​បាល់ទាត់៖ ​ជំនួប​វគ្គ ៨​ក្រុម​ចុងក្រោយ UEFA Champions League រវាង Real Madrid និង Liverpool នឹង​មិន​បាច់​លើក​ទៅ​ប្រកួត​នៅ​ទឹកដី​ផ្សេង​ឡើយ ក្រោយ​ការ​រឹតត្បិត​សេរីភាព​ដើម្បី​ទប់ស្កាត់ Covid-19 នៅ​ទឹកដី​អេ​ស្ប៉ា​ញ​ត្រូវ​បាន​បន្ធូរបន្ថយ​។ ​​រដ្ឋាភិបាល​អេ​ស្ប៉ា​ញ​បាន​ផ្អាក​ការ​ទទួល​អ្នកដំណើរ​ពី​ចក្រភព​អង់គ្លេស ចាប់​តាំង​ពី​ខែ​ធ្នូ​ចុង​ឆ្នាំ​២០២០ ដោយ​ព្រួយបារម្ភ​ពី​ការ​ឆ្លង​មេរោគ Covid-19 ប​ម្លែ​ង​ខ្លួន​ថ្មី​។

​​វិធានការ​នេះ​នឹង​ចប់​សុពលភាព​នៅ​ថ្ងៃទី៣០ ខែ​មិនា​ខាងមុខ​នេះហើយ មានន័យថា Real Madrid នឹង​ជួប Liverpool ជើង​ទី១ វគ្គ ៨ក្រុម​ចុងក្រោយ Champions League នៅ​ថ្ងៃ​ទី​៦ ខែ​មេសា​នឹង​អាច​ធ្វើ​នៅ​លើ​ទឹកដី​អេ​ស្ប៉ា​ញបាន​។​ ​នៅ Europa League ក៏​ដូចគ្នា​ដែរ Grenada ក៏​នឹង​អាច​ទទួល Manchester United បាន​ដែរ​នៅ​ថ្ងៃ​ទី​៨ ខែមេសា​ដូចគ្នា​វគ្គ ៨​ក្រុម​ចុងក្រោយ​ជើង​ទី១​។​ ​សូម​បញ្ជាក់​ថា ​វិធានការ​រឹត​បន្តឹង​មិន​ទទួល​អ្នកដំណើរ​ពី​ចក្រភព​អង់គ្លេស ត្រូវ​បាន​ធ្វើឡើង​ដោយ​ប្រទេស​មួយ​ចំនួនដែល​រួមមាន​អាល្លឺម៉ង់​ផង​ដែរ​។ Monchengladbach ពេល​ជួប Manchester City នៅ​វគ្គ ១៦​ក្រុម​ចុងក្រោយ​ទាំងពីរ​ជើង និង Liverpool ជួប Leipzig ទាំងពីរ​ជើង​កន្លង ទៅ​សុទ្ធតែ​ត្រូវ​បាន​លើក​ទៅ​ធ្វើ​នៅ​ទឹកដី Budapest ប្រទេស​ហុង​គ្រី​៕

​អត្ថបទ​៖​នាង សុភា​វុ​ធ