ភ្នំពេញ៖ រាជរដ្ឋាភិបាលកម្ពុជា នឹងសម្រេចតាមចក្ខុវិស័យជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ ខណៈការវាយតម្លៃលើសូវនាករសំខាន់ៗរបស់រាជរដ្ឋាភិបាល នឹងអាចឈានដល់​គោលដៅ​កំណត់ជាបន្តបន្ទាប់ ជាពិសេសកំណើន GDP របស់ប្រជាជន បានកំពុងបន្តកើនឡើង​ពីមួយឆ្នាំទៅមួយឆ្នាំ។

លោកជំទាវ ហង់ លីណា ប្រតិភូរាជរដ្ឋាភិបាល ទទួលបន្ទុកជាអគ្គនាយក វិទ្យាស្ថានជាតិស្ថិតិ នៃក្រសួងផែនការ​ ថ្លែងលើកក្នុងកិច្ចសម្ភាសន៍ជាមួយសារព័ត៌មាន នៅថ្ងៃទី ៦ ខែមិថុនា ឆ្នាំ ២០២២ ថា ជុំវិញ​ការ​ធ្វើជំរឿន និង​អង្កេតជំរឿន​កម្ពុជា​បានអនុវត្តគោលការណ៍នេះជាច្រើន ជាពិសេស​នៅក្នុងឆ្នាំ២០២២នេះ ​រាជរដ្ឋាភិបាល​បាន​ធ្វើជំរឿ្ងន​សេដ្ឋកិច្ចជា​លើកទី២ ​ដែល​ការធ្វើជំរឿន​នេះ​មាន​សារៈសំខាន់ណាស់ ​គឺជារង្វាស់រង្វាល់មួយដែលមិនអាចអត់បាននោះឡើយ ដើម្បី​វាស់វែង​ពី​ដំណើរការ​គោលដៅ​អភិវឌ្ឍន៍​ឆ្នាំ ២០៣០។

លោកជំទាវ បន្តថា បើតាមការព្យាករណ៍ ជាពិសេសការកំណត់របស់ប្រមុខរាជរដ្ឋាភិបាល នៅឆ្នាំ ២០៣០ នឹងប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់ បច្ចុប្បន្នបាន​កំពុងបង្ហាញ​ឲ្យឃើញជាបណ្តើរៗហើយ ក្នុងនោះតាមរយៈការគណនាសាកល្បងទៅលើកំណើន GDP ប្រជាជន ដោយការគណនានេះឃើញថា មានការប្រែប្រួលខ្លាំង ដែលរាជរដ្ឋាភិបាលអាចសង្ឃឹមថា នៅ​ឆ្នាំ២០៣០ ប្រជាជនកម្ពុជា ​ក្លាយទៅជាប្រទេសដែលមានចំណូលមធ្យមកម្រិតខ្ពស់ជាមិនខាន។

យោងតាមអង្គការសហប្រជាជាតិកំណត់ថា ​ប្រទេសដែលមានចំណូលទាប​គឺប្រជាជននៃ​ប្រទេស​នោះ មានកំណើន GDP ក្រោម ១ពាន់ដុល្លារក្នុង ១ឆ្នាំ , ប្រទេសមានចំណូលមធ្យមកម្រិតទាប ប្រជាជន​មាន GDP លើ ១ ពាន់ដុល្លារ ​និងប្រទេសដែលមានចំណូលមធ្យមកម្រិតខ្ពស់ ​ចំណូល GDP របស់ប្រជាជនចាប់ពីលើ ២ ពាន់ដុល្លារ ដល់ជាង ៣ ពាន់ដុល្លារ ក្នុង ១ឆ្នាំ។

សម្រាប់ប្រទេសកម្ពុជា បើតាមព្យាករណ៍ ចាប់ពីឆ្នាំ ២០២៥ ដល់ ២០៣០, ចំណូល GDP របស់​ប្រជាជន​កម្ពុជា ​នឹងអាចសម្រេចបានក្នុងរង្វង់ ២ ៤០០ ដុល្លារអាមេរិក ។

សូមបញ្ជាក់ថា៖ ជុំវិញកំណើនសេដ្ឋកិច្ច ក្នុងវិបត្តិជម្ងឺកូវីដ ១៩ នេះ រាជរដ្ឋាភិបាលបានដាក់ឱ្យ​អនុវត្ត​នូវវិធានការអន្តរាគមន៍​សមស្រប​ដើម្បីឆ្លើយ​តប​នឹងនិន្នាការថ្មីៗ ក៏​ដូចជាគ្រប់គ្រងហានិភ័យ​ដែល​អាចកើតមាន, និងទាន់ពេលវេលា ​តាមរយៈការដាក់គោលនយោបាយ​ ដោយប្រទាក់ក្រឡា នូវគោល​នយោបាយហិរញ្ញវត្ថុសាធារណៈ, ​គោលនយោបាយរូបិយវត្ថុជារចនាសម្ព័ន្ធ ដើម្បីសម្រេចឱ្យបាននូវការរក្សាលំ​នឹង ​និងជំរុញកំណើនសេដ្ឋកិច្ច។

ចំពោះមុខ, រាជរដ្ឋាភិបាលបានកំពុងដាក់ចេញ ​ការអនុវត្តក្របខណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ-១៩ ​តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣ ​ក្នុងគោលបំណង និងពង្រឹងសក្តានុពលនៃចន្ទល់កំណើនសេដ្ឋកិច្ចឱ្យរស់រវើក និង​ត្រឡប់ទៅកំណើន​សក្តានុពល ​ប្រកបដោយចីរភាព​ និងបរិយាប័ន្ទ, ដើម្បីចាប់យកឱ្យ​បាន​នូវកាលានុវត្តភាពថ្មីៗ ​ដែលកំពុងលេចឡើង​ ស្របនឹងនិន្នាការតំបន់ និងសកល និងកសាងភាព​ធន់នៃសង្គម-សេដ្ឋកិច្ច៕អត្ថបទ៖ សុន រ៉ាឌី