ភ្នំពេញ៖ ឯកឧត្ដមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានជួបពិភាក្សាការងារជាមួយ លោក Gabriel Tan នាយកជាន់ខ្ពស់ផ្នែកទំនាក់ទំនងរបស់ Prince Holding Group ស្តីពីការគាំទ្រដល់សហព័ន្ធកីឡាបាល់បោះរទេះជនពិការកម្ពុជា (Cambodia Wheelchair Basketball Federation) នាថ្ងៃទី០១ ខែមិថុនា ឆ្នាំ២០២២ នៅទីស្នាក់ការកណ្តាល Prince Holding Group។ 

ក្នុងនាមរាជរដ្ឋាភិបាលកម្ពុជា ឯកឧត្ដមទេសរដ្ឋមន្រ្តី បានកោតសរសើរដល់ថា្នក់ដឹកនាំ Prince Holding Group ដែលបានផ្តល់ចិត្តមេត្តាធម៌ យកចិត្តទុកដាក់ និងគាំទ្រឧបត្ថម្ភដល់កីឡាបាល់បោះរទេះជនពិការ និងជនមានពិការភាពនៅកម្ពុជា។

ឯកឧត្ដមបានលើកឡើងថា ក្រុមការងារអាជ្ញាធរមីន និង ក្រុមការងារ Prince Holding Group នឹងបន្តសហការគ្នាយ៉ាងជិតស្និទ្ធ និងជជែកពិភាក្សាការងារលម្អិតពាក់ព័ន្ធនឹងការរៀបចំប្រព្រឹត្តិទៅលើការគាំទ្រដល់សហព័ន្ធកីឡាបាល់បោះរទេះជនពិការកម្ពុជា និងការត្រៀមលក្ខណៈដើម្បីចូលរួមប្រកួតអាស៊ានប៉ារ៉ាហ្គេមលើកទី១២ ក្នុងឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ។

ឯកឧត្តមបានកោតសរសើរដល់ លោក Seu Muy (Bel) ជាជនរងគ្រោះពិការភាពដោយសារគ្រាប់មីន និងជាអគ្គលេខាធិការនៃសហព័ន្ធកីឡាបាល់បោះរទេះជនពិការកម្ពុជា ចំពោះទឹកចិត្តមុះមុតដឹកនាំកីឡាបាល់បោះរទេះជនពិការចូលរួមគ្រប់ការប្រកួតប៉ារ៉ាឡាំពិក និងការត្រៀមលក្ខណៈចូលរួមសម្រាប់ការប្រកួតអាស៊ានប៉ារ៉ាហ្គេមខាងមុខនេះ។ ឯកឧត្ដមបានថ្លែងអំណរគុណដល់លោក Mike Tuon ជនជាតិខ្មែរ-អាមេរិកាំង ដែលជាគ្រូបង្វឹកបាល់បោះ និងជាអតីតកីឡាករបាល់បោះនៅសហរដ្ឋអាមេរិក ដែលបានចំណាយពេលវេលា និងកម្លាំងកាយចិត្តហ្វឹកហ្វឺនដល់កីឡាបាល់បោះរទេះជនពិការនៅកម្ពុជា៕