កណ្ដាល៖ រដ្ឋបាលខេត្តកណ្តាល នៅថ្ងៃទី៩ ខែមិថុនាស្អែកនេះ នឹងបើកដំណើរការចាក់វ៉ាក់សាំងការពារកូវីដ១៩ដូសទី៥ ដល់មន្ត្រីរាជការ មន្ត្រីជាប់កិច្ចសន្យា និងបុគ្គលិកជួរមុខទាំងផ្នែករដ្ឋ និងផ្នែកឯកជន នៅតាមបណ្តាមន្ទីរពេទ្យបង្អែក និងតាមបណ្តាមណ្ឌលសុខភាពឃុំសង្កាត់ជាង ១០០កន្លែង ដើម្បីពង្រឹងភាពស៊ាំ ការពារមេរោគកូវីដ១៩ នៅក្នុងសហគមន៍។

តាមការបញ្ជាក់ពីវេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាលខេត្តកណ្តាល បានថ្លែង​ប្រាប់BTV នៅថ្ងៃទី៨ខែមិថុនានេះថា សម្រាប់ដំណើរការចាក់វ៉ាក់សាំងដូសទី៥ ជូនមន្ត្រី និងបុគ្គលិក ជួរមុខទាំងផ្នែករដ្ឋ ​និងឯកជនចាប់ពីថ្ងៃស្អែកនេះតទៅ គឺទទួលចាក់ទៅតាមការ​ស្ម័គ្រចិត្ត ​នៅតាមមន្ទីរពេទ្យបង្អែក​ និងតាមបណ្តាមណ្ឌលសុខភាពនៅតាមឃុំសង្កាត់នានា ដោយ​មិនមានការចាក់ដូសទី៥ នៅតាមខ្នងផ្ទះ រោងចក្រ សាលារៀន និងទីផ្សារនោះទេ។

លោកវេជ្ជបណ្ឌិត លី មករា ប្រធានមន្ទីរពេទ្យបង្អែកជ័យជំនះក្រុងតាខ្មៅ បានថ្លែងថា នៅពេលនេះ មន្ទីរពេទ្យលោក បានទទួលវ៉ាក់សាំងកូវីដ១៩ប្រភេទ Pfizer ​ដើម្បីត្រៀមចាក់ដូសទី៥ ជូនក្រុម​មនុស្សអាទិភាព ​ហើយសម្រាប់ក្រុមក្មេងៗវ័យ ១២ឆ្នាំឡើងដែលមានប្រព័ន្ធការពារខ្សោយ ជាពិសេស ​ឧស្សាហ៍ឆ្លងឈឺគ្រុនក្តៅ ​គ្រុនផ្តាស់សាយ​ញឹកញាប់​ ជាដើម នឹង​បើកទទួលការ​ចាក់ចាប់ពីថ្ងៃទី២០ ​ខែមិថុនាតទៅ។

តាមរបាយការណ៍វេជ្ជបណ្ឌិត គួយ ប៊ុនធឿន បានបញ្ជាក់ថា នៅពេលបច្ចុប្បន្នទូទាំងខេត្តកណ្តាល បានចាក់ដូសទី២ បានលើស១០០% ​ហើយសម្រាប់ដូសទី៣ ​ចាក់បានប្រមាណជាង ៨៩ម៉ឺននាក់ ស្មើនឹងជាង ៨៣% នៃចំនួនគោលដៅត្រូវចាក់សរុប​។

ដោយឡែកដូសទី៤ ចាក់ប្រមាណជាង១៨.៥៤% នៃចំនួនគោលដៅសរុប ហើយសម្រាប់ការ​ចាក់​ដូសទី២ ដូសទី៣ និងដូសទី៤ បច្ចុប្បន្ន មន្ទីរសុខាភិបាល​បាននិងកំពុង ​ជម្រុញការចុះចាក់នៅ​តាម​បណ្តាមន្ទីរពេទ្យបង្អែក ​និងមណ្ឌលសុខភាពប្រមាណជាង ១០០កន្លែង ហើយក្រៅពីនេះ​ក៏មាន​ក្រុមពេទ្យកំពុងចុះចាក់នៅតាមខ្នងផ្ទះ​ តាមសាលារៀន ​តាមទីផ្សារ តាមរោងចក្រ និងតាមទី​ប្រជុំជននានា​ទៀតផងដែរ៕ អត្ថបទ ស៊ុម សុខជា