បាត់ដំបង៖ ក្រុមគ្រូពេទ្យ នៃមន្ទីរសុខាភិបាលខេត្តបាត់ដំបង បានត្រៀមលក្ខណៈរួចរាល់សម្រាប់ការចាក់វ៉ាក់សាំង បង្ការជំងឺកូវីដ-១៩ ដូសជំរុញទី៥ ដល់ក្រុមមន្រ្តីជួរមុខ និងក្រុមគោលដៅអាទិភាព ប្រមាណ ៨០០០នាក់ ចាប់ពីថ្ងៃទី៩ ខែមិថុនា នេះតទៅ។

លោកវេជ្ជបណ្ឌិត ចេង លីស៊ុនឃាង អនុប្រធានមន្ទីរសុខាភិបាលខេត្តបាត់ដំបងទទួលបន្ទុកវ៉ាក់ សាំង បានប្រាប់BTVឱ្យដឹងថា ក្រុមគ្រូពេទ្យ ​កំពុងប្រមូលទិន្នន័យចំនួនមន្រ្តីរាជការតាមមន្ទីរ អង្គភាពនានា ជុំវិញខេត្ត ដើម្បីបែងចែកពេលវេលា ​និងទីតាំងចាក់ឱ្យបានត្រឹមត្រូវ ខណៈតាមការ​ប៉ាន់ស្មាន មានក្រុម អាទិភាពប្រមាណ៨០០០នាក់​ ដែលនឹងត្រូវចាក់វ៉ាក់សាំងដូសជំរុញទី៥ ចាប់ពីថ្ងៃទី៩ ខែមិថុនានេះ។

ប្រជាពលរដ្ឋក្នុងខេត្តបាត់ដំបង អាយុចាប់ពី ១២ឆ្នាំឡើងទៅ មានជាង៥ម៉ឺននាក់ ​បានចាក់វ៉ាក់ សាំងដូសជំរុញទី៤រួចរាល់។ ​ចំណែកកុមារអាយុចាប់ពី៥ឆ្នាំ ​ដល់១១ឆ្នាំ ប្រមាណជិត១០ម៉ឺននាក់ បាន ចាក់ដូសជំរុញទី៣ ​និងកុមារអាយុចាប់ពី៣ឆ្នាំដល់ក្រោម៥ឆ្នាំ ជាង១ម៉ឺននាក់ បាន​ចាក់វ៉ាក់សាំងដូសទី២ រួចរាល់៕អត្ថបទ៖ នឿត សុភក្ត្រ