​បាល់ទាត់៖ លោក​ព្រឹទ្ធាចារ្យ​បាល់ទាត់ ប៉ែន ផាត បាន​លើក​ឡើង​ថា បើ​វិស័យ​កីឡាបាល់ទាត់​កម្ពុជាមិន​រីកចម្រើន ពិសេស​បើ​សិន​កម្ពុជាមិន​មាន​សន្ដិភាព​នោះទេ ទំនង​សហព័ន្ធ​កីឡាបាល់ទាត់​ពិភពលោក​ (FIFA) មិន​ដង្ហែ​ពានរង្វាន់​បាល់ទាត់​ពិភពលោក​ដ៏​មានតម្លៃ​មក​កម្ពុជា​ដែរ។​

​ការលើកឡើង​នេះ ស្របពេល​ពានរង្វាន់​បាល់ទាត់​ពិភពលោក​ FIFA World Cup Trophy Tour ​នឹងត្រូវ​ដង្ហែ​មក​កម្ពុជា នា​ថ្ងៃទី​១៥ ខែមិថុនា ឆ្នាំ​២០២២ ខាងមុខ បន្ទាប់ពី​មានការ​អនុញ្ញាត​របស់​រាជរដ្ឋាភិបាល​កម្ពុជា ហើយនឹង​មានការ​ទទួល​ស្វាគមន៍ និង​លើក​ពាន​នេះ​ផ្ទាល់ដោយ​សម្ដេច​តេ​ជោ ហ៊ុន សែន នាយករដ្ឋមន្ដ្រី​នៃ​កម្ពុជានៅ​វិមាន​សន្ដិភាព។​ បុរស​វ័យ ៧៤​ឆ្នាំ និង​ជា​អតីត​កីឡាករ​បាល់ទាត់​ដ៏​ឆ្នើម​របស់​កម្ពុជា​រូបនេះបាន​បញ្ជាក់ថា ដោយសារ​បាល់ទាត់​កម្ពុ​ជា ក៏​ចាប់ផ្ដើម​រីកចម្រើនពិសេស​កត្ដា​សន្ដិភាព ទើប​ FIFA ​អាច​នាំយក​ពានរង្វាន់​មាស​សុទ្ធ​នេះមក​តាំង​បង្ហាញ​នៅ​កម្ពុជា មុន​ដាក់​ឲ្យ​ក្រុម​ខ្លាំងៗ​ជុំវិញ​ពិភពលោក​ធ្វើការ​ប្រកួតប្រជែងក្នុង​ព្រឹត្តិការណ៍​ FIFA World Cup ​នៅ​ប្រទេស​កាតានា​ចុងឆ្នាំ​២០២២ ខាងមុខ។​

​គួរ​ដឹងថា ពានរង្វាន់​បាល់ទាត់​ពិភពលោកនឹង​ដង្ហែ​មកដល់​កម្ពុជានា​វេលា​ម៉ោង ១០​ព្រឹក​ថ្ងៃទី​១៥ ខែមិថុនា​សប្ដាហ៍​ក្រោយ។ បន្ទាប់មក​នឹងមាន​ក្បួន​ដង្ហែ​ពាន​នេះ ពី​ព្រលានយន្ដហោះ​អន្ដរជាតិ​ភ្នំពេញមកកាន់​វិមាន​សន្ដិភាព ដោយ​ពិធី​ទទួល​ស្វាគមន៍​ពានរង្វាន់​បាល់ទាត់​ពិភពលោក​នេះ នឹងធ្វើ​ឡើង​ក្រោម​អធិបតីភាព​ដ៏​ខ្ពង់ខ្ពស់​របស់​សម្ដេច​តេ​ជោ​នាយករដ្ឋមន្ដ្រី។​ ​បន្ទាប់មកទៀតនឹងមាន​ការនាំ​យកពាន​រង្វាន់​បាល់ទាត់​ពិភពលោក​នេះ ទៅ​ដាក់​តាំងនៅ​ពហុ​កីឡដ្ឋាន​ជាតិ​មរតក​តេ​ជោ កន្លែង​ដែល​កម្ពុជា​ត្រៀម​រៀបចំ​ព្រឹត្តិការណ៍​ស៊ី​ហ្គេមឆ្នាំ​២០២៣ ដើម្បី​ស្វាគមន៍​ភ្ញៀវ​ចូល​ទស្សនា និង​ថតរូប​ផ្ទាល់​ជាមួយ​ពានរង្វាន់​បាល់ទាត់​ពិភពលោក​នេះ ចាប់ពី​ម៉ោង ១​រសៀលរហូតដល់​ម៉ោង ១០​យប់ អម​ជាមួយ​តន្ដ្រីសម័យ​កំដរ​ទៀតផង។​

​តាមរយៈ​នេះ គណៈកម្មាធិការ​ជាតិ​អូឡាំពិក​កម្ពុជា បាន​អំពាវនាវ​ឲ្យ​ប្រជាពលរដ្ឋក៏ដូចជា​យុវជន​-​យុវនារី និង​អ្នក​ស្នេហា​វិស័យ​កីឡាបាល់ទាត់ចូលរួម​ព្រឹត្តិការណ៍​នេះ​ឲ្យ​បាន​ច្រើន​កុះករ ដើម្បី​អបអរសាទរ និង​បង្ហាញ​នូវ​មោទនភាព​ជាតិ ចំពោះ​ព្រឹត្តិការណ៍​ជា​ប្រវត្តិសាស្ដ្រ​ថ្មី​មួយទៀតសម្រាប់​ប្រទេស​កម្ពុជា​នេះ៕

​អត្ថបទ៖ លី ឈុន​ឡា