កីឡា៖ ក្រសួងអប់រំ យុវជន និងកីឡាបានបើកវគ្គបំប៉នសមត្ថភាពស្តីពីការរៀបចំ និងគ្រប់គ្រងព្រឹត្តិការណ៍កីឡារយៈពេល ៣ថ្ងៃនៅមជ្ឈមណ្ឌលជាតិហ្វឹកហ្វឺនកីឡានៅថ្ងៃទី៧ ខែមិថុនា ឆ្នាំ២០២២ ដោយមានការចូលរួមពីមន្ត្រីសហព័ន្ធកីឡាជាតិនានា។
ឯកឧត្តម ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡាបានស្នើឲ្យនាយកដ្ឋានជំនាញពង្រឹងលើការរៀបចំ ការប្រកួតឲ្យកាន់តែមានប្រសិទ្ធភាពកាន់តែខ្ពស់ ពីព្រោះថាតាមរយៈការបណ្តុះបណ្តាលនេះ គឺជាគន្លឹះយ៉ាងសំខាន់ក្នុងការកសាងធនធានមនុស្សជារឿងចំបាច់សម្រាប់មន្ត្រីជំនាញនានា ក្នុងការរៀបចំ និងគ្រប់គ្រងព្រឹត្តិការណ៍កីឡាថ្នាក់ជាតិឲ្យកាន់តែមានប្រសិទ្ធភាព។ ជាមួយគ្នានោះឯកឧត្តមក៏បានស្នើឲ្យមន្ត្រីទាំងអស់ដែលចូលរួមវគ្គបំប៉ននេះ ត្រូវខិតខំក្រេបយកចំណេះដឹងឲ្យបានស៊ីជម្រៅ ដើម្បីយកទៅអនុវត្តការងារឲ្យបានច្បាស់លាស់ ដើម្បីរួមគ្នាអភិវឌ្ឍវិស័យកីឡាកម្ពុជាឲ្យកាន់តែរីកចម្រើន។ តាមរយៈវគ្គបំប៉នសមត្ថភាពនេះ ឯកឧត្តមអនុរដ្ឋលេខាធិការបានចាត់ទុកថា នេះគឺជាការរួមចំណែកដ៏សំខាន់ក្នុងការគោលដៅអភិឌ្ឍន៍រួមគ្នា ក្នុងខណៈដែលក្រសួងអប់រំ យុវជន និងកីឡាកំពុងធ្វើកំណែទម្រង់ស៊ីជម្រៅរបស់ខ្លួន តាមរយៈកែលម្អហេដ្ឋារចនាសម្ព័ន្ធកីឡា ការបណ្តុះបណ្តាលធនធានមនុស្ស ការកែទម្រង់ការប្រកួត និងការពង្រឹងសមត្ថភាពសហព័ន្ធជាដើម។
ទាំងអស់នេះគឺជាចំណុចសំខាន់ៗ ក្នុងការអភិវឌ្ឍវិស័យកីឡាកម្ពុជាឲ្យកាន់តែល្អប្រសើរបន្ថែមទៀត ក្នុងការពង្រឹងសមត្ថភាពបន្ថែមសម្រាប់ថ្ងៃខាងមុខ ជាពិសេសគឺគោលដៅស៊ីហ្គេមលើកទី៣២ ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជាផងដែរ។ ឯកឧត្តម ប៊ូ ជុំសេរី ក៏បានស្នើឲ្យមន្ត្រីយកចិត្តទុកដាក់ឲ្យបានខ្ពស់ ក្នុងការបំផុសស្មារតីកីឡាករ កីឡាការិនីយល់ដឹងពីសារធាតុហាមឃាត់ក្នុងកីឡាដូប៉ា។ បើកាលណាកីឡាករម្នាក់ប្រើប្រាស់ថ្នាំលើកកម្លាំង ឬប្រើប្រាស់ថ្នាំកាត់បន្ថយការឈឺចាប់ក្នុងពេលប្រកួត ក៏ត្រូវគេដកមេដាយយកទៅវិញ ហើយវាបង្កឲ្យខូចកិត្តិយសខ្លួនឯង និងសង្គមជាតិទៀតផង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
