រុស្ស៊ី៖ រដ្ឋមន្ត្រីការបរទេសរុស្ស៊ីលោក Sergei Lavrov កាលពីថ្ងៃពុធបាននិយាយថា ទណ្ឌកម្មអន្តរជាតិកំពុងធ្វើឲ្យប៉ះពាល់ដល់សមត្ថភាពរបស់រុស្ស៊ី ក្នុងការនាំចេញគ្រាប់ធញ្ញជាតិរបស់ខ្លួនផ្ទាល់ ក្នុងពេលមានការព្រួយបារម្ភអំពីកង្វះស្បៀងអាហារពិភពលោក។
ថ្លែងក្នុងអំឡុងដំណើរទស្សនកិច្ចទៅកាន់ប្រទេសអារ៉ាប៊ីសាអូឌីត លោក Lavrov បាននិយាយថា ការនាំចេញគ្រាប់ធញ្ញជាតិរបស់រុស្ស៊ី ប្រហែលជាមិនស្ថិតនៅក្រោមការដាក់ទណ្ឌកម្មដោយផ្ទាល់នោះទេ ប៉ុន្តែនាវាដែលផ្ទុកគ្រាប់ធញ្ញជាតិប្រឈមនឹងឧបសគ្គបន្ថែមទៀត។ លោកបាននិយាយថា ទោះបីជាប្រទេសលោកខាងលិចបានរំឭកយើងថា គ្រាប់ធញ្ញជាតិមិនស្ថិតក្រោមគោលដៅនៃការដាក់ទណ្ឌកម្មក៏ដោយ ដោយហេតុផលមួយចំនួនបាននៅជាប់គាំង ខណៈនាវាដឹកគ្រាប់ធញ្ញជាតិរបស់រុស្ស៊ីពិតជាបានធ្លាក់នៅក្រោមទណ្ឌកម្ម។ នាវាមិនត្រូវបានទទួលយកនៅកំពង់ផែបរទេសនៅក្នុងកំពង់ផែអឺរ៉ុប ហើយមិនត្រូវបានធានារ៉ាប់រង។
ជាគោលការណ៍ខ្សែសង្វាក់ផ្នែកដឹកជញ្ជូន និងហិរញ្ញវត្ថុទាំងអស់ ដែលទាក់ទងទៅនឹងការផ្គត់ផ្គង់គ្រាប់ធញ្ញជាតិទៅកាន់ទីផ្សារពិភពលោក វាស្ថិតនៅក្រោមការដាក់ទណ្ឌកម្មរបស់សហសេវិកប្រទេសលោកខាងលិច។ លោក Lavrov បានចាត់ទុកសំណើរបស់ប្រទេសអ៊ុយក្រែន សម្រាប់អាវុធដ៏មានឥទ្ធិពលពីប្រទេសលោកខាងលិច រួមទាំងប្រព័ន្ធបាញ់គ្រាប់រ៉ុក្កែតជាច្រើនពីសហរដ្ឋអាមេរិកថា ជាការបង្កហេតុដោយផ្ទាល់ ដែលមានគោលបំណងទាញប្រទេសលោកខាងលិចឱ្យធ្លាក់ក្នុងជម្លោះ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
