ភ្នំពេញ៖ ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ នៃរដ្ឋបាលរាជធានីភ្នំពេញ មានប្រសាសន៍ថា គិតត្រឹមព្រឹកថ្ងៃទី៨ ខែមិថុនា ឆ្នាំ២០២២នេះ នៅក្នុងមូលដ្ឋានរាជធានីភ្នំពេញ មានប្រជាពលរដ្ឋអាយុចាប់ពី១៨ឆ្នាំឡើង មកទទួលការ​ចាក់វ៉ាក់សាំងបង្ការជំងឺកូវីដ-១៩ ដូសទី៣ បានចំនួន១០៤% និងដូសទី៤ បានចំនួន៧៥%។

ស្របពេលដែលយុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសជំរុញទី៥ ដែលឈានមកដល់​នាថ្ងៃទី៩ ​ខែមិថុនា ឆ្នាំ២០២២ស្អែកនេះ​ ឯកឧត្តម វេជ្ជបណ្ឌិត ងី មានហេង ក៏បន្តអំពាវនាវដល់​ក្រុមជួរមុខ និង​បងប្អូនប្រជាពលរដ្ឋ​ ដែលបានចាក់វ៉ាក់សាំងបង្ការជំងឺកូវីដ-១៩​ ដូសទី៤រួច សូមរួសរាន់មកចាក់វ៉ាក់សាំងដូសទី៥ឲ្យបានគ្រប់ៗគ្នា។

ចាប់ពីថ្ងៃទី៩ ខែមិថុនា ឆ្នាំ២០២២នេះទៅ មន្ទីរសុខាភិបាលរាជធានីភ្នំពេញ នឹងទទួលនូវការ​ចាក់​វ៉ាក់សាំង​បង្ការជំងឺកូវីដ-១៩ ដូសទី៥​ ក្នុងន័យនេះ ​ក៏សូមអំពាវនាវដល់បងប្អូនប្រជាពលរដ្ឋទាំងអស់ សូមមកទទួលនូវការចាក់វ៉ាក់សាំងដូសទី៥ ​ឬក៏ដូសជំរុញផ្សេងៗ ​ដើម្បីជៀសវាងឲ្យផុតពីជំងឺកូវីដ-១៩។

ជាមួយគ្នានោះដែរបងប្អូនប្រជាពលរដ្ឋ មកទទួលវ៉ាក់សាំងដូសជំរុញទី៣ និងដូសជំរុញទី៤ ពី​ក្រុមការងារ​គ្រូពេទ្យនៃមនី្ទរពេទ្យបង្អែករាជធានីភ្នំពេញ ​បាន​បង្ហាញ​អារម្មណ៍​សប្បាយរីករាយ ថ្ងៃនេះ​ គាត់បានមកចាក់វ៉ាក់សាំងដូសជំរុញ​ និងសូមគោរពអរគុណដល់សម្តេចតេជោ ​ហ៊ុន សែន នាយករដ្ឋមន្រី្ត ​បានឲ្យប្រជាពលរដ្ឋគ្រប់រូប ​បានទទួលវ៉ាក់សាំងគ្រប់គ្នា ​លឿន ល្អ និង​មិនអស់ថវិកា។

ឯកឧត្តមវេជ្ជបណ្ឌិត ងី មានហេង បានបញ្ជាក់ទៀតថា​ សម្រាប់ទីតាំងផ្តល់វ៉ាក់សាំងបង្ការជំងឺកូវីដ-១៩ ឋិតក្រោមរដ្ឋបាលរាជធានីភ្នំពេញ ​គឺមានចំនួន៤២ទីតាំង​ នៅគ្រប់មណ្ឌលសុខភាព គ្រប់មនី្ទរពេទ្យបង្អែកទាំងអស់៕ អត្ថបទ៖រដ្ឋា