អ៊ុយក្រែន៖ យោងតាមមន្ត្រីប្រចាំតំបន់ ទាហានអ៊ុយក្រែនត្រូវបានវាយរុញឲ្យត្រឡប់ក្រោយនៅក្នុងទីក្រុង Severodonetsk ភាគខាងកើត ដោយសារការទម្លាក់គ្រាប់បែកឥតឈប់ពីកងកម្លាំងរុស្ស៊ី ហើយពេលនេះគ្រប់គ្រងបានតែតំបន់ជាយក្រុងមួយចំនួនប៉ុណ្ណោះ។
រុស្ស៊ីបានផ្ដុំកងទ័ព និងអាវុធរបស់ខ្លួននៅក្នុងទីក្រុងតូចភាគខាងកើតមួយនេះ ក្នុងពេលប៉ុន្មានសប្ដាហ៍ថ្មីៗនេះដើម្បីដណ្ដើមយកខេត្តនៅជុំវិញនោះ ជំនួសសង្គ្រាមតំណាងរបស់ក្រុមផ្ដាច់ខ្លួន។ ទាហានអ៊ុយក្រែនបានប្ដេជ្ញាប្រយុទ្ធដណ្ដើមយកទីក្រុងនេះឲ្យទាល់តែបានដោយនិយាយថា ការប្រយុទ្ធគ្នាអាចអូសបន្លាយយូរទៀត។ បន្ទាប់ពីការអះអាងថា កងកម្លាំងរបស់ខ្លួនបានរុញកងកម្លាំងរុស្ស៊ីត្រឡប់ក្រោយ និងដណ្ដើមបានទីក្រុងនេះពាក់កណ្ដាលមកវិញ នៅក្នុងការវាយបកគួរឲ្យភ្ញាក់ផ្អើល អភិបាលតំបន់ Luhansk បាននិយាយថា ភាគច្រើននៃទីក្រុងនេះត្រូវធ្លាក់ចូលក្នុងដៃរុស្ស៊ីជាថ្មី។
សារព័ត៌មាន RBC-Ukraine បានដកស្រង់សម្ដីរបស់អភិបាលតំបន់នេះលោក Serhiy Haidai ដោយនិយាយថា នៅពេលនេះកងកម្លាំងរបស់លោកបានគ្រប់គ្រង ត្រឹមតែតំបន់ជាយក្រុងមួយចំនួននៃទីក្រុងនេះប៉ុណ្ណោះ យ៉ាងណាការវាយប្រយុទ្ធគ្នានៅតែបន្ត កងកម្លាំងរបស់លោកកំពុងការពារទីក្រុង Severodonetsk មិនទាន់អាចនិយាយបាននៅឡើយទេថា កងកម្លាំងរុស្ស៊ីនឹងគ្រប់គ្រងទីក្រុងនេះទាំងស្រុង៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
