ភ្នំពេញ ៖ ប្រជាពលរដ្ឋរាប់ពាន់នាក់ នៅក្នុងសង្កាត់ចំនួនពីរ ក្នុងខណ្ឌពោធិ៍សែនជ័យ អញ្ជិញចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ក្រោមបរិយាកាសសប្បាយរីករាយ ល្អប្រសើរ nigប្រព្រិត្តទៅដោយរលូន គ្មានការព្រួយបារម្ភផ្នែកសន្តិសុខ ឬការប្រកាន់បក្សពួកនិន្នាការនយោបាយ ពោលគឺបានបង្ហាញនូវលទ្ធិប្រជាធិតេយ្យពិតៗនៅកម្ពុជា ។

​ប្រជាពលរដ្ឋនៅក្នុងសង្កាត់ចោមចៅ ទី១ និងចោមចៅ ទី២ បានថ្លែងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ នៅថ្ងៃទី ៥ ខែ មិថុនា ឆ្នាំ ២០២២ នេះថា ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ នៅថ្ងៃនេះ គឺប្រកបដោយបរិយាកាសល្អប្រសើរ និងប្រព្រិត្តទៅដោយរលូន ដោយគ្មានការព្រួយបារម្ភផ្នែកសន្តិសុខ និងអំពើហឹង្សា ឬការចាប់បង្ខំពីគណបក្សនយោបាយណាមួយនោះឡើយ ពោលគឺការចូលរួមបោះឆ្នោត របស់ពួកគាត់ ប្រព្រឹត្តដោយការស្ម័គ្រចិត្តç ក្នុងនាមប្រជាពលរដ្ឋត្រូវតែចូលរួមបោះឆ្នោត ដើម្បីបង្ហាញនូវឆន្ទៈ ក្នុងការចូលរួមសកម្មភាពជាមួយសង្គម ។

ពួកគាត់លើកឡើងស្រដៀងគ្នាបន្តថា ក្នុងនាមជាប្រជាពលរដ្ឋ ការចូលរួមបោះឆ្នោតគឺមានសារៈសំខាន់ណាស់ ក្នុងការជ្រើសរើសយកមេដឹកនាំរបស់ខ្លួន ដែលពួកគាត់ចាត់ទុកថា ជាមេដឹកនាំដែលមានសមត្ថភាព មានលទ្ធភាពពេញលេញ និងជឿជាក់បាន ក្នុងការបន្តវេន និងការអភិវឌ្ឍនៅតាមមូលដ្ឋាន ជាពិសេសការជួយដោះស្រាយជូនប្រជាពលរដ្ឋដែលជួបបញ្ហាជាដើម។

សូមបញ្ជាក់ថា៖ មណ្ឌលបោះឆ្នោតនៅអនុវិទ្យាគោគបញ្ជាន់ ក្នុងសង្កាត់ចោមចៅទី២ ខណ្ឌពោធិ៍សែនជ័យ បានចែកចេញជាពីរមណ្ឌល មាន ៧១ការិយាល័យ និងមានចំនួនប្រជាពលរដ្ឋបោះឆ្នោតសរុបជាង ៣២ ពាន់នាក់ ក្នុងនោះមណ្ឌលចោមចៅទី១ បើតាមការឲ្យដឹងពីលោក ផាង ខុម ប្រធានគណៈកម្មាការរៀបចំការបោះឆ្នោតសង្កាត់ចោមចៅ ទី១ មានចំនួនការិយាល័យបោះឆ្នោតចំនួន ៣៨ ការិយាល័យ និងមានប្រជាពលរដ្ឋចូលរួមបោះឆ្នោតជាង ១២ ពាន់នាក់ គិតមកដល់ម៉ោង៩ព្រឹកថ្ងៃបោះឆ្នោតនេះ ប្រជាពលរដ្ឋបានអញ្ជើញមកបោះឆ្នោតបានចំនួន ២ ៨៥៧ នាក់ ត្រូវប្រមាណជាង ២២%។ ចំណែកសង្កាត់ចោមចៅ ទី២ លោក ឡុង ផុន ប្រធានគណៈកម្មាការរៀបចំការបោះឆ្នោតសង្កាត់ចោមចៅ ទី២ បានឲ្យដឹងថា សង្កាត់ចោមចៅ ទី២ មានការិយាល័យក្នុងអនុវិទ្យាគោគបញ្ជាន់ មានចំនួន ៣៣ ការិយាល័យ និងមានប្រជាពលរដ្ឋដែលត្រូវបោះឆ្នោត ចំនួនជាង ២ ម៉ឺននាក់ ក្នុងនោះគិតមកដល់ម៉ោង ៩ព្រឹកដូចគ្នា ប្រជាពលរដ្ឋបានមកបោះឆ្នោត មានចំនួនជាង ៦ ៤២៣ នាក់ ត្រូវប្រមាណជិត ៣២%៕

អត្ថបទ៖ សុន រ៉ាឌី