​បាល់ទាត់៖ ក្រុមបាល់ទាត់​ជម្រើសជាតិ​កម្ពុជានឹងធ្វើ​ការប្រកួត​មិត្តភាព​អន្តរជាតិ​ផ្លូវការ ជាមួយ​ក្រុម​ជម្រើសជាតិ​ទី​ម័​រ​ខាងកើតនា​វេលា​ម៉ោង ៧​យប់​ថ្ងៃទី​០២ ខែមិថុនា ឆ្នាំ​២០២២ នេះនៅ​ពហុ​កីឡដ្ឋាន​ជាតិ​មរតក​តេ​ជោ។ នេះ​គឺជា​ការប្រកួត​ក្នុងស្រុក​លើកដំបូង​រប​ស់​ក្រុម​ធំនៃ​ក្រុម​គោព្រៃ​កម្ពុជា សម្រាប់​រយៈពេល​ជាង ២​ឆ្នាំ​ចុងក្រោយបន្ទាប់ពី​ផ្ទុះ​ជំងឺ​កូ​វីដ​-១៩ កាលពីដើមឆ្នាំ​២០២០ កន្លងទៅ។​

​លោក Keisuke Honda អ្នកចាត់ការ​ទូទៅ​ក្រុម​ជម្រើសជាតិ​កម្ពុជា បានចាត់ទុក​ការប្រកួត​នេះគឺជា​ការត្រៀមខ្លួនសម្រាប់​ចូលរួម​វគ្គ​ជម្រុះ​ជុំ​ទី​៣ នៃពានរង្វាន់​ជើងឯក​អាស៊ី AFC Asian Cup 2023 នៅ​ប្រទេស​ឥណ្ឌានាពេល​ឆាប់ៗខាងមុខ ។ លោក​រំពឹងថា កូនក្រុម​របស់ខ្លួន​នឹងធ្វើ​បានល្អ​ប្រសើរ​ក្នុងការ​ប្រកួត​នេះ ទោះបី​លោក​បាន​មើលឃើញ​ពី​ភាពខ្លាំង​របស់​ក្រុមទី​ម័​រ​ខាងកើត​យ៉ាងណាក៏ដោយ។​ ​ចំណែក​លោក Fábio Joaquim Maciel da Silva គ្រូបង្វឹក​ក្រុម​ជម្រើសជាតិ​ទី​ម័​រ​ខាងកើត បានបង្ហាញ​អារម្មណ៍​រីករាយដែល​បាន​ជួប​កម្ពុជា​ជាថ្មី ក្នុងជំនួប​លក្ខណៈ​មិត្តភាព​អន្ដរជាតិ ។ លោក​រំពឹងថា ការប្រកួត​នេះនឹង​ក្លាយជា​ការប្រកួត​ដ៏​រំភើប និង​អស្ចារ្យ ហើយ​លោក​ក៏​សង្ឃឹមថា នឹងមាន​អ្នកគាំទ្រ​ច្រើន​កុះករ​ចូលរួម​ទស្សនា​ការប្រកួត​នេះដែរ។​

​

​សូមបញ្ជាក់ថា ជំនួប​មិត្តភាព​អន្ដរជាតិ​នេះនឹង​ចាប់ផ្ដើម​ការប្រកួត​នា​វេលា​ម៉ោង ៧​យប់នៅ​ពហុ​កីឡដ្ឋាន​ជាតិ​មរតក​តេ​ជោ ដែល​នឹង​មានការ​ផ្ទាល់​ដោយ​ក្រុមការងារ​ទូរទស្សន៍ BTV-News។ ​បន្ទាប់ពី​ចប់​ការប្រកួត​មិត្តភាព​អន្ដរជាតិ​នេះ ក្រុម​គោព្រៃ​កម្ពុជាគ្រោង​នឹងធ្វើ​ដំណើរ​ទៅ​ប្រទេស​ឥណ្ឌានាពេល​ឆាប់ៗ ដើម្បី​ចូលរួម​ប្រកួត​វគ្គ​ជម្រុះ​ជុំ​ទី​៣ នៃ​ពានរង្វាន់ AFC Asian Cup 2023 ដែល​កម្ពុជាស្ថិតក្នុង​ពូ​ល D ជាមួយ​ក្រុម​ម្ចាស់ផ្ទះ​ឥណ្ឌា ហុងកុង និង​អា​ហ្វ​ហ្គា​នី​ស្ថាន ខណៈ​ការប្រកួត​នឹងធ្វើ​ឡើង​ពី​ថ្ងៃទី​០៨ ដល់​ថ្ងៃទី​១៤ ខែមិថុនា ឆ្នាំ​២០២២ ខាងមុខ៕

​អត្ថបទ៖ លី ឈុន​ឡា