រុស្ស៊ី៖ លោកប្រធានាធិបតី Vladimir Putin បានចុះហត្ថលេខាលើក្រឹត្យមួយកាលពីថ្ងៃចន្ទ ដោយបញ្ជាឲ្យផ្ដល់ប្រាក់ចំនួន ៥លានរូប្លិ៍ស្មើ ($81,500) ដល់សមាជិកក្រុមគ្រួសាររបស់ឆ្មាំជាតិរុស្ស៊ី ដែលបានស្លាប់ក្នុងប្រទេសអ៊ុយក្រែន និងស៊ីរី។
ក្រឹត្យនេះបន្ថែមការទទួលស្គាល់ជាផ្លូវការថា សមាជិកអង្គភាពឆ្មាំជាតិរុស្ស៊ីដែលត្រូវគេស្គាល់ថា រ៉ូសវ៉ាឌៀ (Rosgvardia) ស្ថិតក្នុងចំណោមអ្នករងគ្រោះនៃសង្គ្រាមក្នុងប្រទេសអ៊ុយក្រែន ដែលរុស្ស៊ីហៅថាជាប្រតិបត្តិការសឹកពិសេស។ កងកម្លាំងដែលឆ្លើយតបផ្ទាល់ចំពោះបញ្ជាលោក Putin ត្រូវបានបង្កើតក្នុងឆ្នាំ២០១៦ ដើម្បីប្រយុទ្ធប្រឆាំងនឹងអំពើភេរវកម្ម និងទទួលបន្ទុកបង្ក្រាបឧក្រិដ្ឋកម្ម និងត្រូវបានប្រើទូទាំងប្រទេស ដើម្បីបង្ក្រាបការតវ៉ាដោយស្ងៀមស្ងាត់ប្រឆាំងរដ្ឋាភិបាល។ លោក Putin បានប្រកាសគម្រោងផ្ដល់ប្រាក់សំណងរួចទៅហើយ ដល់ក្រុមគ្រួសារទាហានដែលបានស្លាប់ និងរបួស។ រុស្ស៊ីពុំបានធ្វើបច្ចុប្បន្នភាពពីចំនួនកងទ័ពស្លាប់របស់ខ្លួនចាប់តាំងពីថ្ងៃទី២៥ ខែមីនា នៅពេលខ្លួននិយាយថា កងទ័ពចំនួន ១,៣៥១នាក់បានស្លាប់ និង ៣,៨២៥នាក់រងរបួស៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
