ភ្នំពេញ៖ មនី្ទរពេទ្យបង្អែករាជធានីភ្នំពេញ មានក្រុមការងារគ្រូពេទ្យឆ្លើយតបបន្ទាន់ និងអគារដាច់ដោយឡែកសម្រាប់ទប់ស្កាត់ជំងឺឆ្លងនានា ។

បើតាមលោកវេជ្ជបណ្ឌិត អេង គឹមបូរ៉ារិទ្ធ អនុប្រធានមនី្ទរពេទ្យ តំណាងលោកវេជ្ជបណ្ឌិត នេត្រ សុវិរៈ ប្រធានមនី្ទរពេទ្យបង្អែករាជធានីភ្នំពេញ ខណ្ឌ៧មករា បានប្រាប់BTV ព័ត៌មាននាព្រឹកថ្ងៃទី៧ ខែមិថុនា ឆ្នាំ២០២២នេះថា ក្រោយពីស្ថានភាពជំងឺកូវីដ-១៩ បានធូរស្បើយ គ្រប់ស្ថានភាពទូទៅ គឺមានដំណើរការឡើងវិញជាបណ្តើរៗ ដោយមានប្រជាជនមកទទួលសេវាពិគ្រោះ ពិនិត្យ ព្យាបាលជំងឺ ក្នុងមនី្ទរពេទ្យមានចំនួនច្រើន។

ដោយឡែកពាក់ព័ន្ធនឹងជំងឺឆ្លងផ្សេងៗទៀត ជាក់ស្តែងយើងគ្រប់គ្នាបានដឹងថា មានករណីជំងឺអុតស្វា បានកើតឡើងនៅតាមបណ្តាប្រទេសលើពិភពលោក ទន្ទឹមនឹងនោះ​មន្ទីរពេទ្យយើងមានសកម្មភាពទប់ស្កាត់ នឹងជំងឺមួយនេះភ្លាមៗផងដែរ។ ក្នុងន័យមួយដើម្បីការពារ និងទប់ស្កាត់ជំងឺអុតស្វា ដោយកន្លងមកមនី្ទរពេទ្យមានក្រុមឆ្លើយតបបន្ទាន់ចំពោះជំងឺកូវីដ-១៩ ហើយ​ក្រុមការងារឆ្លើយតបបន្ទាន់នេះ ក៏នៅតែបន្តបេសកកម្មរបស់ខ្លួនមកបច្ចុប្បន្ននេះ នឹងត្រៀមលក្ខណៈរួចជាស្រេច ​ដើម្បីឆ្លើយតបនឹងបញ្ហាជំងឺអុតស្វា ដែលអាចកើតឡើងផងដែរ។

ទន្ទឹមគ្នានោះដែរ ប្រជាពលរដ្ឋ មកទទួលសេវា ពិនិត្យ ព្យាបាលជំងឺ ពីក្រុមការងារគ្រូពេទ្យនៃ​មនី្ទរពេទ្យ​បង្អែករាជធានីភ្នំពេញ បានលើកឡើងស្រដៀងគ្នាថា រូបគាត់ ក៏ដូចជាប្រជាពលរដ្ឋ​ផ្សេងទៀត​បានមកកាន់មនី្ទរពេទ្យ សង្កេតឃើញថាលោកគ្រូ អ្នកគ្រូពេទ្យ បានយកចិត្តទុកដាក់ ជាមួយអ្នកជំងឺ ​និងមានការរាក់ទាក់រូសរាយជាមួយអ្នកជំងឺ អ្វីដែលសំខាន់ទៀតនោះ គឺមនី្ទរពេទ្យ​បានរៀបចំវិធានការអនាម័យសុខាភិបាល​ ដូចជារក្សាគំលាតរវាងគ្នា និងពាក់ម៉ាស់ ព្រមទាំងដាក់​អាល់កុល ពិសេសការផ្តល់សេវាកម្មជូនអ្នកជំងឺ គឺរហ័ស។

ជាចុងក្រោយលោកវេជ្ជបណ្ឌិត អេង គឹមបូរ៉ារិទ្ធ បានបញ្ជាក់ទៀតថា បើសិនជាមានករណីផ្ទុះឡើង​នៅគ្រប់​ជំងឺឆ្លងនានា មនី្ទរពេទ្យបានត្រៀមលក្ខណៈរួចរាល់ ​នូវអគារដាច់ដោយឡែកមួយ សម្រាប់​ទទួល​ព្យាបាលអ្នកជំងឺ ​ដោយមិនឲ្យប៉ះពាល់​ដល់ផ្នែកសេវាដទៃទៀត ម្យ៉ាងទៀតទាក់ទងនឹង​សម្ភារបរិក្ខារវេជ្ជសាស្រ្តវិញ​ គឺមនី្ទរសុខាភិបាលរាជធានីភ្នំពេញ ​ក៏ដូចជាក្រសួងសុខាភិបាល បាន​ផ្តល់ជូនមនី្ទរពេទ្យ​គ្រប់គ្រាន់​ ដែលអាចធ្វើឲ្យមនី្ទរពេទ្យ​ទ្រទ្រ​ង់​នូវសកម្មភាពដំណើរ​មក​ដល់បច្ចុប្បន្ននេះ៕ អត្ថបទ រដ្ឋា