កោះកុង៖ អភិបាលស្រុកបូទុមសាគរ ខេត្តកោះកុង ផ្តើមប្រគល់វិញ្ញាបនបត្រសម្គាល់អចលនវត្ថុ ជូនប្រជាពលរដ្ឋដែលជាម្ចាស់សិទ្ធិដល់លំនៅដ្ឋានតែម្តង ដោយអាជ្ញាធរស្នើសុំពលរដ្ឋចាំបាច់ថែរក្សាឯកសារនេះ ឱ្យបានល្អគង់វង្ស។

អ្វីដែលជាសេចក្តីត្រូវការ និងភាពកក់ក្តៅរបស់ប្រជាពលរដ្ឋរស់នៅក្នុងឃុំតានូន និងឃុំថ្មស បានមកដល់ហើយ ដោយអាជ្ញាធរស្រុកបូទុមសាគរសហការជាមួយរដ្ឋបាលខេត្តកោះកុង មន្ទីរជំនាញ កំពុងដុតដៃដុតជើងខ្លាំង ដើម្បីចុះទៅដល់ខ្នងផ្ទះពលរដ្ឋប្រគល់វិញ្ញាបនបត្រ​សម្គាល់អចលនវត្ថុដែលពួកគាត់ទើបតែទទួលដោះស្រាយសំណងរបស់រាជរដ្ឋាភិបាល កាលពីពេលថ្មីនេះផង និងតាំងពីជំនាន់យុវជនស្ម័គ្រចិត្តវាស់វែងដីធ្លីលេខ០១ផង។

លោក ហាក់ ឡេង អភិបាលស្រុកបូទុមសាគរ បានប្រាប់BTV ឱ្យដឹងនៅរសៀលថ្ងៃទី២ ខែមិថុនា ឆ្នាំ២០២២ថា វិញ្ញាបនបត្រ​សម្គាល់​អចលនវត្ថុដែលប្រគល់ជូនប្រជាពលរដ្ឋនៅពេលនេះ ទាំងដីលំនៅដ្ឋាន​ទំហំកន្លះហិចតា ខ្លះដីចម្ការ១ហិចតា ដីចម្ការ២ហិចតា និងដីចម្ការ៣ហិចតា។

បើតាមលោក ហាក់ ឡេង យន្តការផ្តើមផ្តល់វិញ្ញាបនបត្រសម្គាល់អចលនវត្ថជូន​ប្រជាពលរដ្ឋដល់​ខ្នង​ផ្ទះ​របស់ពួកគាត់យ៉ាងដូច្នេះ ​ដោយសារតែទើបតែ​រាជរដ្ឋាភិបាល​ធ្វើ​ប្រទានកម្ម និងចុះហត្ថលេខា​ពី​អាជ្ញាធរខេត្ត ​និងមន្ទីរជំនាញមក។ ជាពិសេស ​ដើម្បីកាត់បន្ថយការចំណាយ ​និងលើកទឹកចិត្តដល់​ពលរដ្ឋរស់នៅអាស្រ័យដល់ដីធ្លីផ្ទះ​សម្បែង ​ចំពោះថ្លៃ​សេវា​សុរិយោដី​ គឺមិន​តម្រូវឱ្យចំណាយទេ ជាបន្ទុករបស់រដ្ឋ។

ប៉ុន្មានថ្ងៃមកនេះ តាមការចង្អុលបង្ហាញ​ណែនាំ ​និងការ​អនុញ្ញាត​ពីលោកស្រី មិថុនា ភូថង អភិបាល ខេត្តកោះកុង​ លោក សុខ សុទ្ធី អភិបាលរងខេត្តកោះកុង ​បានកោះហៅ​អស់អភិបាលក្រុងស្រុក​ចំណុះ​ឱ្យរដ្ឋបាលខេត្ត ​ប្រគល់នូវវិញ្ញាបនបត្រសម្គាល់​អចលនវត្ថុរាប់​ម៉ឺន​ក្បាល​ជូនដល់​ប្រជាពលរដ្ឋ​នៅក្រុងខេមរភូមិន្ទ ​ស្រុកមណ្ឌលសីមា ​ស្រុកកោះកុង ​ស្រុកថ្មបាំង​ ស្រុកបូទុមសាគរ​ ស្រុកគិរីសាគរ និងស្រុកស្រែអំបិល៕ អត្ថបទ៖ ឈឹម មករា