ភ្នំពេញ៖ កាកបាទក្រហមកម្ពុជាដែលមានហ្លួងម៉ែ នរោត្តម មុនិនាថ សីហនុ ព្រះប្រធានកិត្តិយស និងសម្តេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាននៅថ្ងៃទី ២ខែមិថុនា ២០២២នេះ បាន​ទទួលជួបសប្បុរជនតំណាងមកពីក្រុមហ៊ុន ROYAL GROUP ដែលបានឧបត្ថម្ភថវិកាចំនួន ៥០០.០០០ដុល្លារ (ហាសិបម៉ឺនដុល្លារអាម៉េរិក) តាមរយៈអ្នកឧកញ៉ា គិត ម៉េង និងលោកជំទាវ ម៉ៅ ចំណាន ជូនកាកបាទក្រហមកម្ពុជា។

ក្នុងឱកាសនោះលោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា តំណាង​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន បានពាំនាំប្រសាសន៍ របស់​សម្តេចកិត្តិ​ព្រឹទ្ធបណ្ឌិត ប៊ុន រ៉ានី ហ៊ុនសែន ផ្តាំផ្ញើសួរសុខទុក្ខ ​និងថ្លែងអំណរគុណយ៉ាងជ្រាលជ្រៅបំផុត ចំពោះក្រុមហ៊ុន ROYAL GROUP ដែលមានអ្នកឧកញ៉ា គិត ម៉េង ជាអគ្គនាយក ​បានចូលរួមបរិចា្ចគ​ថវិកា​ក្នុងឱកាសខួបលើកទី១៥៩ ​ទិវាពិភពលោកកាកបាទក្រហម ​និងអឌ្ឍចន្ទក្រហម៨ឧសភា ឆ្នាំ២០២២នេះ សម្រាប់កាកបាទក្រហមកម្ពុជា បានបន្តសកម្មភាពមនុស្សធម៌តទៅមុខទៀត។

លោកជំទាវអគ្គលេខាធិការ ​បានឱ្យដឹងថា សម្រាប់​ការកៀងគររកជំនួយ​ឧបត្ថម្ភ​ទិវា៨ឧសភាឆ្នាំនេះ ហាក់មាន​សន្ទុះខ្លាំងជាងរាល់ឆ្នាំ​ បីទោះជាកន្លងមកស្ថិតក្នុងវិបត្តកូវីដ-១៩ក៏ដោយ រឺឯចំនួនវិញ​ក៏មាន​ការកើនឡើងផងដែរ។

លោកជំទាវ បានបញ្ជាក់ថា ​ការដែលមានសន្ទុះកើនឡើងនេះ គឺមកពីប្រជាពលរដ្ឋមានការ​យល់​ដឹងច្រើន ​អំពីសកម្មភាពមនុស្សធម៌ របស់កាកបាទក្រហមក្រហមកម្ពុជា ក្នុងការចែករំលែកធនធាន​ផ្ទាល់ខ្លួន ទោះបីតិចក្តី ច្រើនក្តី នេះគឺជាទឹកចិត្តដ៏ល្អមួយ ​របស់ប្រជាពលរដ្ឋខ្មែរយើង ក្នុងសម័យ​សុខ​សន្តិភាពនេះ។

តំណាងក្រុមហ៊ុន ROYAL GROUP លោក ម៉ាក់ ហាន់ណា អគ្គនាយកហិរញ្ញវត្ថុ រ៉ូយ៉ាល់គ្រុប ពិតជា​ក្តីសប្បាយរីករាយ ​និងអរគុណដល់កាកបាទក្រហមកម្ពុជា ​ដែលមានហ្លូងម៉ែ នរោត្តម មុនីនាថ សីហនុ ​ជាព្រះប្រធានកិត្តយស និងសម្តេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដែល​ផ្តល់ឱកាសឱ្យក្រុមហ៊ុន បានចែករំលែក ​និងចូលរួមបរិច្ចាគថវិកាមួយចំនួន ជូន​កាកបាទ​ក្រហម​កម្ពុជា​ សម្រាប់​ក្នុងឱកាសទិវា ៨ឧសភា ២០២២។

លោកជំទាវអគ្គលេខាធិការ កាកបាទក្រហមកម្ពុជា បានបញ្ជាក់ថា ជំនួយដែលបានមកពី​សប្បុរសធម៌​នានា គឺបាកបាទក្រហមកម្ពុជា​ បានយកទៅធ្វើជា ​អណ្តូងទឹក បន្ទប់ទឹក ស្ថានីយលាង​ដៃ​នៅតាមសាលារៀនទីជនបទ​ ធ្វើផ្ទះជូនអតីតយុទ្ធជន ឧបត្ថម្ភ​ទៅ​តាមមន្ទីពេទ្យ តាម​អង្គការ​កុមាកំព្រា ​ជនមានពិការភាព ​ជនចាស់ជរាឥតទីពឹង​ ស្រ្តីមេម៉ាយកូនច្រើន​ អ្នកផ្ទុកមេរោគអេដស៍ និង​ប្រជាពលរដ្ឋដែលងាយរងគ្រោះបំផុត ​និងគ្រោះធម្មជាតិផ្សេងៗទៀត។

ជាក់ស្តែងដូចក្នុងរយៈពេលថ្មីៗ​កន្លងមកនេះ ​គឺក្រុមកាងារកាក​បាទក្រហមកម្ពុជា បាននាំយក​អំណោយ​ទៅ​ចែកជូនប្រជាពលរដ្ឋ ​ដែលងាយរងគ្រោះបំផុត​នៅតាម​ទីជនបទដាច់​ស្រយាលឆ្ងាយៗ​រហូតចំនួន៨ខេត្ត ​ដែលកំពុងតែត្រូវការជំនួយជាចាំបាច់៕