កោះកុង៖ លោកជំទាវ មិថុនា ភូថង អភិបាលនៃគណៈអភិបាលខេត្តកោះកុង កាលពីល្ងាចថ្ងៃទី០៦ ខែមិថុនាម្សិលមិញបានជួបសំណេះសំណាល និងរៀបចំនូវកម្មវិធីដង្ហែក្បួនអបអរសាទរម្ចាស់មេដាយស៊ីហ្គេម ៤គ្រឿងរួមមានម្ចាស់មេដាយមាស ២ និងសំរឹទ្ធ ២ ដែលមានដើមកំណើតពីខេត្តកោះកុង ក្រោយដណ្ដើមបានមេដាយជូនជាតិមាតុភូមិ ក្នុងការប្រកួតកីឡាស៊ីហ្គេមលើកទី៣១ នៅប្រទេសវៀតណាមកាលពីថ្មីៗ។
កីឡាករជ័យលាភីដែលទទួលបានការលើកទឹកចិត្តពីអភិបាលខេត្តកោះកុងនេះ រួមមានកីឡាករ ប៉ោ ភារិទ្ធ ហៅ យ៉េន ឌីណា ម្ចាស់មេដាយមាសកីឡាគុនខ្មែរ, កីឡាករ អេ វីរៈខាំឈីត ភូថង ម្ចាស់មេដាយមាសនៃកីឡាវ៉ូវីណាម, កីឡាករ ទិន ឌិន ហៅ សែន រ៉ាដេត និងកីឡាករ អេ អាំម៉ាវីន ភូថង ម្ចាស់មេដាយសំរឹទ្ធនៃកីឡាវ៉ូវីណាម។ ប៉ុន្ដែកីឡាករ ទិន ឌិន មិនបានចូលរួមផ្ទាល់នោះទេដោយសារជាប់ភារកិច្ចនៅប្រទេសថៃ។ នាឱកាសនោះលោកជំទាវ មិថុនា ភូថង បានថ្លែងអបអរសាទរ និងចាត់ទុកសមិទ្ធផលរបស់កីឡាករទាំង ៤រូបគឺជាមុខមាត់មួយសម្រាប់ប្រជាពលរដ្ឋខេត្តកោះកុងទាំងមូល ហើយក៏ជាមោទកភាពជាតិផងដែរ ដែលពួកគេបានខិតខំប្រឹងប្រែងរហូតដណ្ដើមបានមេដាយមាស ក៏ដូចជាមេដាយសំរឹទ្ធក្នុងព្រឹត្តិការណ៍ស៊ីហ្គេម ដើម្បីលើកកម្ពស់កិត្តិយសជាតិលើឆាកអន្ដរជាតិ ក្រោមការដឹកនាំដ៏ឈ្លាសវៃរបស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា។
លើសពីនេះ លោកជំទាវអភិបាលខេត្តបានចាត់សមិទ្ធផលរបស់កីឡាករជ័យលាភី ដែលជាអ្នកខេត្តកោះកុងនេះគឺជាគំរូមួយដ៏ល្អសម្រាប់យុវជននៅក្នុងខេត្តកោះកុង និងទូទាំងប្រទេស ដើម្បីធ្វើឲ្យប្រទេសជាតិកាន់តែមានកេរ្ដិ៍ឈ្មោះល្បីល្បាញ ស្របតាមចក្ខុវិស័យរបស់រាជរដ្ឋាភិបាលដែលខិតខំកសាង និងផ្ដល់ឱកាសឲ្យប្រជាពលរដ្ឋ ព្រមទាំងយុវជនអាចអភិវឌ្ឍន៍សមត្ថភាព និងទេពកោសល្យរៀងៗខ្លួន ដើម្បីធ្វើឲ្យជាតិមាតុភូមិមានកិត្តិយស និងសេចក្ដីថ្លៃថ្នូលើឆាកអន្ដរជាតិ។ ទន្ទឹមជាមួយកម្មវិធីជួបសំណេះសំណាល និងការដង្ហែក្បួនអបអរសាទរម្ចាស់មេដាយមាស និងសំរឹទ្ធទាំង ៤គ្រឿង ស្ទើរទូទាំងក្រុងខេមរភូមិន្ទនៃខេត្តកោះកុង លោកជំទាវ មិថុនា ភូថង ក៏បានផ្ដល់នូវថវិកាលើកទឹកចិត្តដល់កីឡាជ័យលាភីផងដែរ រួមម្ចាស់មេដាយមាសគឺកីឡាករ យ៉េន ឌីណា និង អេ វីរៈខាំឈីត ភូថង ទទួលបានម្នាក់ ១០លានរៀល ខណៈម្ចាស់មេដាយសំរឹទ្ធ កីឡាករ អេ អាំម៉ារីន ភូថង និង សែន រ៉ាដេត ទទួលបានម្នាក់ ៥លានរៀល ។
ជាមួយគ្នាផងដែរ ឯកឧត្តម អ៊ូ រតនា ក្នុងនាមប្រធានសហព័ន្ធកីឡាវ៉ូវីណាមកម្ពុជា បានថ្លែងអំណរគុណចំពោះអភិបាលខេត្តកោះកុង ដែលបានរៀបចំកម្មវិធីលើកទឹកចិត្ដដល់កីឡាករជ័យលាភីមេដាយស៊ីហ្គេម ពិសេសកីឡាវ៉ូវីណាមរបស់ខ្លួន។ ឯកឧត្តមបញ្ជាក់ថា កីឡាករល្អ ហើយអាចឈានទៅសម្រេចបាននូវសមិទ្ធផលល្អជូនជាតិ អាស្រ័យលើកត្ដាជាច្រើនរាប់ចេញពីកត្ដាផ្ទាល់ខ្លួន និងសហព័ន្ធកីឡាជាតិ ពិសេសការយកចិត្តទុកដាក់លើកឆាកហ្វឹកហាត់របស់រាជរដ្ឋាភិបាល៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
