ភ្នំពេញ៖ នៅថ្ងៃទី០៧ ខែមិថុនា ឆ្នាំ២០២២ ពិធីសម្ពោធជាផ្លូវការនៃផ្សារទំនើប ព្រីនស៍ ថាមស៍ សឃ្វែរ ត្រូវបានប្រារព្ធឡើង។ ផ្សារទំនើប ព្រីនស៍ ថាមស៍ សឃ្វែរ បានប្រមូល​ផ្តុំនូវម្ចាស់​អាជីវកម្ម​ចិន និងខ្មែរជាច្រើន និង​ជា​អគារ​ពាណិជ្ជកម្ម​ខ្នាតធំដែលមានមុខងារពេញលេញ​នៅក្នុង​ទីក្រុង​ភ្នំពេញ ហើយក៏ជាមជ្ឈមណ្ឌលពាណិជ្ជកម្មដំបូងបង្អស់របស់ក្រុមហ៊ុន ព្រីនស៍ រៀល អ៊ីស្ទេត គ្រុប ដែល​បានបើកដំណើរជាសាធារណៈ។

ក្រុមហ៊ុន ព្រីនស៍ រៀល អ៊ីស្ទេត គ្រុប បានចាក់ឫសនៅក្នុងទឹកដីប្រទេសកម្ពុជា និង​មាន​អាជីវកម្ម​គ្រប​ដណ្ដប់លើវិស័យនានាដូចជា ផ្សារទំនើបលំនៅឋាន និងតំបន់ទេសចរណ៍ ហើយមានតួនាទី​ជា​អ្នកចូលរួមក្នុងបុព្វហេតុជំរុញការអភិវឌ្ឍនគរូបនីយកម្ម និងទំនើបកម្មនៃប្រទេសកម្ពុជា។ ការបើកសម្ពោធនៃផ្សារទំនើប ព្រីនស៍ ថាមស៍ សឃ្វែរ បានបង្ហាញពីការប្តេជ្ញាចិត្តរបស់ក្រុមហ៊ុន ព្រីនស៍ រៀល អ៊ីស្ទេត គ្រុប ក្នុងការពង្រាយអាជីវកម្មរបស់ខ្លួន និងពង្រីកការវិនិយោគនៅកម្ពុជា។

ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានអញ្ជើញចូលរួម​ក្នុង​ពិធីសម្ពោធនេះ និងមានប្រសាសន៍ថា កម្ពុជាកំពុងបើកដំណើរការសកម្មភាពសេដ្ឋកិច្ចសង្គម​ពេញលេញ​ឡើងវិញលើគ្រប់វិស័យតាមគន្លងប្រក្រតីថ្មី ។ ហើយផ្សារទំនើបព្រីនស៍ ថាមស៍ សឃ្វែរ ដែលបានបើកសម្ពោធនៅពេលនេះ នឹងក្លាយទៅជាគោលដៅដើរទិញទំនិញ ការកម្សាន្ត និងទេសចរណ៍មួយ ដែលទទួលបានការគាំទ្រពីសំណាក់ប្រជាពលរដ្ឋ និងភ្ញៀវទេសចរ។

ឯកឧត្តម ឃួង ស្រេង អភិបាលរាជធានីភ្នំពេញ បាន ប្រកាសថា កម្ពុជាបានត្រៀមខ្លួនរួចជាស្រេច ដើម្បីជាចលករជំរុញ និងគាំទ្រដល់ការវិនិយោគរបស់វិស័យឯកជន។ កម្ពុជាទទួលស្វាគមន៍ និង​លើក​​ទឹកចិត្តចំពោះការបណ្តាក់ទុនវិនិយោគ និងការធ្វើអាជីវកម្ម សេវាកម្មស្របច្បាប់គ្រប់ប្រភេទ ជាពិសេសការពង្រឹងសហគ្រិនភាព កិច្ចសហប្រតិបត្តិការពាណិជ្ជកម្ម ការបើកទូលាយបរិយាកាស​វិនិយោគឱ្យកាន់តែមានភាពល្អប្រសើរ ប្រកបដោយភាពទាក់ទាញ និងផ្តល់ទំនុកចិត្តខ្ពស់​ដល់​ធុរជន និងសហគ្រិនទាំងអស់ ស្របតាមក្របខ័ណ្ឌពាណិជ្ជកម្មសកលលោក សម្រាប់ជំរុញ​កំណើន​សេដ្ឋកិច្ច និងពង្រីកសក្តានុពលថ្មីៗ ប្រកបដោយគុណវុឌ្ឍន៍ខ្ពស់។

លោក Edward Lee នាយកប្រតិបត្តិនៃក្រុមហ៊ុន ព្រីនស៍ រៀល អ៊ីស្ទេត គ្រុប បានថ្លែង​អំណរគុណ​យ៉ាង​ស្មោះស្ម័គ្រចំពោះការគាំទ្រពីសំណាក់ស្ថាប័នរដ្ឋគ្រប់លំដាប់ថ្នាក់​ក្នុងពេល​កន្លងមក ក៏ដូចជាការគាំទ្រ និងការទទួលស្គាល់យ៉ាងពេញទំ ហឹងពីគ្រប់មជ្ឈដ្ឋាន និងពីសំណាក់​ប្រជាជនកម្ពុជាផងដែរ។ លោកក៏បានលើកឡើងថា ក្រុមហ៊ុន ព្រីនស៍ រៀល អ៊ីស្ទេត គ្រុប បានអភិវឌ្ឍ​អាជីវកម្មរបស់ខ្លួននៅកម្ពុជា ដោយតែងតែប្រកាន់ខ្ជាប់នូវគោលការណ៍បម្រើកម្ពុជា កសាងកម្ពុជា និងតបស្នង កម្ពុជា។ ផ្សារទំនើប ព្រីនស៍ ថាមស៍ សឃ្វែរ គឺជាស្នាដៃថ្មីមួយ​ទៀតរបស់ក្រុមហ៊ុន ព្រីនស៍ រៀល អ៊ីស្ទេត គ្រុប នៅកម្ពុជា ដែលមិនត្រឹមតែនាំមកនូវ​បទពិសោធន៍​ពេញលេញថ្មីៗជូនប្រជាពលរដ្ឋ និងភ្ញៀវទេសចរ ថែមទាំងក៏នឹងបង្កើត​ការងារបន្ថែមទៀតនៅកម្ពុជា និងលើកកម្ពស់ការអភិវឌ្ឍសេដ្ឋកិច្ច និងសង្គមរបស់កម្ពុជាផងដែរ។

ផ្សារទំនើប ព្រីនស៍ ថាមស៍ សឃ្វែរ មានទីតាំងស្ថិតនៅផ្នែកខាងត្បូងនៃមហាវិថីព្រះនរោត្តម ក្នុងខណ្ឌចំការមន រាជធានីភ្នំពេញ ដែលជាតំបន់ដែលមានភាពសក្ដានុពល និងរីកចម្រើន​បំផុតមួយ​នៅភ្នំពេញ។ គម្រោងនេះបានទទួលការចាប់អារម្មណ៍យ៉ាងខ្លាំងពីគ្រប់មជ្ឈដ្ឋាន​តាំងពី​ពេលចាប់ផ្តើមបង្កើតគម្រោងមកម្ល៉េះ ហើយក្នុងអំឡុងពេលសាងសង់គម្រោងនេះ សាលារាជធានី​ភ្នំពេញ និងក្រសួងមន្ទីរពាក់ព័ន្ធបានផ្ដល់ការគាំទ្រយ៉ាងច្រើន ដែលធ្វើឱ្យគម្រោងនេះ​អាច​អភិវឌ្ឍន៍ និងបើកដំណើរការតាមការរំពឹងទុក៕ អត្ថបទ ៖ ប្រាក់ វ៉ាន់ដា