ភ្នំពេញ៖ ស្ថិតក្នុងដំណាក់កាលពីគ្រោះយោបល់ពាក់ព័ន្ធ នឹងការជំរុញបង្កើនការងារថែទាំសុខភាពបឋមនៅកម្ពុជា តំណាងអង្គការសុខភាពពិភពលោកប្រចាំប្រទេសកម្ពុជា ប្តេជ្ញាជួយកម្ពុជារហូតទទួលបានជោគជ័យលើការងារនេះ។

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល ​និងជាប្រធានក្រុមការងារ​អភិវឌ្ឍន៍​ និងគ្រប់គ្រងក្របខណ្ឌអនុវត្តការជំរុញបង្កើនការងារថែទាំសុខភាពបឋម ​នៅថ្ងៃទី០៨ ខែមិថុនានេះ បានអញ្ជើញ​ចូលរួម​ជាអធិបតីភាព​ក្នុងពិធីបើក ​«សិក្ខាសាលាពិគ្រោះយោបល់​ស្ដីពី​របាយការណ៍​លទ្ធផល​នៃការវិភាគស្ថានភាពការថែទាំសុខ​ភាពបឋម និងកិច្ចពិគ្រោះយោបល់​លើ​យន្តការការចូលរួមរបស់សហគមន៍​នៅប្រទេសកម្ពុជា»​ដែល​នឹងប្រព្រឹត្តទៅ​រយៈពេល២ថ្ងៃ​ចាប់​ពីថ្ងៃទី៨ ដល់ថ្ងៃទី០៩ខែមិថុនា ស្ថិតនៅសណ្ឋាគារភ្នំពេញ។

សិក្ខាសាលានេះ ក៏​មានការអញ្ជើញចូលរួមពី លោកស្រីវេជ្ជបណ្ឌិត លី អាយលែន តំណាងអង្គការ​សុខភាពពិភពលោក (WHO) ប្រចាំប្រទេសកម្ពុជា លោកស្រី Hedy Ip តំណាងអង្គការយូនីសែហ្វ (UNICEF) ប្រចាំប្រទេសកម្ពុជា លោក-លោកស្រី អភិបាលរង ​នៃគណៈអភិបាលរាជធានី-ខេត្ត ចំនួន ២៥ ប្រធានមន្ទីរសុខាភិបាល​ នៃរដ្ឋបាលរាជធានី-ខេត្ត ចំនួន ២៥ និងក្រសួង-ស្ថាប័នពាក់ព័ន្ធ មួយចំនួនទៀតផងដែរ។

នៅក្នុងឱកាសខាងលើនោះ លោកជំទាវវេជ្ជបណ្ឌិត ឱ វណ្ណឌីនបានថ្លែងថា ផែនការ​យុទ្ធសាស្រ្ត​សុខាភិបាល​ជំហានទី៤ ឆ្នាំ២០២២-២០៣០ បាន​ផ្តោតការ​យក​ចិត្តទុកដាក់ការធ្វើ​ពង្រឹង​ប្រព័ន្ធផ្តល់​សេវា​ថែទាំសុខភាព ​និងការគ្របដណ្តប់សុខភាពជាសកលដើម្បី​ឱ្យប្រជាជនកម្ពុជាមានសុវត្ថិភាព និង​សុខភាពល្អប្រសើរ។ក្រៅនេះ ​លោកជំទាវ រំពឹងទុកថា ក្នុងសិក្ខាសាលា២ថ្ងៃនេះ នឹងសម្រេច​បាន​នូវ​ចំណុចសំខាន់ៗចំនួន៣។

លោកស្រីវេជ្ជបណ្ឌិត លី អាយលែន តំណាងអង្គការសុខភាពពិភពលោក (WHO) ប្រចាំកម្ពុជា​បាន​លើកឡើងដែរថា​ ការជំរុញបង្កើនការងារថែទាំសុខភាព​បឋម​នៅកម្ពុជា នឹងក្លាយជា​ជម្រើសជើង​ឯកជាសកល នាពេលអនាគត ​ដែលសម្រេចបាននៃមូលដ្ឋានសុខភាពជាសាកល​។ ហើយWOH នឹងបន្តគាំទ្រ​ដល់ក្រសួងសុខាភិបាលរហូតទទួល​បានជោគជ័យ​លើការងារនេះ។

ការថែទាំសុខភាពបឋមគឺជាការថែទាំសុខភាពជាសារវន្ត ​ដោយផ្តោតលើវិធីសាស្រ្ត និង​បច្ចេកវិទ្យាជាក់ស្តែង ​និងមានលក្ខណៈវិទ្យាសាស្រ្ត ​ត្រឹមត្រូវដែលសង្គមជាតិអាចទទួលយកបាន និង​អាចផ្តល់​ជូនគ្រប់បុគ្គល​ និងគ្រប់ក្រុមគ្រួសារនៅសហគមន៍ តាមរយៈការចូលរួម​ដ៏​ពេញលេញរបស់គេព្រមទាំងថ្លៃដែលសគមន៍​ និងប្រទេសជាតិអាចរកប្រាក់បង់បាន៕

អត្ថបទ៖ ទូច សោភ័ណ