បាល់ទាត់៖ បន្ទាប់ពីមិនអាចបន្ដដំណើរ ជាមួយក្រុមជម្រើសជាតិកម្ពុជា លោក Felix Dalmas បានផ្ញើសារអនុស្សាវរីយ៍មួយ ចំពោះសហព័ន្ធកីឡាបាល់ទាត់កម្ពុជា ក្រុមជម្រើសជាតិកម្ពុជា និងអ្នកគាំទ្រកម្ពុជា ខណៈលោកបានចាត់ទុកជាកិត្តិយស ដ៏អស្ចារ្យបំផុតមួយក្នុងជីវិតខ្លួន ក្នុងនាមជាគ្រូបង្វឹកក្រុមជម្រើសជាតិកម្ពុជា។
គ្រូបង្វឹកសញ្ជាតិអាហ្សង់ទីនរូបនេះបានថ្លែងក្នុងសារថា ក្នុងនាមជាគ្រូបង្វឹក និងជាអ្នកដឹកនាំនៃក្រុមជម្រើសជាតិកម្ពុជា វាគឺជាកិត្តិយសដ៏អស្ចារ្យបំផុតមួយ ក្នុងជីវិតរបស់ខ្លួន។ អស់រយៈពេល ២ឆ្នាំមកនេះ លោកមានក្រុមការងារបច្ចេកទេសកម្ពុជាដ៏អស្ចារ្យមួយ ហើយមានមនុស្សអស្ចារ្យជាច្រើនទៀតដែលនៅពីក្រោយការប្រកួត ពួកគេបានធ្វើការយ៉ាងខ្លាំង និងបានលះបង់ទាំងកម្លាំងកាយ កម្លាំងចិត្តសម្រាប់ក្រុម។ លោកបានធ្វើការងាររៀងរាល់ថ្ងៃជាមួយកីឡាករ គ្រូបង្វឹករបស់ក្លិបអាជីពនានា ហើយក៏មានម្ចាស់ក្លឹបទាំងនោះផងដែរ ពួកគេបានគាំទ្រលោកយ៉ាងខ្លាំងដើម្បីចង់ឲ្យប្រទេសកម្ពុជា និងកីឡាកររបស់យើងកាន់តែមានភាពរីកចម្រើន។ ការធ្វើការងារសហការជាមួយអ្នកទាំងនោះ វាពិតជាពិសេសពិសាលណាស់សម្រាប់លោក។ ទន្ទឹមជាមួយគ្នាលោក Felix Dalmas ក៏សម្ដែងការកោតសរសើរ និងថ្លែងអំណរគុណយ៉ាងជ្រាលជ្រៅចំពោះឯកឧត្តម សៅ សុខា ប្រធានសហព័ន្ធកីឡាបាល់ទាត់កម្ពុជា និងលោក Keisuke Honda អ្នកចាត់ការទូទៅក្រុមជម្រើសជាតិកម្ពុជា ដែលបានផ្តល់ការជឿទុកចិត្ត ហើយបានផ្តល់ឱកាសក្នុងការដឹកនាំក្រុមជម្រើសជាតិកម្ពុជា ឆ្ពោះទៅរកភាពជោគជ័យ។ សហព័ន្ធតែងតែជឿជាក់លើទស្សនៈវិស័យបាល់ទាត់ និងគាំទ្រដល់ក្តីសុបិន្តរបស់ក្រុម ក្នុងការកសាងមូលដ្ឋានគ្រឹះសម្រាប់យុគសម័យថ្មីនៃបាល់ទាត់កម្ពុជា។
ចំពោះសារទៅកាន់កីឡាករវិញ លោកបានពោលថា លោកមានតែពាក្យអរគុណប៉ុណ្ណោះ ដែលពួកគេបានធ្វើតាមការណែនាំរបស់ខ្លួនដោយអស់ពីចិត្ត ហើយបានបង្ហាញនូវឆន្ទះយ៉ាងមុះមុតគ្រប់ការប្រកួតដើម្បីក្រុម។ កីឡាករទាំងអស់តែងតែព្យាយាមជម្នះ ជាមួយខ្លួនឯងជារៀងរាល់ថ្ងៃ និងព្យាយាមកែតម្រូវខ្លួនឯងទាំងនៅក្នុង និងក្រៅទីលាន។ លោកបានមើលឃើញពីការលះបង់ដែលពួកគេបានធ្វើ និងការរីកចម្រើនដែលពួកគេសម្រេចបាន ធ្វើឲ្យជឿជាក់ថា ប្រជាជនកម្ពុជាក៏ដូចកីឡាករទាំងអស់ ពិតជាអាចសម្រេចនូវក្តីសុបិនដ៏ធំរបស់ខ្លួនបាន ដើម្បីនាំប្រទេសមួយនេះឲ្យមានការប្រកួតប្រជែង កាន់តែខ្លាំងលើឆាកអន្តរជាតិ។ បុរសវ័យ ៣៣ឆ្នាំដដែលបន្ដថា ក្នុងរយៈពេលតែ ២ឆ្នាំប៉ុណ្ណោះ ក្រុមជម្រើសជាតិកម្ពុជាបានបង្កើតមូលដ្ឋានគ្រឹះ នៃរបៀបលេងមួយដែលមានសក្តានុពលយ៉ាងខ្លាំង។ មូលដ្ឋានគ្រឹះដ៏រឹងមាំមួយនេះ បានបង្ហាញរួចមកហើយនូវអ្វីដែលវាអាចសម្រេចបាន និងទទួលបានលទ្ធផលមិនគួរឲ្យជឿដូចជា៖ ការឡើងដល់វគ្គពាក់កណ្តាលផ្តាច់ព្រ័ត្រ ពានរង្វាន់ជើងឯកអាស៊ីអាគ្នេយ៍ឆ្នាំ២០១៩ ជាលើកដំបូងក្នុងប្រវត្តិសាស្ដ្រ, ការឆ្លងចូលវគ្គជម្រុះជុំទី២ ក្នុងពានរង្វាន់បាល់ទាត់ពិភពលោក ក្នុងនាមជាក្រុមដែលក្មេងជាងគេក្នុងការប្រកួត និងការទទួលបានចំណាត់ថ្នាក់លេខ៤ ក្នុងការប្រកួតកីឡាស៊ីហ្គេមនៅឆ្នាំ២០១៩ ជាលើកដំបូងក្នុងប្រវត្តិសាស្ត្ររបស់បាល់ទាត់កម្ពុជា។
អ្វីដែលសំខាន់កម្ពុជាបានផ្សាភ្ជាប់ទស្សនៈបាល់ទាត់ និងរបៀបនៃការលេងមួយដែលសម្គាល់ថា នេះជារបៀបនៃការលេងរបស់កម្ពុជា។ នេះគឺជាអ្វីដែលលោកមានមោទនភាពបំផុត។ នៅពេលនេះកម្ពុជាមានមូលដ្ឋានគ្រឹះ និងគន្លងផ្លូវនៃដំណើរការអភិវឌ្ឍក្រុមជម្រើសជាតិ យ៉ាងច្បាស់លាស់។ លោកពិតជាមានមោទនភាព ចំពោះអ្វីដែលកម្ពុជាបានកសាង ហើយលោកជឿជាក់ថា ជាមួយនឹងមូលដ្ឋានគ្រឹះនេះ ការបង្កើតប្រវត្តិសាស្ត្រថ្មីរបស់កម្ពុជានឹងកើតមានឡើង ជាច្រើនទៀតនាពេលអនាគត។ លោក Felix បានបន្ថែមថា លោកពិតជាមានកិត្តិយសណាស់ ដែលបានក្លាយជាផ្នែកមួយនៃប្រវត្តិសាស្ត្របាល់ទាត់ របស់ប្រទេសដ៏អស្ចារ្យមួយនេះ ហើយលោកនឹងនៅតែចងចាំ និងដឹងគុណដល់ប្រជាជនកម្ពុជាជានិច្ច ចំពោះទឹកចិត្តដ៏ស្មោះសរចំពោះលោក។ លើសពីនេះទៅទៀត ក្រៅពីការងារក្រុមជម្រើសជាតិ លោកបានរស់នៅ និងធ្វើការជាមួយប្រជាជនកម្ពុជាផ្សេងទៀតជារៀងរាល់ថ្ងៃ ដែលបានធ្វើឲ្យលោកមានបទពិសោធន៍យល់ដឹងផ្ទាល់ថា ប្រទេសមួយនេះមានមនុស្សអស្ចារ្យជាច្រើន ដែលមានទេពកោសល្យ និងឧស្សាហ៍ព្យាយាមយ៉ាងខ្លាំង។
ចុងក្រោយអតីតគ្រូបង្វឹកក្រុមជម្រើសជាតិកម្ពុជារូបនេះ បានសម្ដែងការអរគុណចំពោះអ្នកគាំទ្រទាំងអស់ ដែលបានគាំទ្រដោយស្មោះចំពោះក្រុមជម្រើសជាតិកម្ពុជា ហើយលោកបានចាត់ទុកអ្នកគាំទ្រគឺជាចង្វាក់បេះដូងរបស់ក្រុម និងជាកីឡាករទី១២ របស់ក្រុម។ យ៉ាងណាមិញលោកសង្ឃឹមថា នឹងបានជួបជាមួយអ្នកគាំទ្រកម្ពុជាម្ដងទៀត ដ្បិតពេលនេះ និងជាដរាប ផ្នែកនៃបេះដូងរបស់លោកគឺពណ៌ខៀវ និងពណ៌ក្រហម ដែលសំដៅលើការចងចាំប្រទេសកម្ពុជា និងអ្នកគាំទ្រកម្ពុជាជានិច្ច។ គួរដឹងថា លោក Felix Dalmas បានចុះកុងត្រារយៈពេល ២ឆ្នាំដើម្បីដឹកនាំក្រុមជម្រើសជាតិកម្ពុជា ក្នុងនាមដៃស្ដាំលោក Keisuke Honda កាលពីខែសីហា ឆ្នាំ២០១៨ រហូតដល់ខែសីហា ឆ្នាំ២០២០ កន្លងទៅ។ តែក្នុងសេចក្ដីប្រកាសរបស់សហព័ន្ធម្សិលមិញ ស្ដីពីការបន្ដកុងត្រាលោក Keisuke Honda អ្នកចាត់ការទូទៅក្រុមជម្រើសជាតិកម្ពុជា និងសហការីរហូតដល់ឆ្នាំ២០២៣ គឺអវត្តមានរូបលោកតែម្នាក់ប៉ុណ្ណោះ ដោយសារបញ្ហាផ្ទាល់ខ្លួន។ យ៉ាងណាមិញលោក Felix ជឿជាក់ថា លោក Honda ដឹកនាំបានល្អសម្រាប់ក្រុមគោព្រៃកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
