ភ្នំពេញ ៖ វេទិកាធុរកិច្ចបារាំង-កម្ពុជា នឹងធ្វើឡើងជាលើកដំបូង នាថ្ងៃទី ៩-១០ ខែមិថុនា ឆ្នាំ ២០២២ ខាងមុខនេះ នៅសួនច្បារនៃក្រុមប្រឹក្សាអភិវឌ្ឍន៍កម្ពុជា ( CDC ) រាជធានីភ្នំពេញ។ វេទិកាធុរកិច្ចដ៏មានសារៈសំខាន់រវាងប្រទេសបារាំង និងកម្ពុជា នេះ ត្រូវបានរៀបចំឡើងដោយ មជ្ឈមណ្ឌលពាណិជ្ជកម្ម និងឧស្សាហកម្មបារាំងកម្ពុជា ( CCIFC) និងគណៈកម្មាធិការទីប្រឹក្សាពាណិជ្ជកម្មបរទេសនៃប្រទេសបារាំងប្រចាំកម្ពុជា (CCE) ។ 

ថ្លែងក្នុងសន្និសីទសារព័ត៌មាន នាព្រឹកថ្ងៃទី ១ មិថុនា ឆ្នាំ ២០២២ នេះ លោក Francois Corbin អ្នកតំណាងពិសេសរបស់រដ្ឋមន្ត្រីទទួលបន្ទុកផ្នែកកិច្ចការអឺរ៉ុប និងការបរទេស សម្រាប់ទំនាក់ទំនងសេដ្ឋកិច្ចជាមួយបណ្តាប្រទេសអាស៊ាន បានឱ្យដឹងថា គោលបំណងនៃវេទិកានេះ គឺបង្ហាញពីបរិបទអំណោយផលរបស់កម្ពុជាសម្រាប់វិស័យធុរកិច្ច ហើយក៏ដូចជាបង្ហាញថា កម្ពុជាគឺជាច្រកដែលមានភាពងាយស្រួល មានភាពប្រកួតប្រជែងខ្ពស់ និងមានប្រសិទ្ធភាពសម្រាប់ក្រុមហ៊ុនក្នុងការនាំចេញទៅកាន់ទីផ្សារអាស៊ាន និងពិភពលោក។ លោកបន្តថា តាមរយៈវេទិកាធុរកិច្ចនេះដែរ និងជួយរឹតបន្តឹងទំនាក់ទំនងទ្វេរភាគីរវាងប្រទេសទាំងពីរ ក៏ដូចជាពង្រឹង និងពង្រីកការវិនិយោគឱ្យកាន់តែល្អប្រសើរថែមមួយកម្រិតទៀត។ 

លោក Arnaud DARC ប្រធានសភាពាណិជ្ជកម្មអឺរ៉ុបនៅកម្ពុជា បានលើកឡើងថា នៅក្នុងវេទិកាដែលនឹងប្រព្រឹត្តទៅនាប៉ុន្មានថ្ងៃខាងមុខនេះ នឹងមានវត្តមានក្រុមហ៊ុនបារាំង និងក្រុមហ៊ុនមកពីប្រទេសអាស៊ាន ប្រមាណ២៥០ក្រុមហ៊ុន នឹងចូលរួមនៅក្នុងវេទិកាធុរកិច្ចនេះផងដែរ។ លោកបន្ថែមថា វេទិកាដែលរៀចំឡើងរយៈពេល២ថ្ងៃនេះ គឺជាឱកាសពិសេសសម្រាប់សហគ្រិនកម្ពុជាអាចជួបពាណិជ្ជករបរទេស ដែលកំពុងស្វែងរកោកាសវិនិយោគនៅកម្ពុជា។ មិនមែនជារឿងចៃដន្យឡើយ ដែលប្រទេសអឺរ៉ុបដូចជាបារំាង ចាប់អារម្មណ៍មកធ្វើការវិនិយោគនៅកម្ពុជា។ 

លោក ហ្វីលីព បូឌ្រី ( Philippe Baudry) មន្ត្រីទទួលបន្ទុកផ្នែកសេដ្ឋកិច្ចនៃស្ថានទូតបារាំង ប្រចាំកម្ពុជា និងឡាវ បានលើកឡើងដែរថា ដោយសារតែកត្តាសុខសន្តិភាព និងស្ថេរភាពនយោបាយ និងការអភិវឌ្ឍន៍រីកចម្រើនលើគ្រប់វិស័យ ជាពិសេសការអភិវឌ្ឍន៍លើវិស័យភស្តុភារកម្មនៅរយៈកាលចុងក្រោយនេះ មានភាពល្អប្រសើរ ជាក់ស្ដែងការអភិវឌ្ឍនៅខេត្តព្រះសីហនុ និងខេត្តសៀមរាប ដែលជំរុញដល់កាលានុវត្តន៍ភាពនៃវិស័យធុរកិច្ច។ ម្យ៉ាងវិញទៀត រាជរដ្ឋាភិបាលកម្ពុជា តែងតែបើកឱកាសនៅក្នុងការធ្វើវេទិកាធុរកិច្ចពាណិជ្ជកម្មជាមួយបណ្ដាលប្រទេសផ្សេងៗ ព្រមទាំងបានធ្វើការយ៉ាងជិតស្និទ្ធជាមួយរវាងវិស័យរដ្ឋ និងវិស័យឯកជន។ 

បារាំង-កម្ពុជា បើនិយាយពីសាវតាទំនាក់ទំនងនៃប្រទេសទាំង២ គឺមានអាយុកាលជាច្រើនឆ្នាំមកហើយ។ និយាយដោយឡែកចំពោះទំនាក់ទំនងផ្នែកសេដ្ឋកិច្ចវិញ ការផ្លាស់ប្តូរពាណិជ្ជកម្មទ្វេភាគីបានកើនដល់ ១ពាន់លានអឺរ៉ូនៅឆ្នាំ២០១៧ ពោលគឺកើនឡើង៣ដងក្នុងរយៈពេល៣ឆ្នាំ។ ក្រោយមកទៀត ថ្វីដ្បិតតែទទួលរងនូវផលប៉ះពាល់ពីជំងឺកូវីដ១៩ ប៉ុន្តែបារាំងនៅតែជាទីផ្សារនាំចេញទំនិញដ៏សំខាន់មួយរបស់កម្ពុជា ដែលក្នុងនោះទំហំពាណិជ្ជកម្មកម្ពុជាបារាំង នៅឆ្នាំ២០២០សម្រេចបានចំនួន ៤៥៦ លានដុល្លារអាមេរិក និងគិតត្រឹមខែមេសា ឆ្នាំ ២០២១ មានចំនួន ១៥៧លានដុល្លារអាមេរិក។

ក្នុងចក្ខុវិស័យកម្ពុជាឆ្នាំ ២០៣០ រាជរដ្ឋាភិបាលកម្ពុជាបានបង្កើត និងដាក់ចេញនូវបណ្ដុំគោលនយោបាយអភិវឌ្ឍន៍ជាតិ ដែលជាផែនទីចង្អុលផ្លូវដើម្បីសម្រេចភាពរីកចម្រើនផ្នែកសង្គម-សេដ្ឋកិច្ច។ គោលនយោបាយទាំងនេះនឹងចូលរួមចំណែករក្សាកំណើនសេដ្ឋកិច្ចដ៏រឹងមាំ ប្រកបដោយចីរភាព ប្រកបដោយបរិយាប័ន្ន តាមរយៈការធ្វើពិពិធកម្មសេដ្ឋកិច្ច ការពង្រឹងភាពប្រកួតប្រជែង និងផលិតភាព៕ អត្ថបទ៖ ចេន សុជាតា