យេមែន៖ កងកម្លាំងចម្រុះដឹកនាំដោយអារ៉ាប៊ីសាអ៊ូឌីត កំពុងធ្វើសង្គ្រាមនៅប្រទេសយេមែន បានបើកការវាយប្រហារតាមអាកាស ទៅលើគោលដៅជាច្រើនរបស់ក្រុមឧទ្ទាមហ៊ូធី នៅតំបន់ភាគខាងជើងប្រទេសមួយនេះ ដែលរួមទាំងគោលដៅនៅរដ្ឋធានីសាណា និងកំពង់ផែសាលីហ្វ នៅតាមតំបន់ឆ្នេរសមុទ្រក្រហម។
ក្រុមសម្ព័ន្ធមិត្តយោធា ដែលបានធ្វើសង្គ្រាមចាប់តាំងពីឆ្នាំ២០១៥ ប្រឆាំងនឹងក្រុមឧទ្ទាមហ៊ូធី គាំទ្រដោយអ៊ីរ៉ង់ គ្រប់គ្រងនៅតំបន់ភាគខាងជើងប្រទេស បាននិយាយថា ពួកគេបានវាយប្រហារទៅលើរោងចក្រផលិតមីស៊ីល និងដ្រូននៅក្នុងទីក្រុងសាណា។ ខណៈពេលនោះដែរ អង្គការសហប្រជាជាតិបាននិយាយថា ការវាយប្រហារតាមអកាសត្រូវចំគោលដៅ នៅកំពង់ផែទីក្រុងសាលីហ្វស្ថិតក្រោមការគ្រប់គ្រង របស់ក្រុមឧទ្ទាមហ៊ូធីនៅភាគខាងជើងទីក្រុងហូដេដាស់ ហើយនឹងត្រូវចំឃ្លាំងមួយកន្លែង និងបន្ទប់ក្នុងរោងចក្រផលិតចំណីអាហារ។ ក្រុមបេសកកម្ម UN ប្រចាំនៅទីក្រុងហូដេដាសបាននិយាយ នៅក្នុងសេចក្ដីថ្លែងការណ៍ថា ក្រុមអាជ្ញាធរក្នុងស្រុក និងថ្នាក់ដឹកនាំក្រុមហ៊ុនបានបញ្ជាក់ថា កម្មករ ៦នាក់ដែលរងរបួសត្រូវបានបញ្ជូន ទៅព្យាបាលនៅមន្ទីរពេទ្យបង្អែក។
ដោយឡែកក្រសួងពាណិជ្ជកម្ម និងឧស្សាហកម្មនៅក្នុងតំបន់គ្រប់គ្រង ដោយក្រុមឧទ្ទាមហ៊ូធី បាននិយាយថា ការវាយប្រហារមកលើកំពង់ផែ ឆ្លុះបញ្ចាំងយ៉ាងច្បាស់ពីសង្គ្រាមសេដ្ឋកិច្ច មកលើពលរដ្ឋយេមែន។ ទូរទស្សន៍ al-Masirah ដែលមានមូលដ្ឋាននៅក្នុងទីក្រុងសាណា បានរាយការណ៍ផងដែរថា ការវាយប្រហារតាមអាកាសផ្សេងទៀត បានកើតមានឡើងទីក្រុងម៉ារីប ជាកន្លែងដែលសង្គ្រាមកើនឡើងខ្លាំងក្នុងរយៈពេល ២-៣ខែចុងក្រោយនេះ ស្របពេលដែលក្រុមឧទ្ទាមហ៊ូធីបង្កើនអនុភាពរបស់ពួកគេ ក្នុងការដណ្ដើមយកតំបន់ផលិតឧស្ម័នមួយនេះ។ សូមបញ្ជាក់ថា កងកម្លាំងចម្រុះដឹកនាំដោយអារ៉ាប៊ីសាអ៊ូឌីត បានធ្វើអន្តរាគមន៍សង្គ្រាមស៊ីវិល យេមែនកាលពីឆ្នាំ២០១៥ ដើម្បីស្តារដ្ឋាភិបាលរបស់លោកប្រធានាធិបតី ទទួលស្គាល់ដោយអន្តរជាតិ លោក អាប់រ៉ាប់ប៊ូ មែនសួហាឌី ដែលត្រូវបានទម្លាក់ចេញពីដំណែង ដោយក្រុមឧទ្ទាមហ៊ូធីកាលពីឆ្នាំ២០១៤៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
