ប៉ៃលិន៖ លោកជំទាវ បាន ស្រីមុំ អភិបាលខេត្តប៉ៃលិន បានឲ្យអ្នកសារព័ត៌មានដឹងនៅល្ងាចថ្ងៃទី០៥ ខែមិថុនា ឆ្នាំ២០២២នេះថា នៅគ្រប់មណ្ឌលបោះឆ្នោតទាំង ១១៨ការិយាល័យ ទូទាំងខេត្តប៉ៃលិនគឺគណបក្សប្រជាជនកម្ពុជា នាំមុខដាច់ទាំងអស់។

បើតាមលោកឧត្តមសេនីយ៍ទោ សេង សុគន្ធ ស្នងការនគរបាលខេត្តប៉ៃលិន បានឲ្យដឹងដែរថា ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២នេះ ប្រព្រឹត្តទៅប្រកបដោយតម្លាភាព និងយុត្តិធម៌ត្រឹមត្រូវ ហើយប្រជាពលរដ្ឋមកចូលរួមបោះឆ្នោត ដោយគ្មានការបង្ខិតបង្ខំនោះទេ។

ចំណែកស្ថានភាពសន្ដិសុខ និងសណ្ដាប់ធ្នាប់ទូទៅ ក្នុងដំណើរការបោះឆ្នោតនៅទូទាំងខេត្តប៉ៃលិន មានសភាពស្ងប់ស្ងាត់ល្អប្រសើរ មិនមានបាតុភាពអ្វីរារាំងនោះឡើយ។

សូមបញ្ជាក់ថា៖ បើតាមលោក គង់ ជឺ អនុប្រធានគជប ខេត្តប៉ៃលិន បានឲ្យដឹងថា នៅក្នុងខេត្តប៉ៃលិន មានគណបក្សនយោបាយ ដែលឈរឈ្មោះបោះឆ្នោតក្រុមប្រឹក្សាឃុំ សង្កាត់ ចំនួន៥ និងមានមណ្ទលចំនួន៨ ,ការិយាល័យបោះឆ្នោតចំនួន១១៨ ព្រមទាំងមានប្រជាពលរដ្ឋ ដែលមានឈ្មោះក្នុងបញ្ជីបោះឆ្នោតចំនួន៤២២៦២នាក់ផងដែរ៕