ភ្នំពេញ៖ ឯកឧត្តម ឃួង ស្រេង អភិបាលរាជធានីភ្នំពេញ បានឱ្យដឹងនៅថ្ងៃទី០៧ ខែមិថុនា ឆ្នាំ២០២២ថា គិតត្រឹមដើមឆ្នាំ២០២២នេះ នៅរាជធានីភ្នំពេញមានសំណង់បុរី និងបណ្ដុំផ្ទះល្វែងចំនួន ៣១០ កន្លែង និងអគារខ្ពស់ៗ ចំនួន ១.៦០៣ អគារ ក្នុងនោះ អគារកម្ពស់ចាប់ពី ២០ជាន់ឡើងទៅមានចំនួន ២២៥ អគារ ។

ឯកឧត្តម ឃួង ស្រេង បានបញ្ជាក់ថា នៅឆ្នាំ២០២១ កន្លងទៅ ទោះបីមានផលប៉ះពាល់​ពី​វិបត្តិ​ជា​សកលបង្កឡើងដោយជំងឺកូវីដ-១៩ក៏ដោយ រាជធានីភ្នំពេញ ​នៅតែបន្តទទួលបានគម្រោង​សាងសង់​ថ្មីៗពីវិស័យឯកជនរហូតដល់ទៅចំនួន ១.០៥០ គម្រោង ​លើផ្ទៃក្រឡាសំណង់សរុបជាង ​៤,៦៣ លានម៉ែត្រក្រឡា ដែលមានទំហំទុនវិនិយោគប៉ាន់ស្មានជាង ​២,២៦ ពាន់លានដុល្លាអាមេរិក​បន្ថែមទៀត​ ធ្វើឱ្យរាជធានីភ្នំពេញកាន់តែមានភាព​ស្រស់​បំព្រង មិនចាញ់​បណ្តាទីក្រុងនៃប្រទេស​ក្បែរខាង​ និងក្នុង​ តំបន់អាស៊ានឡើយ៕