​រុស្ស៊ី៖ ប្រទេស​រុស្ស៊ី​កាលពី​ថ្ងៃ​អង្គារ​បាន​រាយការណ៍​ថា ​កងកម្លាំង​របស់ខ្លួន​បាន​គ្រប់គ្រង​តំបន់​លំនៅឋាន​ទាំងស្រុង​នៅក្នុង​ទីក្រុង Severodonetsk ដែល​ជា​ចំណុច​មានការ​ប្រយុទ្ធ​គ្នា​ខ្លាំងក្លា បន្ទាប់ពី​ទីក្រុង Kyiv និយាយ​ថា ​កងកម្លាំងរ​បស់​ខ្លួន​បាន​កំពុង​វាយ​ប្រយុទ្ធ​នៅ​ក្នុង​តំបន់​ឧស្សាហកម្ម​ភាគ​ខាងកើត ទោះបីជា​កងកម្លាំង​រុស្ស៊ី​មាន​ចំនួន​ច្រើនជាង​ក៏ដោយ។

​រដ្ឋមន្ត្រី​ក្រសួងការពារជាតិ​រុស្ស៊ី​លោក Sergei Shoigu បាន​និយាយ​កាលពី​ថ្ងៃ​អង្គា​រថា កងកម្លាំង​រុស្ស៊ី​បាន​ដណ្ដើម​គ្រប់គ្រង​ផ្នែក​សំខាន់ៗ​មួយ​ចំនួន​នៅ​ក្នុង​ប្រទេស​អ៊ុយ​ក្រែ​ន​។ ​យោង​តាម​លោក Shoigu កងកម្លាំង​រុស្ស៊ី​បាន​ដណ្ដើម​កាន់កាប់​ជាង 97% នៃ​តំបន់ Luhansk​។ ​លោក Sergei Shoigu បាន​ប្រាប់​កិច្ចប្រជុំ​ក្រសួងការពារជាតិ​ថា តំបន់​លំនៅឋាន​នៃ​ទីក្រុង Severodonetsk ត្រូវ​បាន​រំដោះ​ទាំងស្រុង។​ ​លោក​បាន​បន្ថែម​ថា កងទ័ព​រុស្ស៊ី​នៅតែ​ព្យាយាម​ដណ្ដើម​គ្រប់គ្រង​តំបន់​ឧស្សាហកម្ម​របស់​ទីក្រុង​នេះ និង​តំបន់​លំនៅឋាន​នានា​ដែល​នៅ​ជិត​បំផុត​នៃ​ទីក្រុង​នេះ ស្រប​ពេល​មាន​របាយការណ៍​ផ្ទុយគ្នា​ថា ​តើ​ភាគី​ខាង​ណា​កំពុង​គ្រប់គ្រង​តំបន់​ណាខ្លះ​ឲ្យ​ប្រាកដ​៕

អត្ថបទ៖ សុខមាន