​អ៊ុយ​ក្រែ​ន​៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy កាលពី​ថ្ងៃ​សុក្រ​បាន​ថ្លែង​ទៅកាន់​ប្រជាជាតិ ដែល​ប្រារព្ធ​ការឈាន​ចូលដល់​ថ្ងៃទី​100 ​នៃ​សង្គ្រាម​រុស្ស៊ី​-​អ៊ុយ​ក្រែ​ន​។

លោក Zelenskyy ដាក់ឈ្មោះ​ពាក្យ​ដែល​ជាប់ទាក់​ទង​យ៉ាង​ទូលំទូលាយ​ជាមួយ​សង្គ្រាម​នៅ​អ៊ុយ​ក្រែ​ន​។ «​សន្តិភាព ជ័យជំនះ អ៊ុយ​ក្រែ​ន ជា​ពាក្យ​បី​ម៉ាត់​ដែល​យើង​កំពុង​ប្រយុទ្ធ​ដើម្បី​ទាម​ទារយក។ ប្រធានាធិបតី​អ៊ុយ​ក្រែ​ន​បានបញ្ចប់​ការ​ថ្លែង​សុន្ទរកថា​របស់លោក​ដោយ​សារ​នៃ​ក្តីសង្ឃឹម​។ ​នៅពេល​ថ្លែង​សុន្ទរកថាលោក Zelenskyy ត្រូវបាន​ចូលរួម​ដោយ​មន្ត្រី​ជាច្រើនរូប​របស់លោក រួមមាន​ទាំង​នាយករដ្ឋមន្ត្រីលោក Denys Shmyhal និង​ប្រធានការិយាល័យប្រធានាធិបតីលោក Andriy Yermak ។ លោក​និយាយថា​ យើង​បាន​ការពារ​អ៊ុយ​ក្រែ​ន​អស់​រយៈពេល 100ថ្ងៃ​រួចមកហើយ ជ័យជំនះ​នឹង​ក្លាយជា​របស់​យើង​។​

​ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​ទៅ​ពិនិត្យមើល​មន្ទីរពេទ្យ​ក្នុង​ទីក្រុង Kyiv កាលពី​ថ្ងៃ​សុក្រ និង​បាន​ថ្លែងអំណរគុណ​ដល់​ក្រុមគ្រូពេទ្យ​អ៊ុយ​ក្រែ​ន សម្រាប់​ការងារ​ជួយសង្គ្រោះ​របស់ពួកគេ​។​ ​លោក ​Zelenskyy បាន​ទៅ​ពិនិត្យមើល​វិទ្យាស្ថាន​ជាតិ​វះកាត់​ និង​ប្តូរ​សរីរាង្គ Shalimov និង​បាន​អបអរបុគ្គលិក​របស់ខ្លួន​ក្នុង​ខួប​លើក​ទី50 នៃ​វិទ្យាស្ថាន​នេះ​។​ ​លោក​បាន​និយាយ​ទៅកាន់​ទាហាន​អ៊ុយ​ក្រែ​ន​ដែល​បាន​រងរបួស​នៅក្នុង​ការប្រយុទ្ធ ​និង​បាន ប្រគល់រង្វាន់​រដ្ឋ​ដល់​និយោជិត និង​គ្រូពេទ្យ​ដែល​បាន​ជួយ​ជន​ស៊ីវិល​ក្នុងអំឡុងពេល​សង្គ្រាម៕

អត្ថបទ៖ ប៊ុនថន