​រុស្ស៊ី៖ ខណៈ​ប្រទេស​លោក​ខាង​លិច​មួយ​ចំនួន​កំពុង​ពិចារណា​ថា​ តើ​សម្បទាន​បែប​ណា​ដែល​មិន​ឲ្យ​មេដឹកនាំ​អត្តាធិបតេយ្យ​របស់​រុស្ស៊ី​លោក Vladimir Putin "​បាក់មុខ​មាត់​" នៅ​ក្នុង​ប្រទេស​អ៊ុយ​ក្រែ​ន សមាជិកសភា និង​ក្រុម​អ្នក​ឃោសនា​កំពូល​ៗ​របស់​រុស្ស៊ី​កំពុង​តស៊ូ​មតិ​ ដើម្បី​កម្ទេច​លោក​ខាង​លិចដែល​ពួកគេ​និយាយ​ថា ​ជា​គោលដៅ​ចុងក្រោយ​របស់​រុស្ស៊ី​។

​កម្មវិធី​ព័ត៌មាន​ ៦០នាទីរបស់​ទូរទស្សន៍​រដ្ឋ ពិធី​ការិនី​លោកស្រី Olga Skabeeva បាន​ប្រកាស​ថា "​ខ្ញុំ​មាន​ព័ត៌មាន​មិន​សប្បាយចិត្ត​មួយ​ចំនួន​... ទោះបីជា​យើង​កំពុង​បំផ្លាញ​សព្វាវុធ​ ដែល​កំពុង​ត្រូវ​បាន​បញ្ជូន​ទៅ​អ៊ុយ​ក្រែ​នតាម​វិធីសាស្ត្រ​ក៏ដោយ ប៉ុន្តែ​បរិមាណ​ដែល​សហរដ្ឋអាមេរិក​កំពុង​បញ្ជូន​អាវុធ​ទៅ​ បង្ខំ​ឱ្យ​យើង​បង្កើត​ការ​សន្និដ្ឋាន​ជាស​កល​មួយ​ចំនួន​។ ប្រហែលជា​ដល់ពេល​ដែល​ត្រូវ​ទទួល​ស្គាល់​ថា ប្រហែលជា​ប្រតិបត្តិការ​ពិសេស​របស់​រុស្ស៊ី​នៅ​អ៊ុយ​ក្រែ​ន​បាន​ដល់​ទី​បញ្ចប់​ហើយ ក្នុង​ន័យ​ថា ​សង្គ្រាម​ពិតប្រាកដ​មួយ​បាន​ចាប់ផ្តើម​នោះ​គឺ​សង្គ្រាម​លោក​លើក​ទី​៣ (WWIII)​។ យើង​ត្រូវ​បង្ខំចិត្ត​ធ្វើ​ឲ្យ​ប្រទេស​នេះ​ក្លាយ​ជា​ប្រទេស​គ្មាន​យោធា ​ដែល​មិន​ត្រឹមតែ​អ៊ុយ​ក្រែ​ន​ប៉ុណ្ណោះ​ទេ ថែមទាំង​សម្ព័ន្ធ​ណា​តូ​ទាំងមូល​។ ​លោក Vladimir Avatkov មកពី​បណ្ឌិត​សភា​ការទូត​នៃ​ក្រសួងការបរទេស​បាន​និយាយ​ថា អ្នក​បាន​លើក​ឡើង​ពី​សង្គ្រាម​លោក​លើក​ទី​៣ និង​របៀប​ដែល​ជនជាតិ​អាមេរិក និង​ប៉ូល​នានា​កំពុង​ធ្វើ​សកម្មភាព​នៅ​លើ​ទឹកដី​អ៊ុយ​ក្រែ​ន​ ជា​ការ​ពិត​យើង​ត្រូវ​ចងចាំ​ពាក្យ​របស់​លោក​ប្រធានាធិបតី Vladimir Vladimirovich Putin ដែល​បាន​និយាយ​ថា អ្នកណា​ដែល​ព្យាយាម​ជ្រៀតជ្រែក​ក្នុង​ប្រតិបត្តិការ​សឹក​ពិសេស​នេះ នឹង​ត្រូវ​សង​វិញ​យ៉ាង​ស័ក្ដិសម។

លោកស្រី Skabeeva បាន​កាត់​សម្ដី​ដោយ​ថា យើង​មិនដែល​ភ្លេច​ពាក្យសម្ដី​ទាំងនេះ​របស់​លោក ​Vladimir Vladimirovich Putin ទេ​។ សមាជិកសភា​រុស្ស៊ី​លោក Oleg Matveychev បាន​ថ្លឹង​ថ្លែង​ថា ប្រសិនបើ​ប៉ូឡូញ​ចាប់ផ្តើម​អន្តរាគមន៍...ព្រំដែន​បច្ចុប្បន្ន​របស់​ខ្លួននោះ​នឹង​មិន​មាន​ប្រយោជន៍​ទេ។ លោកស្រី Skabeeva មិន​ពេញចិត្ត​ទេដោយ​លើក​ឡើង​ថា ​ខ្ញុំ​មិនមែន​និយាយ​តែ​ប្រទេស​ប៉ូឡូញ​ទេ នៅ​មាន​ចក្រភពអង់គ្លេស និងសហរដ្ឋអាមេរិក​ទៀត...ពួកគេ​សុទ្ធ​តែ​ជា​អ្នក​រៀប​ចំ​ផែន​ការ​។ លោក Avatkov បាន​បង្ហើប​ថា​ មិនបាច់​ប្រញាប់​ទេ វា​មាន​ដំណាក់កាល​របស់​វា​។ គ្រប់យ៉ាង​តាម​ពេលវេលា​របស់​វា​!”៕

អត្ថបទ៖ សុខមាន