ភ្នំពេញ៖ នៅព្រឹកថ្ងៃទី៦ខែមិថុនានេះ សំគាល់ឃើញថា ទាំងភ្ញៀវទេសចរជាតិអន្តរជាតិ នៅរាជធានីភ្នំពេញ គឺបានបន្តចេញដើរកម្សាន្តសប្បាយរីករាយ និងគ្មានព្រួយបារម្ភ ភ័យខ្លាចអំពីបញ្ហាសន្តិសុខ សណ្តាប់ធ្នាប់ ខណៈគណៈកម្មាធិការជាតិរៀបចំការបោះឆ្នោត គ.ជ.ប បានប្រកាសលទ្ធផលបណ្តោះអាសន្ននៃការជ្រើសរើសក្រុមប្រឹក្សាឃុំសង្កាត់អាណត្តិទី៥។

បើតាមបណ្តាភ្ញៀវទេសចរអន្តរជាតិ ដែលបានដើរកម្សាន្តនៅតាមមាត់ទន្លេ មុខព្រះបរមរាជវំាង បានថ្លែងប្រាប់ BTV ថា នៅថ្ងៃម្សិលមិញ ពួកគេក៏បានមើលឃើញអំពីដំណើរការរៀបចំការ​បោះឆ្នោត​នៅ​តាមមណ្ឌលការបោះឆ្នោតមួយចំនួន ​ហើយមានការសប្បាយរីករាយ នឹងបានយល់​ដឹង​ពីរបៀបដំណើរការបោះឆ្នោតនៅកម្ពុជា ​គឺមានពលរដ្ឋជាច្រើនបានអញ្ជើញទៅបោះឆ្នោត ហើយ​ជាពិសេស​បានឃើញអំពីរបៀបការរាប់សន្លឹកឆ្នោត ​ឃើញថា​ ដំណើរការល្អ ជារួមអ្វីដែលសំខាន់​គឺ​ក្រោយការបោះឆ្នោតយើងមើលឃើញពលរដ្ឋទាំងអស់គ្នាមានភាពសប្បាយរីករាយ ចេញ​ដើរ​កម្សាន្ត ដោយគ្មានព្រួយបារម្ភ និងគ្មានការភ័យខ្លាចជាមួយនឹងសង្គម​មាន​ភាព​ស្ងាត់ស្ងៀមល្អ។

ដោយឡែកសម្រាប់ទេសចរ និងអ្នកប្រកបរបររកស៊ីក្នុងស្រុកវិញ នៅក្រោយការបោះឆ្នោតនេះ គឺ​ពួកគេទាំងអស់គ្នា ​មានពេញចិត្ត ​នឹងលទ្ធផលបណ្តោះអាសន្ននៃការបោះឆ្នោត ដែលប្រកាស​ដោយ​គ.ជ.បនៅយប់មិញនេះ ​ដែលលទ្ធផលនេះ ​គឺជាមូលហេតុធ្វើអោយគេមានការសប្បាយរីករាយ និង​នាំគ្នាបន្តចេញដើរកម្សាន្ត ​និងចេញប្រកបរបរអាជីវកម្មជាធម្មតា ​ហើយតាមការបោះឆ្នោតគេ​សង្ឃឹមថា មូលដ្ឋានរបស់គេបន្តការអភិវឌ្ឍរីកចំរើនថែមទៀត។

សូមបញ្ជាក់ថា នៅក្នុងដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ នៅថ្ងៃទី៥ ខែមិថុនា ម្សិលមិញនេះគឺមានពលរដ្ឋប្រមាណជាង ៧លាន១សែននាក់ ​ដែលស្នើនឹងជិត៨០% នៃ ចំនួនអ្នកបោះឆ្នោតសរុប ​បានអញ្ជើញទៅបោះឆ្នោត ក្នុងបរិយាកាសសេរី យុត្តិធម៌ និងគ្មានការគំរាមកំហែង៕អត្ថបទ ស៊ុម សុខជា