ស៊ីហ្គេម៖ អត្តពលិកកម្ពុជាដែលដណ្ដើមបានមេដាយមាស នៃការប្រកួតកីឡាស៊ីហ្គេមលើកទី៣១ នៅប្រទេសវៀតណាមកាលពីថ្មីៗ នឹងទទួលបានប្រាក់រង្វាន់លើកទឹកចិត្តពីក្រុមហ៊ុនណាហ្គាវើលដ៏នាល្ងាចថ្ងៃទី១០ ខែមិថុនា ឆ្នាំ២០២២ ស្អែកនេះ។
សូមរំលឹកថា ក្នុងព្រឹត្តិការណ៍ស៊ីហ្គេមលើកទី៣១ នៅទីក្រុងហាណូយកាលពីថ្មីៗ កម្ពុជាដណ្ដើមបានមេដាយសរុប ៦៣គ្រឿងរួមមានមេដាយមាស ៩ ប្រាក់ ១៣ និងសំរឹទ្ធ ៤១គ្រឿង។ ក្រោមកិច្ចសហការជាមួយគណៈកម្មាធិការជាតិអូឡាំពិកកម្ពុជា សម្រាប់ការប្រកួតកីឡាស៊ីហ្គេមប៉ុន្មានឆ្នាំចុងក្រោយនេះ ក្រុមហ៊ុនណាហ្គាវើលដ៏តែងផ្ដល់នូវប្រាក់រង្វាន់លើកទឹកចិត្តដល់កីឡាករ-កីឡាការិនីដែលដណ្ដើមបានមេដាយមាសជូនជាតិរៀងរាល់ឆ្នាំ។ តាមរយៈនេះ គណៈកម្មាធិការជាតិអូឡាំពិកកម្ពុជា បានចាត់ទុកនេះគឺជាការរួមចំណែកមួយដ៏សំខាន់ពីវិស័យឯកជន ដើម្បីលើកទឹកចិត្តដល់កិច្ចខិតខំប្រឹងប្រែងរបស់កីឡាករ-កីឡាការិនីរហូតសម្រេចបាននូវសមិទ្ធផលដ៏ល្អជូនជាតិ ពិសេសអត្តពលិកជ័យលាភីមេដាយមាសផ្ទាល់តែម្ដង។
សូមបញ្ជាក់ថា ក្នុងចំណោមមេដាយមាស ៩គ្រឿងដែលកម្ពុជាទទួលបានពីការប្រកួតស៊ីហ្គេមនៅវៀតណាម និងត្រៀមទទួលប្រាក់រង្វាន់លើកទឹកចិត្តពីណាហ្គាវើលដ៏ស្អែកនេះរួមមាន៖ ១-កីឡាប្រដាល់គុនខ្មែរឈ្នះមេដាយមាស ១ ដោយកីឡាករ ប៉ោ ភារិទ្ធ ហៅ យ៉េន ឌីណា។ ២-កីឡាប៉េតង់ឈ្នះមេដាយមាស ២ លើវិញ្ញាសាវាយគូចម្រុះបុរស-នារី ដោយកីឡាករ ស៊ីន វង់ និងកីឡារិនី វង ចន្ថា និងវិញ្ញាសានារី ៣នាក់ ទល់ ៣នាក់ដោយកីឡាការិនី អ៊ិន ស្រីយ៉ា, ស្រ៊ាង សុរ៉ាឃីម, ឃួន យ៉ារី និង ដួង ឌីណា។ ៣-កីឡាឃីកបុកស៊ីងឈ្នះមេដាយមាស ១ ដោយកីឡាករ ទូច រ៉ាឆាន។ ៤-កីឡាតេក្វាន់ដូ WT ឈ្នះមេដាយមាស ១ ដោយកីឡាករ វ៉ា មិថុនា។ ៥-កីឡាចំបាប់ឈ្នះមេដាយមាស ១ ដោយកីឡាករ ស៊ូ បាលី និងចុងក្រោយគឺកីឡាវ៉ូវីណាមដែលដណ្ដើមបានមេដាយមាសច្រើនជាងគេចំនួន ៣គ្រឿងលើវិញ្ញាសាសម្ដែងការពារខ្លួនស្រី ១ ប្រុស ៣ មានអាវុធ ដោយកីឡាករ លី បូរ៉ាមី, ជ្រិន ប៊ុនឡុង, ប្រាក់ សុវណ្ណានី និងកីឡាការិនី ប៉ាល់ ឆរស្ម៊ី, វិញ្ញាសាក្រុម ការពារខ្លួនកាបិតធំបុរស ២នាក់ដោយកីឡាករ ជិន ពិសិដ្ឋ និងកីឡាករ ម៉េត សុភត្ដ្រា និងវិញ្ញាសាប្រយុទ្ធបុរស ៦៥គីឡូក្រាមដោយកីឡាករ អេ វីរៈខាំឈីត ភូថង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
