​អ៊ុយក្រែន៖ កងកម្លាំង​រុស្ស៊ី និង​អ៊ុយ​ក្រែ​ន​កំពុង​ប្រយុទ្ធ​គ្នា​ចេញពី​ផ្លូវ​មួយ​ទៅ​ផ្លូវ​មួយ​ ដើម្បី​ដណ្ដើម​គ្រប់គ្រង​ទីក្រុង​ឧស្សាហកម្ម Severodonetsk កាលពី​ថ្ងៃ​ចន្ទ នៅក្នុង​ការប្រយុទ្ធ​យ៉ាងខ្លាំង​ក្លា​នៃ​ការ​រុលចូល​ទៅមុខ​របស់​កង​កម្លាំង​ក្រុង Moscow នៅក្នុង​តំបន់ Donbas ប្រទេស​អ៊ុយក្រែន​ភាគ​ខាងកើត​។

​លោក​ប្រធានាធិបតី​អ៊ុយ​ក្រែ​ន Volodymyr Zelenskyy និយាយ​ថា​ កងកម្លាំង​រុស្ស៊ី​បាន​វាយ​រុល​ទៅ​មុខ​ក្នុង​ទីតាំង​ជាច្រើនហើយ​ស្ថានភាព​លំបាក​ណាស់​ ប៉ុន្តែ​កងកម្លាំង​អ៊ុយ​ក្រែ​ន​មានឱកាស​វាយបក​វិញ​។ ទីក្រុង​ភាគ​ខាងកើត​មួយ​នេះ​បាន​ក្លាយ​ជា​គោលដៅ​សំខាន់ ​នៃ​ការវាយប្រហារ​របស់​ក​ង​កម្លាំង​រុស្ស៊ី​នៅ​ក្នុង​តំបន់ Donbas ដែល​មាន​ខេត្ត​ចំនួន​២ ​គឺ Luhansk និង Donetsk ស្រប​ពេល​មានការ​វាយ​លុក​ដ៏​សន្ធាប់​របស់​វិមាន​ក្រឹម​ឡាំង​ក្នុង​សង្គ្រាម​បំផ្លាញ ដែល​គេ​មើល​ឃើញ​​ទីក្រុង​ជាច្រើន​បាន​ខ្ទេច​ស្ទើរ​ទាំង​ស្រុង​ដោយសារ​ការ​ទម្លាក់​គ្រាប់បែក​។ ​លោក Oleksandr Stryuk ប្រធាន​រដ្ឋបាល​ក្នុង​ទីក្រុង Sievierodonetsk បាន​និយាយ​តាម​ទូរទស្សន៍​ថា ភាគី​នីមួយៗ​នៅតែ​ប្រទាញប្រទង់​គ្នា​មិនទាន់​ឈ្នះ​ចាញ់​នៅឡើយ ដោយ​ស្ថានភាព​កំពុង​ផ្លាស់ប្ដូរ​ជា​រៀងរាល់​ម៉ោង។

​កាលពី​ព្រឹក​ថ្ងៃ​ចន្ទ ចក្រភព​អង់គ្លេស​និយាយ​ថា ខ្លួន​នឹង​បញ្ជូន​ប្រព័ន្ធ​ជើង​ទម្រ​បាញ់​គ្រាប់​រ៉ូ​កែ​ត​ចម្រុះទៅ​អ៊ុយ​ក្រែ​ន ដែល​អាច​បាញ់​ដល់​គោលដៅ​ចម្ងាយ​ 80km​។​ ប្រមុខ​ការទូត​រុស្ស៊ី​លោក Sergey Lavrov បាន​និយាយ​ថា ក្រុង Moscow នឹង​ឆ្លើយតប​ទៅ​លោក​ខាង​លិច​ ចំពោះ​ការ​បញ្ជូន​មី​ស៊ី​ល​រយៈ​ចម្ងាយ​ឆ្ងាយ​ទៅ​អ៊ុយ​ក្រែ​ន ដោយ​ជួយ​រុញ​កងកម្លាំង​អ៊ុយ​ក្រែ​ន​ចូល​ទៅដល់​ព្រំដែន​រុស្ស៊ី​៕

អត្ថបទ៖ សុខមាន