ជាតិ​សាសន៍​ដោយ​អ្នកគាំទ្រ​របស់ខ្លួន​។ យ៉ាងណាក្តី សមាគម​បាល់ទាត់​ហុង​គ្រី​បាន​ប្រើប្រាស់​បទប្បញ្ញត្តិ​របស់ UEFA ដែល​អនុញ្ញាត​ឱ្យ​ក្មេងៗ​ចូល​ទស្សនា និង​មើល​ការខុសត្រូវ​ដោយ​មនុស្ស​ធំ​។ ​FA ហុង​គ្រី​បាន​បញ្ជាក់​ថា កុមារ​សរុប ៣ម៉ឺន​នាក់​បាន​ចុះឈ្មោះ​រួចរាល់​ដើម្បី​ចូល​ទស្សនា​ការប្រកួត​ថ្ងៃ​សៅរ៍​នេះ​។ ​​រំលឹក​ថា ​កាលពី​ខែមិថុនា ​ឆ្នាំ២០២១ កន្លងទៅ UEFA បានសំរេច​ដាក់ពិន័យ FA ហុង​គ្រី​ឱ្យ​ប្រកួត​ក្នុង​ដី​ដោយ​គ្មាន​អ្នកគាំទ្រ​ទស្សនា ៣ប្រកួត និង​ពិន័យ​ជា​ទឹកប្រាក់ ៨៥០០០ផោន បន្ទាប់ពី​ទង្វើ​រើស​អើង​ជាតិ​សាសន៍​ដោយ​អ្នកគាំទ្រ​របស់​ខ្លួន​នៅ​ព្រឹត្តិការណ៍ Euro 2020​។

​​មិនតែប៉ុណ្ណោះ​ហុង​គ្រី​ក៏​ជាប់​បម្រាម​របស់ FIFA ដែរ​ដោយ​តម្រូវ​ឱ្យ​ប្រកួត​ដោយ​គ្មាន​អ្នកទស្សនា ២​ប្រកួត​ផ្សេងទៀត​ ក្រោយ​ទង្វើ​រើស​អើ​ស​ដដែល​នេះ​ធ្វើឡើង ​ចំពោះ​កីឡាករ​របស់​អង់គ្លេស​អំឡុង​ការ​ប្រកួត​ជំ​រុះ World Cup កាលពី​ខែ​កញ្ញា​ឆ្នាំមុន​។ ​Raheem Sterling និង Jude Bellingham គឺជា​ជន​រង​គ្រោះ​នៃ​ការរើសអើង​នេះ​ដោយមាន​ការ​ស្រែក​ប្រមាថ ចោល​កាំជ្រួច និង​វត្ថុ​រឹង​ផ្សេងៗ​មក​លើ​ទីលាន​សំដៅ​កីឡាករ​ទាំង២ ​នៅ​កីឡដ្ឋាន Pukas Arena៕

​អត្ថបទ​៖​នាង សុភា​វុ​ធ