ឧត្តរមានជ័យ៖ រដ្ឋបាលខេត្តឧត្តរមានជ័យ បន្តដំណើរការចាក់វ៉ាក់សាំងដូសជំរុញដែលជាដូសទី៥ ជូនដល់មន្រ្តីរាជការ ក្រុង/ស្រុក ឃុំ-សង្កាត់ និងមន្រ្តីជួរមុខនៅថ្ងៃទី៩ស្អែកនេះ ដើម្បី​បង្ការជំងឺ​ឆ្លង​ផ្សេងៗ​ទោះបី​ជាស្ថានភាពជំងឺកូវីដ-១៩ ​នៅកម្ពុជាបច្ចុប្បុន្នឈានទៅលុបបំបាត់ទាំងស្រុង​និង​ពុំមានករណីឆ្លងបន្តយ៉ាងណាក្តីនោះ សំរាប់ពេលបច្ចុប្បន្ននេះ។

លោក ឌី រ៉ាដូ អភិបាលរងខេត្តឧត្តរមានជ័យ និងជាអ្នកនាំពាក្យសាលាខេត្ត បានឲ្យដឹងថា រដ្ឋបាល​ខេត្ត និងបន្តផ្តល់ការចាក់វ៉ាក់សាំងការពារជំងឺកូវីដ-១៩ បន្តទៀតសំរាប់ដូសជំរុញដូសទី៥ ជូនដល់​មន្រ្តីរាជការ អាជ្ញាធរក្រុង/ស្រុក នឹងតាមឃុំ-សង្កាត់ រួមទាំងមន្រ្តីជួរមុខ ដើម្បីបង្ការ​ការពារ​ការ​ជំងឺឆ្លងផ្សេងៗ​ នៅតាមទីតាំងដែលអាជ្ញាធរបានរៀបចំកំណត់​ចាប់ពីថ្ងៃទី៩ខែមិថុនា ឆ្នាំ២០២២​នេះតទៅ។

លោកបានបន្តថា ចំពោះមន្រ្តីរាជការគ្រប់ស្ថាប័ន រួមទាំងប្រជាពលរដ្ឋដែលបានទទួល​ការចាក់​វ៉ាក់​សាំង​ដូសទី៤ដូសជំរុញ បានរយះពេល៣ខែរួចមក ​ហើយនោះបងប្អូន​ត្រូវបន្តចាក់វ៉ាក់សាំង​ដូស​ជំរុញ​ដែលជាដូសទី៥បន្តទៀត​ បាន​ដោយឈរលើ​គោលការណ៍​ស្ម័គ្រចិត្ត​ដោយ​មិន​មានការ​បង្ខិតបង្ខំ​អ្វីឡើយ​នៅ​តាមមណ្ឌលសុខភាព​ ដែលនៅជិតមូលដ្ឋាន​របស់បងប្អូន៕ អត្ថបទ៖ ឃិន សារិទ្ធ