បាល់ទាត់៖ ក្រុម​ជម្រើស​ជាតិ​អេ​ស្ប៉ា​ញបាន​ហ្វឹកហាត់ ​នៅ​ទីក្រុង​ម៉ា​ឌ្រី​ត​ថ្ងៃ​ពុធដើម្បី​ត្រៀម​លក្ខណៈ​ឱ្យ​រួចរាល់​ សម្រាប់​ការប្រកួត​ជម្រុះ​បាល់ទាត់​ពិភពលោក ២០២២​ កាតា ជាមួយ​នឹង​ក្រុម​ជម្រើស​ជាតិ​ក្រិច​នៅ​ទីក្រុង Granada រំលង​អាធ្រាត្រ​ចូល​ថ្ងៃ​ទី​២៦ ខែ​មីនា នេះ​ក្នុង​ពូ​ល B​។​

​កីឡាករ​វ័យក្មេង​ក្លិប Barcelona, Pedri ​ក៏មាន​ឈ្មោះ​ក្នុង​ក្រុម​ជម្រើសជាតិ​ជា​លើកដំបូង​ដែរ ហើយ​កីឡាករ​វ័យ ​១៨​ឆ្នាំ​រូប​នេះ​សង្ឃឹមថា ​គ្រូ​បង្វឹក​លោក Luis Enrique នឹង​ដាក់​គេ​លេង។ ​ចំនែក​ប្រធាន​ក្រុម Real Madrid និង​អេ​ស្ប៉ា​ញ Sergio Ramos ក៏​បញ្ចូល​ក្នុង​ក្រុម​ដែរ ទោះបី​មាន​របួស​ថ្មីៗ​កន្លង​ទៅ​នេះ​ក៏ដោយ ខណៈ​ដែល​កីឡាករ Manchester City, Ferran Torres និង​​កីឡាករ Juventus, Alvaro Morata​ ចាប់​ដៃ​គ្នា​ក្នុង​តំបន់​ប្រយុទ្ធ​។​ ​ប្រកួត​ចុងក្រោយ​ខែ​វិច្ឆិកា​ឆ្នាំមុន អេ​ស្ប៉ា​ញ​បន្សល់​លទ្ធផល​ល្អ​បំផុត​ ដោយ​ឈ្នះ​ជើងឯក​បាល់ទាត់​ពិភពលោក​២០១៤ អាល្លឺម៉ង់ ៦​ទល់នឹង​០ ការប្រកួត UEFA Nation League ក្នង​នោះ Torres រកបាន​ ៣​គ្រាប់​តែ​ឯង​។​

​ប្រាំ​ប្រកួត​ចុងក្រោយ​ជាមួយ​ក្រិច អេ​ស្ប៉ា​ញ​ឈ្នះ​៣ ស្មើ​១ និង​ចាញ់​១ ដោយ​ស៊ុត​បញ្ចូល​ទី​បាន​ ៨​គ្រាប់ និង​ត្រូវ​ក្រិច​ស៊ុត​បញ្ចូល​វិញ​ ៥​គ្រាប់​។ ក្នុង​ពូ​ល​ជាមួយ​គ្នា​នេះ​ក្រៅពី​ក្រុម​ទាំងពីរ​នៅ​មាន​ហ្ស​ក់​ហ្ស៊ី កូ​សូ​វ៉ូ និង​ស៊ុយអែត​។ ​យប់​នេះដែរ​ក្នុង​ពូ​ល B ជាមួយគ្នា ស៊ុយអែត​ក៏បាន​ត្រៀមខ្លួន​រាល់​ដែរ​ជួប​ជាមួយ​ហ្ស​ក់​ហ្ស៊ី​។ ថ្ងៃនេះ​ស៊ុយអែត​ស្វាគមន៍​ការ​ត្រឡប់​ពី​ចូល​និវត្ត ​របស់​កីឡាករ​ជើងចាស់ Zlatan Ibrahimovich ​បន្ទាប់​សម្រេចចិត្ត​បញ្ចប់​អាជីព​ កាលពី​ជើងឯក​អឺរ៉ុប ២០១៦​។ នេះ​ជាការ​ប្រកួត​លើក​ទី​១ ​រ​វា​ក្រុម​ទាំងពីរដោយ​មិន​ធ្លាប់​លេង​ជាមួយគ្នា​ សូម្បី​ការប្រកួត​មិត្តភាព​អន្តរជាតិ ​ទោះបី​ក្នុង​តំបន់​អឺរ៉ុប​ជាមួយគ្នា​ក៏ដោយ​។ ស៊ុយអែត​ត្រូវគេ​គិតថា ​ឈ្នះ​ទោះបី​មិនមាន​កីឡាករ​ស៊ុត​បញ្ចូល​ទី​គ្រាប់​ពេល Ibrahimovich ​ក៏ដោយ​។​ ​ក្រឡេក​មក​ចាប់អារម្មណ៍​ពូ​ល C ដែលមាន​ក្រុមជម្រើសជាតិ​អ៊ីតាលី ប៊ុល​ហ្ការី លី​ទុយ​អា​នី អៀរ​ឡង់​ខាងជើង និង​ស្វី​សក៏​ចាប់ផ្តើម​ការប្រកួត​ជម្រុះ​ដូចគ្នា​។ រំលង​អា​ធ្រា​ត​នេះ អ៊ីតាលីត្រូវ​ទទួល​អៀរ​ឡង់​​ខាងជើង​។ ក្រុម​របស់លោក Roberto Mancini ជា​ក្រុម​ដែល​ត្រូវគេ​មើលឃើញថា​ នឹង​ឡើង​ចេញពី​ពូ​ល​នេះ​។

​តាំងពី​មិនបាន​លេង​បាល់ទាត់​ពិភពលោក ២០១៨ ​នៅ​រុស្ស៊ី វា​ជា​លើកដំបូង​ហើយ​សម្រាប់​អ៊ីតាលី​តាំងពី​ឆ្នាំ​១៩៥៨​។ ក្រុម​ការដឹកនាំ​របស់​លោក Mancini ម្ចាស់​បាល់ទាត់​ពិភពលោក ​៤​ដង ឈ្នះ​ទាំង ​១០​ប្រកួត​ជម្រុះ​ជើងឯក​អឺរ៉ុប​២០២០ និង​បាន​ឡើងទៅ​វគ្គ​ចុងក្រោយ Uefa Nation League ក្រោយ​បញ្ចប់​លេខ​១​ ពូ​ល A1​។ ប្រកួត​ចុងក្រោយ​អ៊ីតាលី​មិនដែល​ចាញ់​អៀរ​ឡង់​ខាង​ជើងទេ ឈ្នះ​៥ បង្កើត​គ្រាប់​បាល់​បាន​ ១០​គ្រាប់​។ ថ្ងៃ​នេះដែរ ប៊ុល​ហ្ការីទទួល​ស្វី​ស​។​ ​ក្នុ​ង​ពូ​ល I ក្រុម​តោ​កំណាច​អង់គ្លេសបើក​យុទ្ធនា​ការប្រកួត​ជម្រុះ ​ដោយ​ត្រូវ​ទទួល​ក្រុម​ចំណាត់​ថ្នាក់ទាប​សាំង​ម៉ា​រ៉ាំ​ង​នៅ​ពហុ​កីឡដ្ឋាន Wembley​។ យប់​នេះ​ខ្សែប្រយុទ្ធ​បិសាច​ក្រហម Manchester United, Marcus Rushford អាច​អវត្តមាន ក្រោយ​មិនបាន​បង្ហាញខ្លួន​ក្នុងការ​ហ្វឹកហាត់ ​ដោយសារ​របួស​ប្រអប់ជើង​។ ជាមួយគ្នានេះដែរ​កីឡាករ​កាំភ្លើង​ធំ Arsenal, Bukayo Saka ក៏​អាច​អវត្តមាន​ដែរដោយសារ​របួស​សរសៃ​ពួរ​។ គ្រូបង្វឹក​ជម្រើសជាតិ​អង់គ្លេស Gareth Southgate និយាយថា Marcus ពិតជា​ចង់​លេង​ខ្លាំងណាស់​។ តែ​យ៉ាងណា​លោក​ក៏​សប្បាយចិត្ត​ដែរ ​ចំពោះ​កីឡាករ Harry Kane​ ដែល​ចង់​លេង​គ្រប់​នាទី​ដែល​អាចទៅរួច​ឱ្យ​អង់គ្លេស​។

Harry Kane ពេលនេះ​បានដាក់​គោលដៅ​រួចហើយ ​ដើម្បី​បំបែក​កំណត់ត្រា​ស៊ុត​បញ្ចូល​ទី​ឱ្យ​អង់គ្លេស ៥៣​គ្រាប​របស់ Wayne Rooney ខណៈដែល​ពេលនេះ​គេ​ទើប​រក​បានតែ​ ៣២​គ្រាប់​ប៉ុណ្ណោះ​។​ ​ជំនួប​ប្រាំ​ប្រកួត​ចុងក្រោយ អង់គ្លេស​ឈ្នះ​សាំង​ម៉ា​រ៉ាំ​ងទាំង ​៥​ប្រកួត ដោយ​ក្នុងនោះ​មួយៗ​ប្រកួត​​ឈ្នះ​មិនតិចជាង​ ៥​គ្រាប់​នោះទេ​។​ ក្នុង​ពូ​ល​ជាមួយគ្នានេះដែរ យប់​នេះ​នៅមាន​ពីរ​ប្រកួត​ទៀត​គឺ អង់​ដូ​រ៉ាប្រកួត​ជាមួយ​អាល់​បា​នី និង​ហុង​គ្រី​ប្រកួត​ជាមួយ​ប៉ូឡូញ​។​ ​ចំនែក​ក្រុម​ឥន្ទ្រី​យ៍​ដែក​អាល្លឺម៉ង់ ផ្តើម​ប្រកួត​ជម្រុះ​បាល់ទាត់​ពិភពលោកក្នុង​ពូ​ល J ដោយ​ត្រូវ​ទទួល​អ៊ី​សល្លង់នៅ​ទីក្រុង Duisberg​។ យប់​នេះ​អាល្លឺម៉ង់​ស្វាគមន៍​កីឡាករ​វ័យក្មេង Bayern Munich, Jamal Musiala​ បន្ទាប់ពី​គ្រូបង្វឹក​លោក Jaochim Low កោះហៅ​រូបគេ​មក​រួម​ក្រុម​។ យប់​នេះ​អាល្លឺម៉ង់​ជួប​បញ្ហា​តំបន់​ការពារ​ច្រើន បន្ទាប់ពី​កីឡាករ​មួយចំនួន​ដូចជា Niklas Süle Toni Kroos​ និង Robin Gosens រងរបួស​។

នេះ​ជា​លើក​ទី​៣​ ដែល​ក្រុម​ទាំងពីរ​ជួប ខណៈ​ពីរ​លើក​កន្លងមក ១៨​ឆ្នាំមុន​ដែល​អាល្លឺម៉ង់ឈ្នះ ៣​ទល់នឹង​០ និង​ស្មើគ្នា ០​ទល់នឹង​០​។ ក្រៅពី​ការប្រកួត​នេះ​ពូ​ល J ជម្រើសជាតិ​លិច​តិ​ន​ស្តា​ញប្រកួត​ជាមួយ​អា​មេ​នី និង​រ៉ូ​មា​នីប្រកួត​ជាមួយ​ម៉ា​សេ​ដ្វា​ន់​ខាងជើង​។ ​ដោយឡែក​សម្រាប់​ការប្រកួត​ពូ​ល F អ៊ីស្រាអែល​ប្រកួត​ជាមួយ​ដា​ណឺ​ម៉ាក, ជម្រើសជាតិ​ម៉ុ​ល​ដាវីប្រកួត​ជាមួយ​កោះ​ហ្វា​រ៉ូ និង​ស្កុ​ត​ប្រកួត​ជាមួយ​អូទ្រីស​៕

​អត្ថបទ​៖​គង់ ហួន