ភ្នំពេញ៖ មន្ត្រីជាន់ខ្ពស់ក្រសួងសុខាភិបាល បានក្រើនរំលឹកដល់ក្រុមជួរមុខ​ និងក្រុមគោលដៅ​អាទិភាព ត្រូវទៅចាក់វ៉ាក់សាំងកូវីដ-១៩ ចាប់ពីថ្ងៃទី៩ ខែមិថុនា ឆ្នាំ២០២២ ខាងមុខនេះតទៅ ដើម្បីបន្តចូលរួមទប់ស្កាត់ការចម្លងនៃជំងឺកូវីដ-១៩ ។

លោកជំទាវ ឱ វណ្ណឌីន ប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្របខណ្ឌ​ទូទាំង​ប្រទេស បានអំពាវនាវឲ្យថ្នាក់ដឹកនាំរាជរដ្ឋាភិបាល មន្ត្រីជួរមុខ និងក្រុមគោលដៅអាទិភាព ដែល​មានអាយុចាប់ពី១២ឆ្នាំឡើងទៅ ហើយបានចាក់វ៉ាក់សាំងកូវីដ-១៩ ដូសទី៤ រួចហើយ មាន​គម្លាត​យ៉ាងតិច ៣ខែឡើងទៅ​ សូមអញ្ជើញទៅចាក់វ៉ាក់សាំងកូវីដ-១៩ ដូសទី៥ ​ឲ្យបាន​គ្រប់ៗគ្នា ចាប់​ពីថ្ងៃទី៩ ខែមិថុនា ឆ្នាំ២០២២ តទៅ នៅតាមទីតាំងដែលក្រសួងសុខាភិបាលបានកំណត់។

លោកជំទាវ ឱ វណ្ណឌីន បញ្ជាក់ថា ការទៅទទួលយកវ៉ាក់សាំងកូវីដ-១៩ ដូសទី៥ គឺ​ដើម្បី​ជួយ​បង្កើននូវភាពស៊ាំក្នុងរាង្គកាយរបស់បុគ្គលផង និងរក្សាបានភាពស៊ាំយ៉ាងរឹងមាំក្នុង​សហគមន៍​កម្ពុជា​ផងដែរ។

លោកជំទាវថា ការចាក់វ៉ាក់សាំងដូសទី៥ ក៏ដើម្បីបន្តចូលរួមទប់ស្កាត់ការវាយលុកពីវីរុសកូវីដ១៩ ជា​ពិសេស​វីរុសបំប្លែងថ្មីៗ ​ខណៈស្ថានភាពឆ្លងនៃជំងឺរាតត្បាតនេះនៅលើពិភពលោក​មិន​ធូរស្រាល​នៅឡើយ៕