ភ្នំពេញ៖ គិតក្នុងរយៈពេល ៥ខែ ដើមឆ្នាំ២០២២នេះ កម្ពុជាបាននាំចេញអង្ករគ្រប់ប្រភេទទៅកាន់ទីផ្សារអន្តរជាតិ មានកំណើនចំនួនជិត ២២% និងទទួលចំណូលសរុបពីការនាំចេញស្រូវ និងអង្ករបានចំនួនសរុបជាង ៥៦០លានដុល្លារអាម៉េរិក។

​ប្រភពពីសហព័ន្ធស្រូវអង្ករកម្ពុជា កាលពីសប្តាហ៍កន្លងទៅនេះ បានឲ្យទូរទស្សន៍ព័ត៌មាន ប៊ីធីវី ដឹងថា ក្នុងរយៈពេល ៥ខែ ដើមឆ្នាំ២០២២ ការនាំអង្ករចេញពីកម្ពុជាទៅកាន់ទីផ្សារអន្តរជាតិ តាមរយៈក្រុមហ៊ុនចំនួន ៥៣ក្រុមហ៊ុន ដែលក្នុងនោះ មានប្រទេសចិន រួមទាំងតំបន់ស្វយ័តហុងកុង ម៉ាកាវ បានចំនួនជាង ១៤ម៉ឺនតោន មានកំណើនជាង ២៣% បើធៀបទៅនឹងរយៈពេលដូចគ្នាក្នុងឆ្នាំ២០២១។

ប្រភពដដែលបានបន្តថា ការនាំចេញទៅកាន់ប្រទេសនានានៅក្នុងទ្វីបអ៊ឺរ៉ុបមានចំនួន ២៣ប្រទេស បានចំនួនជាង ៨ម៉ឺន ៨ពាន់តោន មានកំណើនជិត ៥០%។ ការនាំចេញទៅកាន់ប្រទេសក្នុងសមាជិកអាស៊ាន ៤ប្រទេស បានចំនួនជាង ២ម៉ឺន ៥ពាន់តោន មានកំណើនជាង ១៧% និងការនាំចេញទៅកាន់គោលដៅផ្សេងៗចំនួន ២១ប្រទេស បានចំនួនជាង ២ម៉ឺនតោន ឬស្មើនឹងជាង ៧%។

សហព័ន្ធស្រូវអង្ករកម្ពុជា បានបន្ថែមថា គិតក្នុងរយៈពេល៥ខែនេះដែរ កម្ពុជាបាននាំចេញស្រូវសរុបបានចំនួនជាង ១,៦លានតោន ដែលគិតជាទឹកប្រាក់មានចំនួនជាង ៣៩០លានដុល្លារ សម្រាប់អង្ករ គឺមានការនាំចេញអង្ករក្រអូបគ្រប់ប្រភេទ បានចំនួនជាង ៦៤% អង្ករសជាង ៣៣% អង្ករចំហ៊ុយ ១.៤២% និងអង្ករសរីរាង្គចំនួន ១.៤២%។ ដោយឡែក សម្រាប់ខែឧសភា ឆ្នាំ២០២២នេះ កម្ពុជាបានធ្វើការនាំចេញអង្ករបានចំនួនជាង ៦ម៉ឺន ២ពាន់តោន ដែលមានកំណើនជាង ៥៤% បើធៀបទៅនឹងខែឧសភា ឆ្នាំ២០២១ ហើយបានធ្វើការនាំចេញស្រូវបានចំនួនជាង ៥ម៉ឺនតោន៕

អត្ថបទ៖ ឈិត បូរ៉ាវី