ព្រះសីហនុ៖ ទោះបីរូបសំណាកតោពីរ ជានិមត្ដិរូបខេត្ដព្រះសីហនុ និងធ្លាប់ល្បីកន្លងមកនោះ លែងសូវមានភាពទាក់ទាញដូចរូបសំណាកព្រះថោង នាងនាគ ដែលទើបនឹងត្រូវបានកសាងឡើងថ្មីៗនេះទៀតហើយ។ រូបសំណាកនេះ បាននិងកំពុងទាក់ទាញភ្ញៀវទេសចរឱ្យចូលទស្សានកម្សាន្ដជារៀងរាល់ថ្ងៃ។

ដើម្បីបង្កើនភាពទាក់ទាញភ្ញៀវទេសចរឱ្យទៅលេងកម្សាន្ដនៅខេត្ដព្រះសីហនុ រាជរដ្ឋាភិបាលកម្ពុជា និងរដ្ឋបាលខេត្ដ បានរៀបចំជួសជុលកែលម្អ និងស្ថាបនាហេដ្ឋារចនាសម្ព័ន្ធនានា រូមទាំងរូបសំណាកប្រពៃណីវប្បធម៌ប្រវត្ដិសាស្ត្រមួយចំនួនផងដែរ ក្នុងនោះមានដូចជា រូបសំណាកតោពីរ ព្រះសិវៈ នាងអោមា រាជសីមុខបី ព្រះថោងនាងនាគ ។ល។

ក្នុងចំណោមរូបសំណាកទាំងអស់នេះ គឺរូបសំណាកព្រះថោងនាងនាគ មានប្រជាប្រិយភាពជាងគេ នាពេលបច្ចុប្បន្ន។

រូបសំណាកព្រះថោងនាងនាគ ត្រូវបាន​អភិសេក​ជា​ផ្លូវការ ​នៅ​ថ្ងៃទី១៦ ខែមេសា ជា​ថ្ងៃ​ចុងក្រោយ​នៃ​ពិធីបុណ្យ​ចូលឆ្នាំថ្មី​ប្រពៃណី​ជាតិខ្មែរ ក្រោម​អធិបតីភាព​សម្ដេចនាយករដ្ឋមន្ត្រី ហ៊ុន សែន និង​សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួម​នឹង​មន្ដ្រីរាជការ​ ប្រជាពលរដ្ឋ​ជាច្រើន​បាន​ចូលរួម៕

អត្ថបទ៖ គង់ ប៊ុនថា