អ៊ុយក្រែន៖ លោកប្រធានាធិបតីអ៊ុយក្រែន Volodymyr Zelenskyy បាននិយាយថា ការជាប់គាំងនៅក្នុងសង្គ្រាមជាមួយរុស្ស៊ីមិនមែនជាជម្រើសសម្រាប់អ៊ុយក្រែនទេ ខណៈធ្លាប់បានអំពាវនាវឲ្យមានការគាំទ្រផ្នែកយោធាពីលោកខាងលិច ដើម្បីស្ដារបូរណភាពទឹកដីរបស់ប្រទេសលោកឡើងវិញ។
ថ្លែងទៅកាន់និពន្ធនាយករបស់សារព័ត៌មាន Financial Times លោក Roula Khalaf ក្នុងសន្និសីទក្រុមប្រឹក្សាសកលរបស់សារព័ត៌មាន Financial Times កាលពីថ្ងៃអង្គារ លោក Zelenskyy បាននិយាយថា ការរុញឲ្យកងកម្លាំងរុស្ស៊ីត្រឡប់ទៅកាន់ទីតាំងដែលបានកាន់កាប់មុនការលុកលុយថ្ងៃទី២៤ ខែកុម្ភៈ ស្មើនឹងជ័យជម្នះបណ្តោះអាសន្នដ៏ពិតប្រាកដសម្រាប់អ៊ុយក្រែន ប៉ុន្តែអធិបតេយ្យភាពពេញលេញលើទឹកដីរបស់ខ្លួន នៅតែជាគោលដៅចុងក្រោយរបស់លោក។ សង្គ្រាមនេះបានឈានដល់ដំណាក់កាលសង្គ្រាមកម្ទេចនៅក្នុងភាគខាងកើតតំបន់ Donbas ដែលជាចំណុចមានការវាយប្រយុទ្ធគ្នាដ៏កក្រើក ស្របពេលរុស្ស៊ីកំពុងប្រើកាំភ្លើងធំដ៏មានឥទ្ធិពលរបស់ខ្លួន ដើម្បីបំបាក់កងកម្លាំងអ៊ុយក្រែន និងវាយដណ្ដើមយកដែនដីរបស់អ៊ុយក្រែនបន្ថែមទៀត។ លោក Zelenskyy បាននិយាយថា អ៊ុយក្រែនអាចបាត់បង់ទាហានប្រមាណ ១០០នាក់ក្នុងមួយថ្ងៃ។
លោកថា ជ័យជម្នះត្រូវតែសម្រេចបាននៅលើសមរភូមិ។ ប៉ុន្តែលោកក៏បានទទូចផងដែរថា លោកបើកឲ្យមានការចរចាសន្តិភាព ទោះជាទាហានរុស្ស៊ីបានប្រព្រឹត្តអំពើព្រៃផ្សៃ អំឡុងការវាយលុករយៈពេល ១០០ថ្ងៃរបស់ពួកគេក៏ដោយ។ សង្គ្រាមអ្វីក៏ដោយគួរតែត្រូវបញ្ចប់នៅតុចរចា។ យ៉ាងណាក៏ដោយ ការចរចាសន្តិភាពត្រូវតែជួបទល់មុខគ្នាជាមួយលោកប្រធានាធិបតី Vladimir Putin ព្រោះគ្មាននរណាដែលត្រូវជួបចរចាក្រៅពីមេដឹកនាំរុស្ស៊ីនោះទេ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
